އީރާނުގެ ރިޔާސީ އިންތިޚާބުގައި މިހާތަނަށް ގުނި ވޯޓަށް ބަލާއިރު 2013 ވަނަ އަހަރުން ފެށިގެން އެގައުމުގެ ރައީސްކަމުގެ މަގާމު އަދާކުރައްވަމުން ގެންދަވާ ހަސަން ރޫހާނީ ބޮޑު ތަފާތަކުން ކުރި ހޯއްދަވައިފިއެވެ.

އީރާނުގެ އިންތިޚާބީ ކޮމިޓީގެ ވެރިޔާ އަލީ އަސްގަރް އަހްމަދު ހޮނިހިރު ދުވަހު އިއުލާނު ކުރެއްވި މިހާތަނަށް ގުނާ ނިމިފައިވާ 25.9 މިލިއަން ވޯޓް ގެ ތެރެއިން 14.6 މިލިއަން ވޯޓް ލިބިވަޑައިގެންފައިވަނީ ރޫހާނީއަށެވެ.

ރޫހާނީއާ އެންމެ ގާތުން ވާދަކުރައްވާ އިބްރާހިމް ރައީސީއަށް ލިބިވަޑައިގެންފައިވަނީ 10.1 މިލިއަން ވޯޓެވެ.

މިއިންތިޚާބުގައި ކޮންޒަވޭޓިވް އެއް ކަމަށްވާ މުސްތަފާ މިރްސަލިމްއާ ރިފޯމިސްޓެއް ކަމަށްވާ މުސްތަފާ ހާޝިމިތާބާ އަށް ވަރަށް ކުޑަ ޕަސެންޓޭޖެއްގެ ވޯޓް ނޫނީ ލިބޭނެ ކަމަށް ލަފައެއް ނުކުރެވެއެވެ.

ވޯޓްލާން ގިނަ އަދަދެއްގެ ބަޔަކު ނުކުމެފައިވާއިރު ވޯޓްލުމަށް ރަޖިސްޓްރީ ކުރި 56 މިލިއަން މީހުންގެ ތެރެއިން 40 މިލިއަން މީހުން ވޯޓް ލުމަށް ނުކުމެފައި ވެއެވެ.

ވޯޓްލާން ނުކުތް މީހުންގެ ކިއުތައް ދިގުވެގެން ގޮސްފައިވާއިރު ކިއު ބަންދުކުރުމުގެ ވަގުތު ޖެހުނިއިރު ކިއުގައި ތިބި ފަރާތްތަކަށް ވޯޓްލުމުގެ ފުރުސަތުދިނުމަށް އެތައް ގަޑިއިރުތަކަކަށް ވޯޓްލުން ދެމިގެން ދިއައެވެ.

ރަސްމީ ނަތީޖާ އެނގޭނެ ކަމަށް ބެލެވެނީ ހޮނިހިރު ދުވަހުގެ ފަހުގެ ވަގުތެއްގައެވެ.

އެތައް ބަޔަކު މި އިންތިޚާބުގެ ނަތީޖާ ދެކެމުން ދިއައީ މިއިންތިޚާބަކީ ބޭރުދުނިޔެއަށް އީރާނު ހުޅުވާލައްވައި އެ ގައުމުގެ އިގްތިސާދު ނަގާ ކޮޅަށް ޖެހުމަށް ރޫހާނީ ގެންގުޅުއްވި ސިޔާސަތު ރައްޔިތުން ބަލައިގަނޭތޯ ނުވަތަ ނޫންތޯ ބަލައި ކުރާ ހުކުމެއްގެ ގޮތުގައެވެ.

އީރާނުގެ ހަތްވަނަ ރައީސްގެ ގޮތުގައި 2013 ވަނަ އަހަރު ވެރިކަމަށް ވަޑައިގެންނެވި ރޫހާނީ ގެންދެވީ ބައިނަލްއަގްވާމީ މުޖުތަމައާ އެކަހެރިކޮށް އިރާނު އޮތް އޮތުން ކުޑަކުރެއްވުމަށް މަސައްކަތް ކުރައްވަމުންނެވެ.

ހުކުރު ދުވަހު ބޭއްވި އިންތިޚާބަކީ 2015 ވަނަ އަހަރު ދުނިޔޭގެ ބާރުތަކާއެކު އިރާނުން ނިއުކްލިއަރ މައްސަލައިގައި އަޅާފައިވާ ދަތިކުރުމުގެ ފިޔަވަޅުތައް އުވާލުމަށް ބައިނަލްއަގްވާމީ ފަރާތްތަކާ މަޝްވަރާކުރައްވާ އެއްބަސްވުމަކަށް ދެވުނު ފަހުން އެގައުމުގައި ބޭއްވި ފުރަތަމަ ރިޔާސީ އިންތިޚާބެވެ.