ފްލެޓް ލިބުނު ފަރާތްތަކަށް ފައިސާ ދެއްކޭނެ ނިޒާމެއް ގާއިމް ކުރުމަށް މައުމޫން ފެކްޝަނުން ގޮވާލައިފި
ވީހާވެސް އަވަހަކަށް ފްލެޓް ލިބުނު ފަރާތްތަކަށް ފްލެޓަށް ވެދެވޭނެ ގޮތް ހަދައި ދޭން ޖެހޭ
އަރަބިއްޔާ ހުރި ބިމުގައި ހަދާފައިވާ ފްލެޓް
"ވެށި ފަހި މާލެ" ޕްރޮގްރާމްގެ ދަށުން ފްލެޓް ލިބުނު ފަރާތްތަކަށް ފައިސާ ދެއްކޭނެ ގޮތުގެ ހަރުދަނާ ނިޒާމެއް އެކުލަވާލައި، އެ ނިޒާމުގެ ތެރެއިން ލުއިފަސޭހަ ގޮތަކަށް ރައްޔިތުންނަށް ފައިސާ ދެއްކޭނެ ގޮތެއް ހަމަޖައްސައި ދިނުމަށް ރައީސް މައުމޫން ފެކްޝަނުން ގޮވާލައިފިއެވެ.
ރައީސް މައުމޫން ފެކްޝަންގެ ނައިބް ރައީސް އާމިނަތު ނާދިރާ ސޮއި ކުރއްވާ ހައުސިން މިނިސްޓަރު ޑރ މުހައްމަދު މުއިއްޒު އަށް ފޮނުވި ސިޓީގައި ބުނެފައި ވަނީ ވެށިފަހި މާލެ ޕްރޮގްރާމް ގެ ދަށުން މާލެއިން ފްލެޓް ލިބޭ ފަރާތްތަކަށް، ފްލެޓް ލިބިފައިވާކަމުގެ ލިޔުން ދީފައިވާ ފަރާތްތަކަކީ މި ޕްރޮގްރާމްގެ ދަށުން އެކަމަށް ޝަރުތު ހަމަވާ ފަރާތްތައް ކަމަށް ދެކޭ ކަމަށެވެ.
ސިޓީގައި ބުނެފައި ވަނީ މި ޕްރޮގްރާމަށް ޝަރުތު ހަމަވެފައިވަނީ އެ ފަރާތަތަކުގެ މާލީ ހާލަތާއި އަދި ދިރިއުޅުމުގެ ހާލަތު ދެނެގަތުމައް ފަހު ހޮވާފައިވާ ފަރާތްތައް ކަމަށާއި ނަމަވެސް ހުރިހާ މަރުޙަލާތަކެއް ނިމި، ފްލެޓް ލިބޭނެކަމުގެ ލިޔުން ލިބިފައިވާ ފަރާތްތަކަށް ފްލެޓް ހަވާލު ކުރެވޭނީ ދެ މިލިޔަން ރުފިޔާ ދެއްކޭނެ ފަރާތްތަކަށް ކަން މިނިސްޓްރީން އަންގާފައިވާ ކަަމަށެވެ.
ރައީސް މައުމޫން ފެކްޝަނުން މިނިސްޓަރު މުއިއްޒު އަށް ފޮނުވި ސިޓީގައި ބުނެފައިވާ ގޮތުގައި ފްލެޓަށް އެދި ފޯމު ހުށަހަޅާ އަދި ފްލެޓް ލިބޭނެކަމުގެ ލިޔުން ލިބުނުއިރު މިކަހަލަ މާލީ ބޮޑެތި އަދަދުތަކެއް އެއްފަހަރާ ދައްކަން ޖެހޭނެ ކަމަށް އެނގިފައި ނުވާއިރު، މި ފަދަ ބޮޑު އަދަދެއް ދެއްކުމަށް ލޯނެއް ނެގުމަކަށް މިފަރާތްތަކުގެ މާލީ ތަނަވަސްކަން ނެތްކަން ފާހަގަވާ ކަމަށް ސިޓީގައި ބުނެފައިވެއެވެ.
ބުނެފައިވެއެވެ. މީހާ ކުއްލި ގޮތަކަށް މިހާ ބޮޑު އަދަދެއްގެ ފައިސާ ދެއްކުމަށް އެންގުމަކީ ބޮޑު މާޔޫސް ކަމެއް ގެނުވައި އިތުރު ތަކުލީފުތަކަކާއި ކުރިމަތި ލާން ޖެހުނު ކަމެެއް ކަަމަށް މައުމޫން ފެކްޝަނުން ހައުސިން މިނިސްޓަރު މުއިއްޒު އަށް ފޮނުވި ސިޓީގައި ބުނެފައިވެއެވެ،
މީގެއިތުރުން ސިޓީގައި ބުނެފައި ވަނީ ޕީ.ޕީ.އެމް ގެ ސަރުކާރު އައީ ރައްޔިތުންނަށް ގެދޮރު ނެތުމުގެ ދަތިކަން ފިލުވައިދީ، ގެދޮރުގެ ތަނަވަސްކަން އިތުރު ކުރުމަށް މަސައްކަތް ކޮށްދޭނެކަމުގެ ވަޢުދުތަކަކާއި އެކުގައި ކަމަށެވެ.
އެ ގޮތުން، ގެދޮރު ނެތުމުގެ ނިކަމެތިކަން އެންމެ ބޮޑަށް ތަޖުރިބާ ކުރާ ޢާއިލާތަކަށް ގެދޮރު ހޯދައިދިނުމާއި، ދައުލަތުގެ ބަޖެޓުން ފައިސާ ޖަމާކޮށްދޭ ހައުސިންގް ފައިނެންސް ފަންޑެއް ޤާއިމުކޮށް، އެ ވަސީލަތް ދަމަހައްޓައި، 2007 ވަނަ އަހަރު ތަޢާރަފް ކުރެވުނު ލުއިލޯނު ދޫކުރުމުގެ ނިޒާމު ހަރުދަނާކޮށް، ދަށް އިންޓަރެސްޓް ރޭޓެއްގައި ހައުސިންގް ލޯނު ލިބޭނެ ގޮތް ހަދައި، އެ ލޯނު ލިބޭނެ ގޮތް ފުޅާކޮށް ، ހައުސިންގް ސަބްސިޑީސް ނިޒާމެއް ޤާއިމުކޮށް، ހޯމް ސްޓްރަކްޗަރ ލޯން ސްކީމެއް ތަޢާރަފް ކުރުން ފަދަ އެތައް ކަމެއް ޕީ.ޕީ.އެމް ރިޔާސީ އިންތިޚާބުގެ ވަޢުދުތަކުގައި ހިމެނޭ ކަަމށް އެ ސިޓީގައި ބުނެފައިވެއެވެ.
އެހެން ކަމުން ފައިސާ ދެއްކޭނެ ގޮތުގެ ހަރުދަނާ ނިޒާމެއް އެކުލަވާލައި، އެ ނިޒާމުގެ ތެރެއިން ލުއިފަސޭހަ ގޮތަކަށް ރައްޔިތުންނަށް ފައިސާ ދެއްކޭނެ ގޮތެއް ވިހާވެސް އަވަހަކަށް އެކުލަވާލައްވައި ފްލެޓް ލިބިފައިވާ ފަރާތްތަކަށް އެ ފްލެޓްތަކުގައި ވީ އެންމެ އަވަހަކަށް ދިރިއުޅެން ފެށޭނެ ގޮތެއް ހަމަޖައްސަވައި ދެއްވުމަށް ޕާޓީގެ ރައީސް މައުމޫން އަބްދުލް ގައްޔޫމް އެދިވަޑައިގަންވާ ކަމަށް ސިޓީގައި ބުނެފައިވެއެވެ.
