ދުނިޔޭގައި ކޮވިޑް-19 ޖެހުނު މީހުން ދެވަނައަށް އެންމެ ގިނައިން ތިބި ބައްރަކަށް އޭޝިޔާ ވެއްޖެއެވެ.

ރޮއިޓަރސްގެ ޓެލީން ދައްކާ ގޮތުގައި އޭޝިޔާގައި ވައިރަސް ޖެހުނު މީހުންގެ އަދަދު ވަނީ 10 މިލިއަނަށްވުރެ މައްޗަށް ހޮނިހިރު ދުވަހު އަރާފައެވެ. ދުނިޔޭގައި އެންމެ ގިނަ މީހުންނަށް ކޮވިޑް-19 ޖެހިގެން ރިޕޯޓްކުރަމުން އަންނަ ބައްރަކީ ލެޓިން އެމެރިކާއެވެ.

މުޅި ދުނިޔެއަށް ބަލާ އިރު، ކޮވިޑް ބަލި ޖެހިފައިވާ މީހުންގެ ހަތަރު ބައިކުޅަ އެއްބައި ހިއްސާ ކުރަނީ އޭޝިޔާއިންނެވެ. އަދި މި ބަލީގައި އޭޝިއާއިން މަރުވި މީހުންގެ އަދަދު އުޅެނީ 163،000 އަށް ވުރެ މަތީގައެވެ. އެއީ ދުނިޔޭގައި ކޮވިޑް-19 ޖެހިގެން މަރުވި މީހުންގެ 14 އިންސައްތައެވެ.

އޭޝިޔާގައި ކޭސްތައް އިތުރުވީ ނަމަވެސް ފާއިތުވި ހަފްތާތަކުގައި ކޮވިޑް-19 ކޮންޓްރޯލް ވެފައިވާ މިންވަރު ވަނީ އިތުރު ވެފައެވެ. އަދި ދުވާލެއްގެ މައްޗަށް އޭޝިޔާގައި ވައިރަސް ޖެހޭ މީހުންގެ އަދަދުތައް ޔޫރަޕާއި ނޯރތް އެމެރިކާ ބައްރަށް ވުރެ ދަށެވެ.

އޭޝިޔާގައި އެންމެ ގިނަ މީހުންނަށް ވައިރަސް ޖެހިގެން ރިޕޯޓް ކުރަމުން އަންނަ ގައުމަކީ އިންޑިޔާއެވެ. އެ ގައުމުގައި ދުނިޔޭގައި ވައިރަސް ޖެހުނު މީހުންގެ 21 އިންސައްތަ ހިއްސާ ކުރާ އިރު މަރުވި މީހުންގެ 12 އިންސައްތަ ހިއްސާ ކުރެއެވެ.

އިންޑިޔާއަކީ އެމެރިކާ ނެގުމަށްފަހު ދެވަނަ އަށް އެންމެ ގިނަ މީހުންނަށް ވައިރަސް ޖެހިގެން ރިޕޯޓް ކޮށްފައިވާ ގައުމެވެ. އެހެން ނަމަވެސް އިންޑިޔާގައި ދުވާލެއްގެ މައްޗަށް ވައިރަސް ޖެހޭ މީހުންގެ އަދަދު މިހާރު ވަނީ ކުރިޔާ އަޅާ ބަލާ އިރު ދަށްވެފައެވެ. އިންޑިޔާއިން މިހާރު ދުވާލެއްގެ މައްޗަށް 57،000 އަށް ވުރެ ގިނަ މީހުންނަށް ވައިރަސް ޖެހެއެވެ.

އިންޑިޔާގައި ކޮވިޑް-19 ޖެހިފައިވާ 7.8 މިލިއަން މީހުން ތިބިއިރު އެމެރިކާގައި ވައިރަސް ޖެހިފައިވަނީ 8.5 މިލިއަން މީހުންނަށެވެ. އިންޑިޔާގައި ދުވާލެއްގެ މައްޗަށް ކޮވިޑް-19 ޖެހޭ މީހުންގެ އަދަދު ދަށަށްދާން ފަށާފައިވީ ނަމަވެސް ކުރިޔަށް އޮތް ފިނި މޫސުމާއި ޗުއްޓީ ދުވަސްވަރާއި ދިމާކޮށް އަނެއްކާ ވެސް އެ ގައުމުގައި ކޭސްތައް އިތުރުު ވެދާނެ ކަމަށް ކަމާބެހޭ މާހިރުން އަންނަނީ ބުނަމުންނެވެ.

އިންޑިޔާއަށް ފަހު އޭޝިޔާގައި ދެވަނައަށް އެންމެ ގިނަ މީހުންނަށް ކޮވިޑް-19 ޖެހިގެން ރިޕޯޓް ކުރަމުން އަންނަ ގައުމަކީ ބަންގްލަދޭޝްއެވެ. އެ ގައުމުގައި 400،000 މީހުންނަށް ވަނީ މިހާތަނަށް އައިއިރު ވައިރަސް ޖެހިފައެވެ. އެހެންނަމަވެސް ޖުލައި މަހުގެ ޕީކާއި އަޅާ ބަލާ އިރު އެ ގައުމުގައި ދުވާލެއްގެ މައްޗަށް ވައިރަސް ޖެހޭ މީހުންގެ އަދަދު މިހާރު ވަނީ ހާހެއްގައި ހިފެހެއްޓިފައެވެ.

ސައުތުއީސްޓް އޭޝިޔާ ސަރަހައްދަށް ބަލާއިރު ފިލިޕީންސް އާއި އިންޑޮނޭޝިޔާގައި ވައިރަސް ޖެހިފައިވާ މީހުންގެ އަދަދު ވަނީ 370،000 އަށް ވުރެ މައްޗަށް އަރާފައެވެ. އެ ސަރަހައްދުގައި އެންމެ ގިނަ މީހުންނަށް ވައިރަސް ޖެހިގެން ރިޕޯޓް ކުރަމުން އަންނަނީ މި ދެ ގައުމުންނެވެ.

އޭޝިޔާގައި ވައިރަސް ޖެހޭ މީހުންގެ އަދަދު އިތުރު ނަމަވެސް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ބުނެފައި ވަނީ ވައިރަސް ފެތުރުން ކޮންޓްރޯލް ކުރުމަށް ޔޫރަޕާއި ނޯރތް އެމެރިކާ ސަރަހައްދުން އޭޝިޔާ ސަރަހައްދު މިސާލެއްގެ ގޮތުގައި ބަލަންޖެހޭ ކަމަށެވެ.