މި ސީޒަނުގެ އިނގިރޭސި ޕްރިމިއާ ލީގުގައި އެސްޓަން ވިލާ ބަލިކުރި ފުރަތަމަ ޓީމަކަށް ލީޑްސް ޔުނައިޓެޑް ވެއްޖެއެވެ.

މި ސީޒަނުގެ ލީގުގައި ވިލާއިން ހުރިހާ މެޗަކުން މޮޅުވެ ދަމަހައްޓަމުން އައި ރިކޯޑަށް ނިމުން އައީ ހުކުރު ދުވަހުގެރޭ އަމިއްލަ ދަނޑުގައި ލީޑްސް އަތުން 3-0 ގެ ނަތީޖާއަކުން ބަލިވުމުންނެވެ.

ވިލާގެ ދަނޑުގައި ކުޅުނު މި މެޗުގައި ލީޑްސްއިން މޮޅު ކުޅުމެއް ދެއްކި ނަމަވެސް، މެޗުގެ ފުރަތަމަ ހާފުގައި ލަނޑެއް ފެނިފައެއް ނުވެއެވެ. އެގޮތުން މެޗުގައި މޮޅު ކުޅުމެއް ދެއްކި ލީޑްސްގެ ފޯވާޑް ޕެޓްރިކް ބަމްފޯޑާއި ރޮޑްރީގޯ މޮރޭނޯއަށް ވަނީ ފުރަތަމަ ހާފުގައި ލަނޑު ޖަހަން ގިނަ ފުރުސަތުތަކެއް ލިބި ބޭކާރުވެފައެވެ. މި ހާފުގައި ލަނޑެއް ޖެހުމާ އެންމެ ގާތަށް ޖެހިލީ ވިލާގެ ކެޕްޓަން ޖެކް ގްރީލިޝްއެވެ. އެކަމަކު އޭނާ ފޮނުވާލި ބޯޅަ ލީޑްސްގެ ލޫކް އޭލިން ވަނީ ގޯލުގެ ރޮނގުމަތިން ސަލާމަތްކޮށްފައެވެ.

މި މެޗުގައި ލީޑްސްއިން ލީޑު ނަގާފައިވަނީ ދެވަނަ ހާފު ފަށައިގެން 10 ވަނަ މިނެޓުގައެވެ. މި ލަނޑު ޖެހީ މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ބަމްފޯޑެވެ. އަދި މެޗުގެ 67 ވަނަ މިނެޓުގައި ބަމްފޯޑް ލީޑްސްއަށް ލީޑު ފުޅާކޮށްދިންއިރު، އޭނާ ވަނީ މެޗުގެ 74 ވަނަ މިނެޓުގައި އިތުރު ލަނޑެއް ޖަހާ މެޗުގައި ހެޓްރިކް ހަދާފައެވެ.

މި މޮޅާއެކު 16 އަހަރަށްފަހު ޕްރިމިއާ ލީގަށް އަލުން ޕްރޮމޯޓުވި ލީޑްސް އޮތީ ތާވަލުގެ ތިންވަނައިގައި ހަ މެޗުން 10 ޕޮއިންޓާއެކުއެވެ. އަދި މެޗުން ބަލިވި ވިލާ އޮތީ ތާވަލުގެ ދެވަނައިގައި ފަސް މެޗުން 12 ޕޮއިންޓާއެކުއެވެ. ތާވަލުގެ އެއްވަނައިގައި ފަސް މެޗުން 13 ޕޮއިންޓް ހޯދައިގެން އޮތީ އެވަޓަނެވެ.