ކޮލަމްބިއާގައި 2018 ގަ ބާއްވާ ރިޔާސީ އިންތިޚާބުގައި އެ ގައުމުގައި އުވާލެވިފައިވާ ހަނގުރާމެވެރި ޖަމާއަތްކަމަށްވާ ފާކްގެ ކުރީގެ ލީޑަރު ވާދަކުރައްވާނެކަން އިއުލާނުކުރައްވައިފިއެވެ.

ޓިމޮޗެންކޯގެ ނަމުން މުޚާތަބުކުރެވޭ ރޮޑްރިގޯ ލޮންޑޮނޯއާއި ކޮލަމްބިއާގެ ސަރުކާރާ ދެމެދު ސުލްހައިގެ އެއްބަސްވުމެއްގައި ސޮއިކުރީ މީގެ އަހަރެއް ކުރިންނެވެ.

އޭނާ އިންތިޚާބުގައި ވާދަކުރައްވާނީ ކުރީގެ ހަނގުރާމަވެރި ޖަމާއަތުން މިހާރު އުފައްދާފައިވާ ސިޔާސީ ޕާޓީއިންނެވެ.

އުމުރުން 58 އަހަރުގެ ޓިމޮޗެންކޯ ފާކްގެ ލީޑަރަކަށް ވެފައިވަނީ 2011 ވަނަ އަހަރުއެވެ.

ކޮލަމްބިއާގެ ރައްޔިތުން ތަމްސީލުކުރުމަށް ކުރީގެ ހަނގުރާމަވެރިޔަކު ހުންނަން އެގައުމުގެ ގިނަ ރައްޔިތުން ބޭނުންނުވާއިރު އޭނާއަށް ވެރިކަމަށް ވަޑައިގެންނެވުމުގެ ފުރުސަތު ކުޑައެވެ.

ވަކިން ޚާއްސަކޮށް ކަނާތުފިޔައިގެ ޕާޓީތަކުން ގެންދަނީ  ފާކްގެ ކުރީގެ މެމްބަރުން ޖަލަށްނުލެވި އެމީހުންނަށް ރިޔާސީ އިންތިޚާބުގައި ވާދަކުރެވޭނެ ގޮތަށް ސުލްހައިގެ މަރުހަލާތަށް ގެންދިއުމުން ފާޑުކިޔަމުންނެވެ.

ކޮލަމްބިއާގެ ސަރުކާރުގެ މަދަދާއެކު ހަތިޔާރު ހަތިޔާރު ހިފައިގެން ސަރުކާރުގެ ދިފާއުގައި ހަނގުރާމަކުރި ކަނާތުފިޔައިގެ ފަރާތްތަކާއި ފާކް ޖަމާއަތާމެދު ބައި ގަރުނަށް ދެމިގެންދިޔަ ހަމަނުޖެހުންތަކުގައި 260،000 މީހުން މަރުވިއެވެ.

ޚިޠާލު ހޯދުމުގެ ވޯޓްތަކުން ދައްކާ ގޮތުގައި ކޮލަމްބިއާގެ އެތައް ރައްޔިތުންނެއް މިހާރުވެސް ސުލްހައިގެ އެއްބަސްވުމަށް ފާކުން އިހުތިރާމް ކުރާނެ ކަމާމެދު ޝައްކުކުރެއެވެ.

އެ ޖަމާއަތުގެ ނަމުގެ ކުރުގޮތަކީ ކުރިންވެސް ބޭނުންކުރަމުން ދިޔަ ގޮތެވެ. ނަމަވެސް އެ އަކުރުތަކުން ރަމްޒުކޮށްދޭ ދިގުނަން ވަނީ ބަދަލުވެފައެވެ.

ރިވޮލިއުޝަނަރީ އާމްޑް ފޯސަސް އޮފް ކޮލަމްބިއާގެ ބަދަލުގައި މިހާރު އެ އަކުރުތަކުގެ ދިގުގޮތަކަށް ބޭނުންކުރަނީ ރިވޮލިއުޝަނަރީ އޯލްޓަރނޭޓިވް ފޯސް އޮފް ދި ކޮމަން ޕީޕްލްއެވެ.