އަލީ ހުސެއިން ފުލުހަށް ހާޒިރުވާން އަންގައިފި
27 އެޕްރީލު 2017 | ބުރާސްފަތި 15:12އަލީ ހުސެއިން މިވަގުތު ހުންނެވީ މާލެއަކު ނޫން
ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން
ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ފުލުހުންގެ އިދާރާއަށް ހާޒިރުވުމަށް އަންގައިފި އެވެ.
ރާއްޖެއެމްވީއަށް މައުލޫމާތު ދެއްވަމުން އަލީ ހުސެއިން ވިދާޅުވީ ބަލަމުންދާ މައްސަލައަކާ ގުޅިގެން ފުލުހަށް ހާޒިރުވުމަށް އެންގުމަށްޓަކައި އޭނާއަށް ފޯނުން ގުޅި ކަމަށާއި އެހެން ނަމަވެސް މިވަގުތު ރަށުން ބޭރުގައި ހުރި ކަމަށް ދެންނެވި ކަމަށެވެ.
އެނބުރި މާލެ ދާނެ ދުވަހެއް ފުލުހުންނަށް އަންގާފައިވާ ކަމަށާއި ފުލުހަށް ހާޒިރު ކުރަނީ ކޮން މައްސަލައަކާއި ގުޅިގެން ކަމެއް އަދި ސާފުނުވާ ކަމަށް އަލީ ހުސެއިން ވިދާޅުވި އެވެ.
ސިޔާސީ ޕާޓީ ތަކުގެ އެކި ފަރާތްތައް ފުލުހަށް ހާޒިރުކޮށް ސުވާލު ކުރަމުންދާއިރު ބައެއް ބޭފުޅުންނަށް ގެންދަވަނީ ޝަރީއަތް ހިންގަމުންނެއެވެ. އެގޮތުން ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒާއި ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ މައްޗަށް ގެންދަނީ ފުލު ފުލުގައި ޝަރީއަތް ހިންގަމުންނެއެވެ.
މީގެ އިތުރުން ދިއްގަރު ދާއިރާގެ މެމްބަރު ފާރިސް މައުމޫނުވެސް ތަފާތު އެކި ފަހަރު މަތިން ފުލުސް އޮފީހަށް ހާޒިރުކޮށް ވަނީ ސުވާލުކޮށް އަދި އޭނާގެ މައްޗަށް ދައުވާ ކުރުމަށް ވަނީ ޕީޖީއަށްވެސް ފޮނުވާފައެވެ.
ސަރުކާރަށް ފާޅުކަން ބޮޑު ގޮތެއްގައި އަލީ ހުސެއިން ގެންދަވަނީ ފާޑު ކިޔަމުންނެއެވެ.
