ޝަހީދު ހުސެއިން އާދަމް ދެއްކެވި ނަމޫނާއަށް މިންނެތް ތައުރީފް ހައްގު: ޑިފެންސް މިނިސްޓަރ
1988 ވަނަ އަހަރުގެ ނޮވެމްބަރު 3 ވަނަ ދުވަހަކީ ދިވެހި ތާރީހުގެ ކަޅު ސޮފްހާއެއް: މާެރިޔާ
ޑިފެންސް މިނިސްޓަރ މާރިޔާ އަހުމަދު ދީދީ
ޝަހީދު ހުސެއިން އާދަމް ދެއްކެވި ނަމޫނާއަށް މިންނެތް ތައުރީފް ހައްގުކަމަށް ޑިފެންސް މިނިސްޓަރ މާރިޔާ ދީދީ ވިދާޅުވެއްޖެ އެވެ.
މިނިސްޓަރ މާރިޔާ މިހެން ވިދާޅުވީ ނަސްރުގެ ދުވަހާ ގުޅިގެން އެކަމަނާ ނެރުއްވި ހިތާބުގައެވެ. މިނިސްޓަރ މާރިޔާ ވިދާޅުވީ 1988 ވަނަ އަހަރުގެ ނޮވެމްބަރު 3 ވަނަ ދުވަހަކީ ދިވެހި ތާރީހުގެ ކަޅު ސޮފްހާއެއް ކަމަށާއި، ޝަހީދު ކޯޕްރަލް ހުސެއިން އާދަމް ފަދަ އަބްތޯލުން ދެއްކެވި ހިތްވަރާއި ކެރުމުގެ މަތިވެރި ނަމޫނާއަށް މިންނެތް ތައުރީފު ހައްގުކަމަށެވެ. މީގެ އިތުރުން މާރިޔާ ވަނީ އެދުވަހު އާންމު ރައްޔިތުން ދެއްކެވި ހިތްވަރާއި ސާބިތުކަމަށް ތައުރީފު ވިދާޅުވެފައެވެ. އަދި ހަމައެހެންމެ އެދުވަހު އަވަށްޓެރި އިންޑިއާއިން އެދުވަހު ވެދެއްވި އެހީތެރި ކަމަށް މާރިޔާ ވަނީ ޝުކުރު ދަންނަވާފައެވެ.
މާރިޔާ އިތުރަށް ވިދާޅުވީ ރައީސް ސޯލިހް ސަރުކާރުން ސިފައިންގެ ގާބިލުކަން އިތުރުކުރުމަށް ވަރަށް ބޮޑު އިސްކަމެއް ދެއްވާ ކަމަށެވެ. އަދި އެދުވަހާއި އަޅާބަލާއިރު މިއަދު ގައުމީ ދިފާއީ ބާރުގެ ގާބިލްކަމާއި ވަސީލަތްތައް އެތައް ގުނައެއް ފުޅާވެފައިވާ ކަމަށް މާރިޔާ ވިދާޅުވިއެވެ.
1988 ވަނަ އަހަރުގެ ނޮވެމްބަރު 3 ވަނަ ދުވަހަކީ، ދިވެހިންގެ ތެރެއިން ބަޔަކާއި، ބޭރުގެ ބަޔަކާއި ގުޅިގެން ރާއްޖޭގެ މިނިވަންކަމާއި، ވެރިކަން ހޯދުމަށް އުދުވާނީ ހަމަލާއެއް ދިން ދުވަހެވެ. ނަމަވެސް ދިވެހި ރައްޔިތުންނާއި ސިފައިން އެދުވަހުގެ އުދުވާނީ ހަމަލާވަނީ ފެއިލް ކޮށްލާފައެވެ. އެދުވަހު 19 ދިވެހިން ވަނީ މިގައުމުގެ މިނިވިންކަމާއި އިސްލާމް ދީނުގެ ދިފާއުގައި ޝަހީދުވެފައެވެ.
