އިރާނުގައި ކޮވިޑް-19 ޖެހިގެން މަރުވާ މީހުންގެ އަދަދު މައްޗަށް ދިޔުމާއެކު ލޮކްޑައުންއަކަށް ގޮސްދާނެކަމުގެ އިޝާރާތެއް

އިރާނުގައި ފާއިތުވި 24 ގަޑިއިރު ކޮވިޑް-19 ޖެހިގެން 440 މީހުން މަރުވެފައިވާ ކަމަށް އެގައުމުގެ ހެލްތު މިނިސްޓްރީން ބުނެފި އެވެ.

އިރާނަކީ މެދު އިރުމަތީގެ ގައުމުތަކުގެ ތެރެއިން ކޮވިޑް-19 ގެ ހާލަތު އެންމެ ގޯސް ގައުމެވެ. އިރާނުގައި ކޮވިޑް-19 ޖެހިގެން މަރުވި މީހުންގެ އަދަދު ވަނީ 35،738ށް އަރާފައެވެ. އިރާނުގައި ކޮވިޑް-19 ޖެހިގެން އެންމެ ފުރަތަމަ މީހާ މަރުވެފައިވަނީ ފެބްރުއަރީ މަހުގެ 9 ވަނަ ދުވަހު އެވެ.

އިރާނުގައި ކޮވިޑް-19 ފެތުރުން ކޮންޓްރޯލްކުރުމަށް މައި ސިޓީތަކަށް ވަނުމާއި ބޭރަށް ނިކުތުން މިހާރު ވަނީ މަނާކޮށްފައެވެ. މީގެއިތުރުން އިރާނުގެ ސަރުކާރުން ވަނީ ސްކޫލްތަކާއި، މިސްކިތްތަކާއި ފިހާރަތައް އަދި ރެސްޓޯރެންޓްތައް އޮކްޓޯބަރ މަހުގެ ކުރީކޮޅުން ފެށިގެން ބަންދުކޮށްފައެވެ. ހޯމަ ދުވަހުން ފެށިގެން އިރާނުގެ ވެރިރަށް ތެހެރާން ހިމެނޭ ގޮތަށް 25 ސިޓީއަކަށް ވަދެ ނިކުމެ އުޅުން ވަނީ މަނާކޮށްފައެވެ.

އިރާނުގެ ސްޓޭޓް މީޑިޔާއިން ބުނާގޮތުގައި ކުރިޔަށް އޮތް ދެ ހަފްތާގެ މުއްދަތަށް އިރާން ލޮކްޑައުންކުރުމާއި މެދު ސަރުކާރުން ވަރަށް އަވަހަށް ގޮތެއް ނިންމާނެ އެވެ. އެހެންނަމަވެސް އެކަމުގެ ތަފްސީލެއް ސްޓޭޓް މީޑިޔާއިން ހާމަކޮށްފައެއްނުވެ އެވެ.

އިރާނުގެ ހެލްތު މިނިސްޓްރީގެ ތަރުޖަމާން ސީމާ ސަދާތް ވިދާޅުވީ ފާއިތުވި 24 ގަޑިއިރުތެރޭގައި އިރާނުގައި އަލަށް 8289 މީހަކަށް ވައިރަސް ޖެހިފައިވާ ކަމަށެވެ. މިއާއެކުގައި އިރާނުގައި ވައިރަސް ޖެހުނު މީހުންގެ އަދަދު ވަނީ 628،780ށް އަރާފައެވެ.

އެހެންނަމަވެސް އިރާނުގެ މެޑިކަލް ކައުންސިލްގެ ވެރިޔާ މުހައްމަދު ރިޒާ ޒަފަރްގާންދީ ވަނީ އޮފިޝަލުން ހާމަކުރަމުން ގެންދާ އަދަދުތަކާމެދު ސުވާލު އުފައްދަވާފައެވެ. އަދި އިރާނުގައި މިބަލީގައި އެތައް ބަޔަކު މަރުވަމުންދާ ކަމަށް ވަނީ ވިދާޅުވެފައެވެ.

ޒަފަރްގާންދީ ވިދާޅުވީ އޮފިޝަލުން ކޮވިޑް-19 ޖެހިގެން މަރުވެގެން ރިޕޯޓްކުރަމުންދާ އަދަދުތަކަކީ ހަމައެކަނި ރަޖިސްޓްރީކޮށްފައިވާ ބަލި މީހުންގެ ތެރެއިން މަރުވަމުންދާ މީހުންގެ އަދަދު ކަމަށެވެ. ހޮސްޕިޓަލްތަކާއި ގަބުރުސްތާނުގައި ކަންކަން ހިނގާގޮތް ބަލާ ކުރެވޭ ސަރވޭތަކުން ދައްކާގޮތުގައި އޮފިޝަލުން ހާމަކުރާ އަދަދަށްވުރެ ތިން ގުނަ އިތުރަށް ކޮވިޑް-19 ޖެހިގެން މީހުން މަރުވަމުންދާ ކަމަށް ޒަފަރްގާންދީ ވިދާޅުވިއެވެ.

މެޑިކަލް ކައުންސިލަކީ ސަރުކާރަށް ނިސްބަތްވާ ބައެއް ނޫނެވެ. އެކައުންސިލުން ކުރަމުންދާ މަސައްކަތަކީ ޑޮކްޓަރުންނަށް އެކަމުގެ ލައިސަންސް ދޫކުރުމެވެ.