ލެޓިން އެމެރިކާއަށް ފަހު ދުނިޔޭގައި އެންމެ ގިނަ ބަޔަކު ކޮވިޑު ޖެހިގެން މަރުވި ބައްރަކަށް ޔޫރަޕް ވެއްޖެއެވެ.

ރޮއިޓަރސްގެ ޓެލީން ދައްކާގޮތުގައި ހޮނިހިރު ދުވަހު ޔޫރަޕްގައި ވައިރަސް ޖެހިގެން މަރުވި މީހުންގެ އަދަދު ވަނީ 250،000 އަށް ވުރެ މައްޗަށް އަރާފައެވެ. ފާއިތުވި ދެ ހަފްތާގައި ޔޫރަޕްގެ ގައުމުތަކުގައި ކޮވިޑް-19 ޖެހޭ މީހުންގެ އަދަދުތައް ވަނީ އިތުރުވާން ފަށާފައެވެ.

ޔޫރަޕްގައި ދުވާލެއްގެ މައްޗަށް ވައިރަސް ޖެހޭ މީހުންގެ އަދަދު ދެ ލައްކައަށް އަރައިގެން ފުރަތަމަ ފަހަރަށް ރިޕޯޓް ކޮށްފައި ވަނީ ބުރާސްފަތި ދުވަހުއެވެ. ފާއިތުވި ހަފްތާގައި ދެކުނު ޔޫރަޕްގައި ހިމެނޭ ގިނަ ގައުމުތަކަކުން ވަނީ ދުވާލެއްގެ މައްޗަށް އެ ގައުމުތަކުގައި ވައިރަސް ޖެހޭ މީހުންގެ އަދަދު އިތުރުވެފައެވެ.

އެގޮތުން މުޅި ދުނިޔޭގައި ވައިރަސް ޖެހިގެން މަރުވާ މީހުންގެ 19 އިންސައްތަ ހިއްސާކުރަނީ ޔޫރަޕެވެ. އަދި ދުނިޔޭގައި ވައިރަސް ޖެހޭ މީހުންގެ 22 އިންސައްތަ ހިއްސާކުރަނީ ޔޫރަޕެވެ.

އިނގިރޭސިވިލާތް، އިޓަލީ، ފްރާންސް، ރަޝިޔާ، ބެލްޖިއަމް އަދި ސްޕެއިންއަކީ ޔޫރަޕްގައި މި ބަލީގައި ޔޫރަޕުން މަރުވާ މީހުންގެ ތިންބައިކުޅަ ދެބައި ހިއްސާ ގައުމުތަކެވެ. ޔޫރަޕްގައި ވައިރަސް ޖެހިފައިވާ 8 މިލިއަން މީހުން އެބަތިއްބެވެ.

ޔޫރަޕްގެ ގައުމުތަކުގެ ތެރެއިން އެންމެ ގިނަ މީހުން ވައިރަސް ޖެހިގެން މަރުވަމުން އަންނަ ގައުމަކީ އިނގިރޭސިވިލާތެވެ. އެއީ 45،000 މީހުންނެވެ. އެއަށްފަހު އިޓަލީ، ސްޕެއިން، ފްރާންސް އަދި ރަޝިޔާއެވެ.

އިނގިރޭސި ބޮޑުވަޒީރު ބޮރިސް ޖޯންސަން ބުރާސްފަތި ދުވަހު ވިދާޅުވެފައި ވަނީ އެ ގައުމަށް ވައިރަސް ފެތުރުން ކޮންޓްރޯލް ކުރުމަށް ވެކްސިނަށް އެކަނި ބަރޯސާ ނުވެވޭނެ ކަމަށާއި ވައިރަސް ފެތުރުން ކޮންޓްރޯލް ކުރުމަށް އެހެނިހެން ފިޔަވަޅުތައް އަޅަމުން ގެންދާނެ ކަމަށެވެ.

ފާއިތުވި ހަތް ދުވަހު ރަޝިޔާގައި ދުވާލެއްގެ މައްޗަށް 250 މީހުން ވަނީ މިބަލީގައި މަރުވެފައެވެ. އިނގިރޭސިވިލާތާއި ފްރާންސްގައި ދުވާލެއްގެ މައްޗަށް މިބަލީގައި 143 މީހުން ވަނީ ފާއިތުވި ހަތް ދުވަހު މަރުވެފައެވެ.

ދުނިޔޭގައި މިލިއަނަކަށް ވުރެ ގިނަ މީހުންނަށް ވައިރަސް ޖެހިގެން ރިޕޯޓް ކުރި ހަތްވަނަ ގައުމަކަށް ފްރާންސް ވީ ހުކުރު ދުވަހުއެވެ. ފްރާންސަކީ ވައިރަސްގެ ދެވަނަ ވޭވުގެ އަސަރު އެންމެ ބޮޑަށް ކުރަމުންދާ ގައުމު ވެސްމެއެވެ. މިއާއި ގުޅިގެން އެ ގައުމުގައި ވަނީ ކާފިއު ވެސް އިއުލާން ކޮށްފައެވެ.

ރޮއިޓަރސްގެ ޓެލީން ދައްކާގޮތުގައި ފްރާންސްގައި ފާއިތުވި 10 ދުވަހު ޖެހިޖެހިގެން ދުވާލެއްގެ މައްޗަށް ވައިރަސް ޖެހިގެން މަރުވާ މީހުންގެ އަދަދުވަނީ މައްޗަށް ގޮސްފައެވެ.

ސްޕެއިންގައި ވައިރަސް ޖެހިފައިވާ މީހުންގެ އަދަދު މިލިއަނަކަށްވުރެ މައްޗަށް އަރާފައިވާއިރު ފާއިތުވި ހަތް ދުވަހު އެގައުމުގައި ވައިރަސް ޖެހިގެން 136 މީހުން ވަނީ މަރުވެފައެވެ.

ޔޫރަޕްގައި ދެވަނަ ވޭވެއް އައިސްފައިވީ ނަމަވެސް ވައިރަސް އެންމެ ފުރަތަމަ ޔޫރަޕް ބައްރުގައި ފެތުރުނުއިރު ހާލަތު ގޯސްވި ހިސާބަށް އަދި ނުދާކަމަށް ރިޕޯޓްތައް ބުނެއެވެ. ވައިރަސްގެ ދެވަނަ ވޭވެއް އަތުވެދާނެ ކަމުގެ އިންޒާތު ކަމާބެހޭ ފަރާތްތަކުން ދެމުން ގެންދިޔުމާއެކު އެކަމަށް ގިނަ ގައުމުތަކުން ވަނީ ތައްޔާރު ވެސް ވެފައެވެ.