ދެކުނު އެފްރިކާގައި ހިނގި ބަސް އެކްސިޑެންޓެއްގައި 19 ކުޑަކުދިން މަރުވެއްޖެ
ބަހުގައި ތިބި ކުޑަކުދިން މަރުވީ، ބަސް ޓްރަކަކާއި މުޑިއެރުމުގެ ސަބަބުން
ބަހުގައި އަލިފާން ރޯވުމުގެ ކުރިން އޮފިޝަލުން ވަނީ ހަތް ކުޑަކުދިން ސަލާމަތްކޮށްފައި
ދެކުނު އެފްރިކާގެ ވެރިރަށް ޕްރިޓޯރިއާގައި ހިނގި ބަސް އެކްސިޑެންޓެއްގައި މަދުވެގެން 19 ކުޑަކުދިން މަރުވެފައިވާ ކަމަށް ކަމާބެހޭ ފަރާތްތަކުން ބުނެފިއެވެ.
ރިޕޯޓުތައް ބުނާގޮތުން ވެރިރަށް ޕްރިޓޯރިއާގެ އުތުރުގައި ހުކުރު ދުވަހު ހިނގި މިހާދިސާގައި ބަހުގައި ތިބި ކުޑަކުދިން މަރުވީ، ބަސް ގޮސް ޓްރަކެއްގައި މުޑިއެރުމުގެ ސަބަބުން ބަހުގައި ގޮވުމެއް ގޮވައި އަލިފާން ރޯވުމުގެ ސަބަބުންނެވެ.
ބަހުގައި ތިބި ކުޑަކުދިންނަކީ ޕްރައިމަރީ އަދި ސެކަންޑްރީ ސްކޫލުގެ ކުޑަކުދިންނެވެ.
ރިޕޯޓުތައް ބުނާގޮތުން ބަހުގައި އަލިފާން ރޯވުމުގެ ކުރިން އޮފިޝަލުން ވަނީ ހަތް ކުޑަކުދިން ސަލާމަތްކޮށްފައެވެ.
ފުލުހުން ފަހުން ބުނެފައި ވަނީ މި ހާދިސާގައި ބަސް ދުއްވަން އިން ޑްރައިވަރު މަރުވި ކަމަށާއި އެކަމަކު ޓްރަކުގެ ޑްރައިވަރު ސަލާމަތްވި ކަމަށެވެ.
ދެކުނު އެފްރިކާގެ މަގުތަކުގައި މިފަދަ ތަފާތު އެކްސިޑެންޓް ތަކުގައި ގިނަ ބަޔަކު މަރުވަމުންދާއިރު، ދެކުނު އެފްރިކާ އަކީ އެފްރިކާ ބައްރުގައި އެންމެ ކުރިއަރާފައިވާ ރޯޑް ނެޓްވޯކް ގާއިމުވެފައިވާ ގައުމެވެ.
