ބަންގްލަދޭޝްގެ މަސައްކަތްތެރިންނަށް ރައްކާތެރި މާހައުލެއް ކަށަވަރު ކޮށްދޭން އެދިއްޖެ
29 އޮކްޓޯބަރު 2020 | ބުރާސްފަތި 11:18ކޮވިޑުގެ ސަބަބުން އެންމެ ބޮޑަށް ހާލުގައި ޖެެހުނީ ރާއްޖޭގައި މަސައްކަތްކުރާ ބަންގްލަދޭޝްގެ މީހުން
ރާއްޖޭގައި މަސައްކަތްކުރާ ބިދޭސީންތަކެއް
ރާއްޖޭގައި މަސައްކަތްކުރާ ބަންގްލަދޭޝް ރައްޔިތުންނަށްރައްކާތެރި ވަޒީފާގެމާހައުލެއް ކަށަވަރު ކޮށްދިނުމަށް އެ ގައުމުގެ ސަރުކާރުން އެދިއްޖެއެވެ.
އެކަމަށް އެދިވަޑައިގެންނެވީ ބަންގްލަދޭޝްގެ ފޮރިންގ މިނިސްޓަރު ޑރ. އޭކޭ އަބްދުލް މޮމެން އާއި ރާއްޖެ އިން ބަންގްލަދޭޝް އަށް ކަނޑައަޅުއްވާފައި ހުންނަވާ ސަފީރު އައިޝަތު ޝާން ޝާކިރުއާއި އެކު ބުދަ ދުވަހު ބޭއްވި ބައްދަލުވުމެއްގައެވެ.
ބަންގްލަދޭޝްގެ މަސައްކަތްތެރިންގެ ހައްގުތައް ރައްކާތެރި ކުރުމުގެ ގޮތުން، ވަޒީފާ އަށް މީހުން ގެނައުމުގައި ހުރިހާ ކަމެއް ބަންގްލަދޭޝްގެ ސަރުކާރުން ހުއްދަ ދީފައިވާ ކުންފުނިތައް މެދުވެރިކޮށް ކުރިއަށް ގެންދިއުމަށް، ޑރ މޮމެން ވަނީ އެދިވަޑައިގެންފައެވެ. ހައި ކޮމިޝަނަރު ޝާން ވަނީ ބަންގްލަދޭޝްގެ ރައްޔިތުން ރާއްޖޭގައި ކުރާ މަސައްކަތްތަކުގެ އަގުވަޒަން ކުރައްވާފައެވެ.
ދެ ބޭފުޅުންގެ ދެމެދު ބޭއްވި ބައްދަލުވުމުގައި ބަންގްލަދޭޝްގެ ފޮރިންގ މިނިސްޓަރު ވިދާޅުވީ، ރާއްޖެއަކީ ބަންގްލަދޭޝްގެ ގާތް އެކުވެރި އެއް ކަމަށެވެ. އަދި ދެ ގައުމު ގުޅިގެން ކުރިއަށް އޮތް ތަނުގައި އިތުރަށް މަސައްކަތް ކުރައްވަން ބޭނުންފުޅުވާ ކަމުގެ ޝައުގުވެރިކަން އޭނާ ވަނީ ފާޅުކުރައްވާފައެވެ. ކޮވިޑް-19 ގެ ހާލަތާއި ގުޅިގެން ބަންގްލަދޭޝް އިން ވަނީ 100 ޓަނުގެ ކާބޯތަކެއްޗާއި، ބޭހުގެ ސާމާނުގެ އިތުރުން ސިއްހީ އާލާތްތައް ރާއްޖެ އަށް ފޮނުވާފައެވެ. އަދި އެ ގައުމުގައި ތާށިވެފައި ތިބި 71 ދިވެހިން ބަންގްލަދޭޝްގެ އެއަރ ފޯސްގައި ރާއްޖެއަށް ވަނީ ގެނެސްފައެވެ.
ރާއްޖޭގައި މަސައްކަތްކުރާ ބަންގްލަދޭޝްގެ މަސައްކަތްތެރިންނަށް ރައްކާތެރި މާހައުލެއް ހޯދައި ދިނުމަށް އެ ގައުމުގެ ފޮރިންގ މިނިސްޓަރު އެދިވަޑައިގެންފައިވާއިރު، ކޮވިޑް-19 ގެ ހާލަތާއި ގުޅިގެން އޭގެ އެންމެ ބޮޑު އެއް އަސަރެއް ކުރީ ރާއްޖޭގައި މަސައްކަތް ކުރާ ބަންގްލަދޭޝްގެ މީހުންނަށެވެ. އެއް ތަނެއްގައި ގިނަ އަދަދެއްގެ ބިދޭސީން ތޮއްޖެހިގެން ދިރިއުޅުމުގެ ސަބަބަން އެ މީހުންގެ ތެރޭގައި ހަލުވިމިނެއްގައި ކޮވިޑް ފެތުރިގެން ދިޔައެވެ.
ބިދޭސީންނަށް ރަނގަޅު ގޮތްތަކެއް ހޯދައި ދިނުމުގެ މަގްސަދުގައި ސަރުކާރުގެ އިތުރުން ރެޑް ކްރެސެންޓް ފަދަ އަމިއްލަ ޖަމިއްޔާތަކުން ދަނީ މުހިއްމު މަސައްކަތްތަކެއް ގުޅީފަޅު ގައި ބިދޭސީންނަށް ހާއްސަކޮށްގެން ''ވޯކާސް ވިލެޖް'' އެއް ހަދަމުންނެއެވެ. ސަރުކާރުގެ އަމާޒަކީ ކުރިއަށް އޮތް ތަނުގައި މާލޭގައި މަސައްކަތްކުރާ ބިދޭސީން ޑިއުޓީ ނިންމާލުމަށްފަހު ތިބޭ ތަނަކަށް އެތަން ހެދުމެވެ.
