އައްޑޫ އެވޯޑް: ޚަބަރާއި މައުލޫމާތު ފެތުރުމުގެ ދާއިރާއިން ހިތްވަރު ދިނުމުގެ އިނާމު ރާއްޖެޓީވީގެ ރިޒްނާއަށް
ޖުމްލަ 18 ފަރާތަކަށް ހިތްވަރު ދިނުމުގެ އެވޯޑް ލިބިފަވޭ
ޚަބަރާއި މައުލޫމާތު ފެތުރުމުގެ ދާއިރާއިން ހިތްވަރު ދިނުމުގެ އިނާމު ރިޒްނާ ޒަރީރާ ހަވާލުކުރަނީ
ޚަބަރާއި މައުލޫމާތު ފެތުރުމުގެ ދާއިރާއިން ހިތްވަރު ދިނުމުގެ އިނާމު ރާއްޖެޓީވީގެ އެސިސްޓެންޓް މެނޭޖާ އޮފް ބިޒުނަސް ޑިވެލޮޕްމެންޓް ރިޒްނާ ޒަރީރަށް ލިބިއްޖެއެވެ.
ރިޒްނާ ނޫސްވެރިކަމުގެ ދާއިރާގައި މަސައްކަތްކުރާތާ މިހާރު 10 އަހަރުވެއްޖެ އެވެ. ރިޒްނާ ރާއްޖެޓީވީއާ ގުޅުނީ 2011 ވަނަ އަހަރު އެވެ. ހަބަރު ލިޔުމުގެ އިތުރަށް ރިޒްނާއަކީ ޕްރޮގްރާމު އުފެއްދައި، ހުށަހަޅައިދީ އަދި ހަބަރު ކިޔަމުން އަންނަ ހުނަރުވެރި ނޫސްވެރިޔެކެވެ.
ރިޒްނާ ވިދާޅުވީ މިފަދަ އެވޯޑެއް ލިބުމުން ނޫސްވެރިކަމުގެ ދާއިރާގައި ކުރާ މަސައްކަތުގެ އަގު ވަޒަން ކުރާކަން މިއަދު އިޙްސާސް ކުރެވިއްޖެކަމަށެވެ. ރައްޔިތުންނަން ހިދުމަތް ކުރުމަށްޓަކައި ނޫސްވެރިކަމުގެ ދާއިރާއިން ކުރިއަށް ދިއުމަށް ހިތްވަރު ލިބިގެން ހިގައްޖެ ކަމަށް 2007 ވަނަ އަހަރު ނޫސްވެރިކަމުގެ ދާއިރާއަށް ނުކުންނެވި ރިޒްނާ ވިދާޅުވިއެވެ.
" ވަރަށް އުފާވި އެވޯޑް ލިބުމުން، އެވޯޑް ލިބުނީމަ އެނގުނީ އަގުވަޒަން ކުރާކަން، ހިތްވަރާއެކު މި ދާއިރާއިން ކުރިއަށް ދާނަން" ރިޒްނާ ވިދާޅުވިއެވެ.
އައްޑޫ ސިޓީ ކައުންސިލުން ހުކުރު ދުވަހުގެ ރޭ ހިތަދޫ ޝަރަފުއްދީން ސްކޫލްގައި "އައްޑޫ އެވޯޑް 2016" ނަމުގައި ބޭއްވި ޖަލްސާގައި، ތަފާތު އެކި ދާއިރާތަކުން 100 އަށް ވުރެ ގިނަ ފަރާތްތަކަށް އިނާމު ދިނެވެ. ހިތްވަރު ދިނުމުގެ އިނާމު 18 ފަރާތަކަށް ލިބުނުއިރު ޚިދުމަތުގެ އިނާމު 31 ފަރާތަކަށް އަދި މަތީ ވަނަތަކާއި ހާފިޒްކަން ހާސިލްކުރައްވާފައިވާ ފަރާތްތަކަށާއި އައްޑޫ ސިޓީއަށް ޝަރަފާއި ރީތި ނަން ހޯދައިދީފައިވާ ފަރާތްތަކަށް ވެސް އިނާމު ދިނެވެ.
ހިތްވަރު ދިނުމުގެ އެވޯޑް ހާސިލް ކުރި ފަރާތައް
- ދަނޑުވެރިކަމުގެ ދާއިރާއިން: މީދޫ މުޙައްމަދު ވާޙީދު
- ސިއްޙީ ދާއިރާއިން: ހިތަދޫ ފާތިމަތު އަޙުމަދު، އާއިޝަތު ރަޝީދާ
- ކީރިތި ޤުރުއާން އުނގަންނައި ދިނުމާއި ކީރިތި ޤުރުއާންގެ އިލްމުގެ ދާއިރާއިން: ހިތަދޫ މަރްޔަމް އަބްދުﷲ، މަރަދޫ އަބްދުލް އަޒީޒް އަޙުމަދު
- ތައުލީމީ ދާއިރާއިން: މަރިޔަމް ލަތީފާ
- އިޖްތިމާޢީ ހިދުމަތުގެ ދާއިރާއިން : ހުސެއިން ޙަބީބް
- ތިމާވެށި ހިމާޔަތް ކުރުމުގެ ދާއިރާއިން: މުހައްމަދު ކާމިލް
- މަސްވެރިކަމުގެ ދާއިރާއިން: އިބްރާހިމް ޝަފީގް
- ހަބަރާއި މައުލޫމާތު ފެތުރުމުގެ ދާއިރާއިން : ޝިމްލާ އަހުމަދު، ރިޒްނާ ޒަރީރު
- ވިޔަފާރިއާއި އިގްތިސާދުގެ ދާއިރާއިން : މޫސާ ފަތުޙި
- ކުޅިވަރުގެ ދާއިރާއިން : މަރްޔަމް ޙަމީދާ ، އަލީ ޝިހާބު
މަތީދަރަޖައިގެ އިނާމު
- ކުޑަކުދިންގެ ހާއްސަ ޑޮކްޓަރު އަހްމަދު ސައީދު
- ރޭޑިއޮލޮޖިސްޓް ޑރ. އިބްރާހިމް ރަޝީދު
ޝަރަފުވެރިކަމުގެ އިނާމު
- އިޖުތިމާއީ ދާއިރާ: މަރަދޫ ޖަވާހިރުމާގޭ، އަބްދުއްލަތީފް މުހައްމަދު
- އިޖުތިމާއީ ދާއިރާ: ހިތަދޫ ތަމްޕާޕޫލްމާގޭ، އައިޝަތު ފާއިޒާ
- އިޖުތިމާއީ ދާއިރާ: ހިތަދޫ ފެހިވިލާގޭ، އަހްމަދު ސޯލިހް އަލިދީދީ
- ތައުލީމީ ދާއިރާ: މީދޫ ހަސަންކާރިގޭ ޑރ. އަހްމަދު އަންވަރު
- ކުޅިވަރުގެ ދާއިރާ: ފޭދޫ ކުދިމާގޭ އަބްދުﷲ މުފީދު
- ދިވެހިބަހާއި އަދަބިއްޔާތުގެ ދާއިރާ: ހިތަދޫ ، ކެމީ، ހަސަން ލަބީބު
- ސިއްހީ ދާއިރާ: ފޭދޫ ދިލްކަޝްވިލާ، އިބްރާހިމް ހަލީލް
- ކީރިތި ގްރުއާން ކިޔަވައިދިނުމާއި އުނގަންނައި ދިނުމާއި ގްރުއާނުގެ އިލްމުގެ ދާއިރާ: ހިތަދޫ އިހްރާމްގޭ މަރިޔަމް ސަމީރާ
މަތީ ދަރަޖައިގެ ޝަރަފުވެރި އިނާމު ލިބިވަޑައިގެންފައިވަނީ ޑރ. ހަސަން އުގައިލަށެވެ.
