އައިސީއެމްއަކީ އެކައުންޓިން ދާއިރާއިން މީހުން ބިނާކުރަން ލިބުނު އިތުރު ބާރެއް: ޑރ. އިބްރާހިމް ހަސަން

އިންސްޓިޓިއުޓް އޮފް ޗާޓަރޑް އެކައުންޓަންޓްސް އޮފް ދި މޯލްޑިވްސް (އައިސީއެމް) އުފެދިގެން އައުމަކީ އުފެދިގެން އައުމަކީ އެކައުންޓިން ދާއިރާއިން ޕްރޮފެޝަނަލް މީހުން ބިނާކުރުމަށާއި މަތީ ތައުލީމުގެ ފެންވަރު ކަށަވަރު ކުރުމަށް ކުރަމުން އަންނަ މަސައްކަތަށް އިތުރު ބާރެއް ލިބިގެންދާނެ މުހިންމު ކަމެއް ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވެއްޖެއެވެ.

މިނިސްޓަރު އެހެން ވިދާޅުވީ، ހޯމަ ދުވަހު އައިސީއެމްގެ ރައީސް ހަސަން ޒިޔަތް އަދި އެ އިންސްޓިޓުއުޓްގެ ބައެއް ކައުންސިލް މެމްބަރުންނާއިއެކު ބޭއްވެވި ބައްދަލުވުމުގައެވެ.

މިނިސްޓްރީން ބުނީ، އެކައުންޓިންގް ކޮލިފިކޭޝަންތައް ވެލިޑޭޓް ކުރުމަށް މޯލްޑިވްސް ކޮލިފިކޭޝަން އޮތޯރިޓީއާއިއެކު މަސައްކަތްތައް ތަރުތީބުކޮށްގެން ވީއެންމެ އަވަހަކަށް ކުރިއަށް ގެންދިއުމަށާއި، ދާއިރާއިން މީހުން ތަމްރީނު ކުރުމަށް ބޭނުންވާ އަދަދުތައް އިންސްޓިޓިއުޓްގެ މަސައްކަތުގެ ތެރެއިން ފާހަގަވާނަމަ މިނިސްޓްރީ އޮފް ހަޔަރ އެޑިޔުކޭޝަންއާއި ހިއްސާކުރުން ވަރަށް މުހިންމު ކަމަށް ޑރ. އިބްރާހިމް ވިދާޅުވި ކަމަށެވެ.

މަތީ ތައުލީމާއި ތަމްރީނުގެ ލޯން ސްކީމަށް ހުޅުވާލާއިރު އެކަމަށް ރިއާޔަތްކޮށް މި ދާއިރާއިން މީހުން ބިނާކުރުމަށް އިސްކަން ދެވޭނެކަން މިނިސްޓަރު ފާހަގަކުރެއްވި ކަމަށް ހަޔަރ އެޑިއުކޭޝަނުން ބުންޏެވެ. އެކައުންޓިންގގެ ދާއިރާއަކީ މިހާރުވެސް ނެޝަނަލް ސްކިލް ޝޯޓޭޖް ލިސްޓްގައި ހިމެނިފައިވާ ދާއިރާއެކެވެ.

ޗާޓަރޑް އެކައުންޓެންޓުންގެ ގާނޫނުގެ ދަށުން އުފައްދަން ޖެހޭ ''އިންސްޓިޓިއުޓް އޮފް ޗާޓަރޑް އެކައުންޓަންޓްސް އޮފް ދި މޯލްޑިވްސް'' އުފައްދާފައި ވަނީ ސެޕްޓެމްބަރު މަހުއެވެ.