އެމްޑީޕީގެ ޗެއާޕާސަންގެ މަގާމު ހަސަން ލަތީފް ކަށަވަރުކުރައްވާއިފިއެވެ.

ހުކުރު ދުވަހު މެންދުރު 2:00 އިން އިރުއޮއްސި 6:00 ކުރިއަށްދިޔަ އިންތިހާބުގައި 202 ވޯޓް ފޮށި ބަހައްޓާފައިވާއިރު، ވަގުތީ ނަތީޖާ އިއުލާންކޮށްފައި ވަނީ 150 ވޯޓް ފޮށީގެއެވެ. ބަކީ 52 ވޯޓް ފޮށީގެ ނަތީޖާ އިއުލާނުކުރާނީ ހޮނިހިރު ދުވަހު އެވެ. 

ޗެއާޕާސަންގެ މަގާމު ކަށަވަރުކުރަން މަދުވެގެން 5000 ވޯޓް ހޯދަން ޖެހޭއިރު، މިހާތަނަށް ވަގުތީ ނަތީޖާ އިއުލާނުކޮށްފައިވާ ފޮށިތަކުން ހަސަން ލަތީފަށް 23188 ވޯޓް ލިބިވަޑައިގެންފައިވެ އެވެ. އެ ވޯޓްފޮށިތަކަށް ޖުމުލަ 23404 މީހުން ވޯޓް ލާފައިވެ އެވެ. އޭގެ ތެރެއިން ޗެއާޕާސަން ކަމަށް ހަސަން ލަތީފް އިންތިިހާބު ކުރަން ނުފެންނަ ކަމަށް 160 މީހުން ވޯޓް ދިނެވެ. އަދި ބާތިލް 56 ބާތިލް ވެސް ހިމެނެ އެވެ. 

އެމްޑީޕީގެ އަސާސީ ގަވައިދު ބުނެފައި ވަނީ ޗެއާޕާސަންގެ މަގާމަށް ކުރިމަތިލާ މީހަކު އެމަގާމަށް ހޮވެނީ އެންމެ މަދުވެގެން އެ ޕާޓީގެ މެމްބަރުންގެ ތެރެއިން 5،000 މެމްބަރުންގެ ތާއިދު ލިބުމުންނެވެ.

ޗެއާޕާސަންގެ މަގާމް ހުސްވީ ކުރިން އެމަގާމުގައި ހުންނެވި އަލީ ވަހީދު އިސްތިއުފާ ދެއްވުމުމުނެވެ.

މި އިންތިހާބުގެ ވޯޓްލުން ރާއްޖޭގެ މީހުން ދިރިއުޅޭ ހުރިހާ ރަށެއްގެ އިތުރުން ކޮލަމްބޯގައި ވަނީ ކުރިއަށް ގެންގޮސްފައެވެ. މި އިންތިހާބުގައި ރައީސް މުހައްމަދު ނަޝީދު ވެސް ވަނީ ކޮލަމްބޯގައި ވޯޓް ލައްވާފައެވެ.

މާލޭގައި ދިރިއުޅޭ އެޕާޓީގެ މެމްބަރުން ވޯޓްލުމަށް ޖުމްލަ 7 ވޯޓް ފޮއްޓެއް ބެހެއްޓި އެވެ. 

އެމްޑިޕީގެ ޗެއާޕާސަންގެ ނައިބް އަލީ ނިޔާޒު ރައީސް އަބުދުﷲ ޔާމީންގެ ސަރުކާރުން ސިޔާސީ ހަރަކާތަކުގައި ބައިވެރިވުމަށް ރައްޔިތުންނަން ބިރުދައްކަމުންދާއިރު ވެސް ޗެއާޕާސަންގެ ވޯޓްގައި އެ ޕާޓީގެ ގިނަ އަދަދެއްގެ އާންމު މެމްބަރުން ބައިވެރިވެފައިވާ ކަމަށެވެ. އަދި އައު ޗެއާޕާސަނަކާއި އެކު ޕާޓީގެ ހިންގުން ޙަރުދަނާވާނެ ކަމަށް އެނާ ވިދާޅުވިއެވެ. ޗެއާޕާސަންގެ މަގާމަށް ހޮވުމަށްފަހު އެއްމެ މުހިއްމު އިސްކަމެއް ދެއްވާނީ ހަސަން ވިދާޅުވާގޮތުން ނަމަ ޕާޓީގެ އޮނިގަނޑުގެ ތެރެއިން ކަން ކަން އިންތިޒާމްކޮށް، އިންތިޚާބްތައް ޕާޓީއަށް ކާމިޔާބު ކޮށްދިނުމެވެ. އަދި ޕާޓީގެ ހަރަކާތްތައް އަތޮޅު ތަކުގައި ފޯރި އާއި އެކު ހިންގޭނެ އޮނިގަނޑެއް ގާއިމުކުރުން ކަމަށް ހަސަން ވިދާޅުވިއެވެ. 

 އެމްޑީޕީގެ ޗެއާޕާސަންގެ މަގާމަށް ހަސަން ލަތީފް ކުރިމަތިލެއްވުމުގެ މައިގަނޑު ސަބަބަކީ ސިޔާސީ މަސައްކަތަށް ފަހިވާނެ ގޮތަށް ޕާޓީގެ އިދާރީ ހިންގުން ވަރުގަދަކުރުއްވުން ކަމަށް އޭނާ ވިދާޅުވެއެވެ.

 ހަސަން ލަތީފް ޗެއާޕާސަންގެ މަގާމު ކަށަވަރުކުރުމުން އޭނާއަށް އެޕާޓީގެ މެމްބަރުންދަނީ މަރުޙަބާ ދަންނަވަމުންނެވެ. އެގޮތުން ކުރީގެ ޗެއާޕާސަން އަލީ ވަހީދާއި ކުރީގެ ރައީސް މުހައްމަދު ނަޝީދު ވެސް ވަނީ ހަސަން ލަތީފަށް މަރުޙަބާ ދަންނަވާ ޓްވިޓް ކުރައްވާފައެވެ.

 ޗެއާޕާސަންގެ މަގާމް ހަސަން ލަތީފް ކަށަވަރުކުރުމުން އޭނާ ވަގެންދާނީ އެޕާޓީގެ ފަސް ވަނަ ޗެއާޕާސަނަށެވެ. އެމްޑީޕީގެ އެންމެ ފުރަތަމަ ޗެއާޕާސަނަކީ ކުރީގެ ރައީސް މުހައްމަދު ނަޝީދެއެވެ.