އައްޑޫ ސިޓީ ގަން އިންޓަނޭޝަނަލް އެއާޕޯޓުން ބިދޭސީ މަސައްކަތްތެރިންނަށް ފުރޭނެ ގޮތް ހެދުމަށް މަސައްކަތް ކުރަމުން އަންނަ ކަމަށް އިމިގްރޭޝަންއިން ބުނެފިއެވެ.
ރާއްޖެއެމްވީން ކުރި ސުވާލަކަށް ޖަވާބު ދެއްވަމުން އިމިގްރޭޝަންގެ މީޑިއާ އޮފިޝަލް ވިދާޅުވީ މިވަގުތު ގަން އިންޓަނޭޝަނަލް އެއާޕޯޓުން ފުރޭނީ ހަމައެކަނި ދިވެހިންނަށާއި އަދި ފަތުރުވެރިންނަށް އެކަނި ކަމަށެވެ.
ނަމަވެސް ބިދޭސީ މަސައްކަތްތެރިންނަށް ވެސް ގަން އެއާޕޯޓުން ފުރޭނެ އިންތިޒާމް ހަމަޖެއްސުމަށް މަސައްކަތް ކުރަމުން އަންނަ ކަމަށް އޮފިޝަލް ވިދާޅުވިއެވެ. އޭނާ ވިދާޅުވީ ބިދޭސީ މަސައްކަތްތެރިންނަށް ގަން އިންޓަނޭޝަނަލް އެއާޕޯޓުން ފުރޭނެ އިންތިޒާމް ހަމަޖެއްސޭނެ ސީދާ ތާރީހެއް ބުނަން ނެނގޭ ކަމަށާއި ނަމަވެސް ވީއެންމެ އަވަހަށް އެކަން ހަމަޖެއްސުމަށް މަސައްކަތް ކުރަމުން އަންނަ ކަމަށެވެ.
ގަން އިންޓަނޭޝަލް އެއާޕޯޓުން ރަސްމީކޮށް ބައިނައްލަޢުވާމީ ފްލައިޓްތަކުގެ ދަުތުރުތައް ކުރަން ފަށާފައި ވަނީ މިދިޔަ އަހަރުގެ ޑިސެންބަރު އެއް ވަނަ ދުވަހުއެވެ. އެގޮތުން އެންމެ ފުރަތަމަ ގަން އިންޓަނޭޝަނަލް އެއާޕޯޓަށް ދަތުރުތައް ފަށާފައި ވަނީ ސްރީލަންކަން އެއާލައިން އިންނެވެ.
