ގާޒީ މަރިޔަމް ވަހީދާ މެދު ސުޕްރީމް ކޯޓުން ނިންމި ނިންމުމަކީ ފަނޑިޔާރުންނަށް ދެއްވި ނުރައްކާތެރި އިންޒާރެއް: އެމްޑީޕީ

ސިވިލް ކޯޓުގެ ގާޒީ އަލްއުސްތާޒާ މަރިޔަމް ވަހީދު ރާއްޖޭގެ އެއްވެސް ކޯޓެއްގައި ގާޒީކަން ކުރެއްވުމުގެ ހައިސިއްޔަތު ސުޕްރީމް ކޯޓުން ނިގުޅައިގަނެފައިވުމަކީ ރާއްޖޭގައި މުސްތަގިއްލުކަމާއެކު ފަނޑިޔާރުކަންކުރައްވާ ފަނޑިޔާރުންނަށް ދެއްވި ނުރައްކާތެރި އިންޒާރެއްކަމަށް އެމްޑީޕީން ބުނެފި އެވެ.

ސިވިލް ކޯޓުގެ ގާޒީ އަލްއުސްތާޒާ މަރިޔަމް ވަހީދު ރާއްޖޭގެ އެއްވެސް ކޯޓެއްގައި ގާޒީކަން ކުރެއްވުމުގެ ހައިސިއްޔަތެއް ނެތް ކަމަށް ސުޕްރީމް ކޯޓުން ނިންމި ނިންމުމާ ގުޅޭ ގޮތުން އެމްޑީޕީން ނެރެފައިވާ ބަޔާނުގައި ވަނީ، ސުޕްރީމް ކޯޓުން އަމަލުކޮށްފައިވާ ގޮތަކީ ރާއްޖޭގައި މިހާތަނަށް އަމަލުކޮށްފައިނުވާ ގޮތަކަށް ކަމަށެވެ. އެމްޑީޕީން ބުނީ ސުޕްރީމް ކޯޓުން އަމަލުކޮށްފައިވަނީ އިންސާފާއި ތަހުޒީބުގެ މައްޗަށް ބިނާވެގެންވާ އެއްވެސް ޤައުމެއްގައި، އަމަލުކުރާ އުސޫލުން ނޫން ކަމަށެވެ.

މިއީ ރާއްޖޭގެ ޤާނޫނު އަސާސީއާއި ޤާނޫނުތަކާއި ބައިނަލްއަޤުވާމީ މުއާހަދާތަކާ ކަނޑައެޅިގެން ޚިލާފަށް ފަނޑިޔާރަކާމެދު އަޅާފައިވާ ފިޔަވަޅެއް ކަމަށް އެމްޑީޕީގެ ބަޔާނުގައިވެ އެވެ.

ސުޕްރީމް ކޯޓުގެ ނިންމުމާ ކަންބޮޑުވުން ފާޅުކުރައްވާ އެމްޑީޕީން ނެރެފައިވާ ބަޔާނުގައި ވަނީ، ގާޒީ މަރިޔަމް ވަހީދަށް ކޯޓުތަކުގައި ގާޒީކަން ކުރުމުގެ ހައިސިއްޔަތު ނެތް ކަން ކަނޑައަޅާފައިވަނީ ބޮޑުމޮހޮރާގެ މައްސަލާގައި އޭނާ ކުރެއްވި ތަންފީޒީ ޙުކުމެއްގެ ސަބަބުންކަމަށެވެ.

އެމްޑީޕީން ވަނީ ގާޒީ މަރިޔަމް ވަހީދާމެދު އެފަދަ ހަރުކަށި ފިޔަވަޅެއް އެޅިގެން ނުވާނޭކަން ހަމާކުރުމުގެ ގޮތުން ހަ ނުކުތާއެއް ފާހަގަކޮށްފަ އެވެ. އެގޮތުން އޭނާ ގެ މައްޗަށް އެއްވެސް ތަހުގީގެއް ހިންގާފައި ނުވާކަމަށާއި، އޭނާއާ މެދު ފިޔަވަޅު އެޅުމަށް ގާނޫނު އަސާސީގައި ބަޔާންކޮށްފައިވާ ޖުޑިޝަލް ސަރވިސް ކޮމިޝަން އަދި ރައްޔިތުންގެ މަޖިލިސްގެ އެއްވެސް ދައުރެއްނެތި، އެފަދަ ނިންމުމެއް ސުޕްރީމް ކޯޓުން ނިންމާފައިވާކަން އެމްޑީޕީން ވަނީ ފާހަގަކޮށްފަ އެވެ.

އަދި ސިވިލް ކޯޓުން އިއްވި ހުކުމުގެ މައްސަލަ ދައުލަތުގެ ފަރާތުން ހައިކޯޓަށް އިސްތިއުނާފަށް ހުށަހެޅުމަށްފަހު ދައުލަތުން އެ މައްސަލަ އަނބުރާ ގެންގޮސްފައިވާއިރު، އެ ކޯޓުން އެންމެ ފުރަތަމަ ނިންމި ތަންފީޒީ މައްސަލަ ވެސް ދައުލަތުން ހައިކޯޓަށް ހުށަހެޅުމަށްފަހު އަނބުރާ ގެންގޮސްފައިވާކަން އެނގެން އޮތް ކަމަށް އެމްޑީޕީން ވަނީ ބުނެފަ އެވެ.

މިކަމާ ގުޅޭ ގޮތުން ސުޕްރީމް ކޯޓުން ނެރުނު އަމުރުގައި ވަނީ، މަރިޔަމް ވަހީދުގެ ކިބައިން ޝަރީއަތްކުރުމުގެ ހައިސިއްޔަތު ނެގީ، ސުޕްރީމް ކޯޓުގެ އަމުރުގައި ބުނެފައިވާ " ވ. ބޮޑުމޮހޮރާ ތަރައްގީ ކުރުމަށް ކުއްޔަށް ދިނުމަށް އެއްބަސްވުމަކަށް ވާސިލުވުމަކީ ސަރުކާރަށް ލިބިފައިވާ އިޚްތިޔާރީ ބާރެއް " ކަމަށް ސުޕްރީމް ކޯޓުން މީގެ ކުރިން ކަނޑައަޅާފައިވަނިކޮށް، ހަތް ދުވަހުގެ ތެރޭގައި އެގްރީމެންޓުގައި ސޮއިކުރުމަށް ލާޒިމްކޮށް މަރިޔަމް ވަހީދު ބުރާސްފަތި ދުވަހު ހުކުމް ކުރައްވާފައިވާތީ ކަމަށެވެ.

މިއީ ފަނޑިޔާރަކު ކުރި ހުކުމަކާ ގުޅިގެން ރާއްޖޭގައި ފަނޑިޔާރަކާމެދު ފިޔަވަޅު އެޅި ފުރަތަމަ ފަހަރެވެ.