ކޮވިޑް-19 ޖެހޭ މީހުންގެ އަދަދު ޔޫރަޕްގައި ފާއިތުވި ފަސް ހަފްތާގައި ދެގުނަ އަށް އިތުރުވެ އެސަރަހައްދުގައި ވައިރަސް ޖެހުނު މީހުންގެ އަދަދު 10 މިލިއަނަށް އަރައިފި އެވެ.

މިދިޔަ މަހު އޭޝިޔާ އަދި ލެޓިން އެމެރިކާގައި ވަނީ ކޮވިޑް-19 ޖެހުނު މީހުންގެ އަދަދު 10 މިލިއަނަށް އަރާފައެވެ. އެމެރިކާއިން އެކަނި 9 މިލިއަން މީހުންނަށް ވަނީ ކޮވިޑް-19 ޖެހިފައެވެ.

ޔޫރަޕްގެ ސަރަހައްދުގައި ފަސް މިލިއަން މީހުންނަށް ވައިރަސް ޖެހެން 9 މަސް ދުވަސް ނެގިއެވެ. އެހެންނަމަވެސް ފާއިތުވި މަސް ދުވަސްތެރޭގައި ޔޫރަޕްގެ ހާލަތު ގޯސްވެ އެމަސްދުވަސްތެރޭގައި ފަސް މިލިއަން މީހުންނަށް ވަނީ ކޮވިޑް-19 ޖެހިފައެވެ.

ޔޫރަޕަކީ ދުނިޔޭގެ އާބާދީގެ 10 އިންސައްތަ ހިއްސާކުރާ ހިސާބެކެވެ. އެހެންނަމަވެސް މުޅި ދުނިޔެއިން ކޮވިޑް-19 ޖެހިފައިވާ 46.3 މިލިއަން މީހުންގެ 22 އިންސައްތަ ޔޫރަޕުން ހިއްސާކުރެއެވެ. އެސަރަހައްދުން މިބަލީގައި 269،000 ށް ވުރެ ގިނަ މީހުން ވަނީ މަރުވެފައެވެ. މިއީ މުޅި ދުނިޔެއިން މިބަލީގައި މަރުވި 1.2 މިލިއަން މީހުންގެ 23 އިންސައްތަ އެވެ.

ޔޫރަޕްގެ ސަރަހައްދަށް މިހާރު ސަރޖެއް އައިސްފައިވާއިރު ފްރާންސް، ޖަރމަން އަދި އިނގިރޭސިވިލާތުން ވަނީ އަލުން ލޮކްޑައުން އަކަށް ދާނެކަން އިއުލާންކޮށްފައެވެ. ޕޯރޗުގަލް އިން އެއް ބައި ލޮކްޑައުން ކޮށްފައިވާއިރު ސްޕެއިން އަދި އިޓަލީން އަންނަނީ ފިޔަވަޅުތައް ވަރުގަދަ ކުރަމުންނެވެ.

ރޮއިޓަރސްގެ އެނަލަސިސް ދައްކާގޮތުގައި ފާއިތުވި ހަތް ދުވަހު ޔޫރަޕުން 1.6 މިލިއަން މީހުންނަށް ވަނީ ވައިރަސް ޖެހިފައެވެ. މިއީ ހަމަ އެމުއްދަތުގައި މުޅި ދުނިޔެއިން ވައިރަސް ޖެހުނު 3.3 މިލިއަން މީހުންގެ ދެބައިކުޅަ އެއްބައެވެ. އެމުއްދަތުގައި ޔޫރަޕްގައި 16،100 މީހުން ވަނީ މިބަލީގައި މަރުވެފައެވެ.

ރޮއިޓަރސްގެ އެނަލިސިސް ބުނާގޮތުން ޔޫރަޕްގެ ކޮންމެ 10،000 މީހަކުން 127 މީހުންނަށް ވައިރަސް ޖެހެ އެވެ. އަދި ކޮންމެ 10،000 މީހަކުން 4 މީހުން މަރުވެ އެވެ. އެމެރިކާގައި ކޮންމެ 10،000 މީހަކުން 278 މީހަކަށް ވައިރަސް ޖެހެ އެވެ. އަދި ހަތް މީހުން މަރުވެއެވެ.

ޔޫރަޕަށް ބަލާއިރު އިރުމަތީ ޔޫރަޕުގައި ހިމެނޭ ގައުމުތަކުން މުޅި ޔޫރަޕްގައި ވައިރަސް ޖެހިފައިވާ މީހުންގެ ތިން ބައިކުޅަ އެއްބައި ހިއްސާކުރެ އެވެ. އަދި ދެކުނު ޔޫރަޕްގެ ގައުމުތަކުން މުޅި ޔޫރަޕްގައި މިބަލީގައި މަރުވި މީހުންގެ 32 އިންސައްތަ ހިއްސާކުރެ އެވެ.

އިރުމަތީ ޔޫރަޕްގައި ހިމެނޭ ގައުމުތަކުގެ ތެރެއިން ރަޝިޔާއަކީ އެންމެ ހާލަތު ގޯސް ސަރަހައްދެވެ. ރަޝިޔާއިން ކޮވިޑް-19 ޖެހުނު މީހުންގެ އަދަދު ވަނީ 1.6 މިލިއަނަށް އަރާފައެވެ.

ޔޫރަޕަށް ދެ ވަނަ ވޭވެއް އައިސްފައިވާއިރު ވައިރަސް ފެތުރުން ކޮންޓްރޯލްކުރުމަށް އަޅަމުންދާ ފިޔަވަޅުތަކާއި އެކިކަންކަމާމެދު ޔޫރަޕްގެ އެކި ގައުމުތަކުގައި މަޝްވަރާ ނުކުރެވި، ވައިރަސްގެ ދެވަނަ ވޭވަށް ރަނގަޅަށް ތައްޔާރުނުވުމުގެ ސަބަބުން ގިނަ ފާޑުކިޔުންތަކެއް ވަނީ އަމާޒުވެފައެވެ.