ކ. މާލެ
|
24 ފެބްރުއަރީ 2017 | ހުކުރު 23:53
ލަނޑު ޖެހުމަށްފަހު މާޒިޔާ ކުޅުންތެރިން އުފާފާޅުކުރަނީ
ލަނޑު ޖެހުމަށްފަހު މާޒިޔާ ކުޅުންތެރިން އުފާފާޅުކުރަނީ
އިމޭޖަސް.އެމްވީ
މާލޭ ލީގު
މާލޭ ލީގު: އަސައްކޮގެ ލަނޑުން އީގަލްސް ބަލިކޮށް ފުރަތަމަ ތިން ޕޮއިންޓް މާޒިޔާ އަށް
ލީގުގައި ކުޅޭ ދެވަނަ މެޗުގައި ނިކުންނާނީ ވިކްޓްރީ ސްޕޯޓްސް ކްލަބް އަދި ކްލަބް ގްރީން ސްޓް

މާލޭ ލީގުގައި އަސަދުﷲ އަބްދުﷲ (އަސައްކޮ) ގެ ލަނޑުން ކްލަބް އީގަލްސް ބަލިކޮށް ލީގުގެ ފުރަތަމަ ތިން ޕޮއިންޓް މާޒިޔާ ސްޕޯޓްސް އެންޑް ރެކްރިއޭޝަނުން ހޯދައިފި އެވެ.

ހުކުރު ދުވަހު ހަވީރު ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ އީގަލްސް އެވެ. އެގޮތުން އެޓީމަށް ވަނީ ލަނޑު ޖަހަން ގިނަ ފުރުސަތުތަކެއް ލިބިފައެވެ.

ފުރަތަމަ ހާފްގައި މާޒިޔާ އަށް ވެސް ލީޑު ނެގުމަށް ފުރުސަތުތަކެއް ލިބުނުއިރު، އީގަލްސްގެ ކީޕަރު ސުޖަން ޕެރޭރާ ވަނީ އެ ހަމަލާތައް ދިފާއުކޮށްފައެވެ. ފުރަތަމަ ހާފް ނިމުނީ 0-0 ގެ ނަތީޖާއިން ދެ ޓީމު އެއްވަރުވެގެންނެވެ.

ދެވަނަ ހާފް ފެށިގެން މާޒިޔާ އިން ވަނީ އެޓީމުގެ ފޯމޭޝަނަށް ބަދަލުތަކެއް ގެނެސްފައެވެ. އެގޮތުން އެޓީމުން ދިޔައީ އީގަލްސްގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތުތައް ހޯދަމުންނެވެ.

މާޒިޔާ އިން މެޗުގެ ލީޑު ނެގީ 53 ވަނަ މިނެޓުގައެވެ. މި ލަނޑު މުހައްމަދު އުމެއިރުގެ އެހީތެރިކަމާއެކު ކާމިޔާބުކޮށްދިނީ އަސަދުﷲ އަބްދުﷲ އެވެ. މި ލަނޑަށްފަހުވެސް މާޒިޔާ އަށް ލީޑު ފުޅާކުރުމަށް ވެސް ފުރުސަތުތައް ލިބުނެވެ.

މި ނަތީޖާއާއެކު މާޒިޔާ އޮތީ ކުޅުނު އެއް މެޗުން ލިބުނު ތިން ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. ލީގުގައި ކުޅޭ ދެވަނަ މެޗުގައި ހޮނިހިރު ދުވަހު ވެލެންސިއާ އާއި ނިއުރޭޑިއަންޓް ސްޕޯޓްސް ކްލަބް ބައްދަލުކުރަން ޖެހިފައިވީ ނަމަވެސް، ވެލެންސިއާ އޭއެފްސީ ކަޕަށް އިންޑިއާ އަށް ފުރަން ޖެހުމުން އެ މެޗު ވަނީ ފަސްކޮށްފައެވެ. އެގޮތުން ލީގުގައި ކުޅޭ ދެވަނަ މެޗަށް ވެގެންދާނީ ވިކްޓްރީ ސްޕޯޓްސް ކްލަބް އަދި ކްލަބް ގްރީން ސްޓްރީޓެވެ.

އެންމެ ފަހުން އަޕްޑޭޓް ކުރީ: 2 ދުވަަސް ކުރިން
ރިވިއު ކުރީ: އަލީ ޔޫސުފް
- ކޮމެންޓް