ލަންކާއިން ކޮވިޑް ޖެހުނު މީހުންގެ އަދަދު 6000 އިން މައްޗަށް

ސްރީ ލަންކާއިން ކޮވިޑް-19 އަށް ޕޮޒިޓިވްވި މީހުންގެ އަދަދު 6287 އަށް އަރައިފިއެވެ.

ބުރާސްފަތި ދުވަހު އެކަނި ވެސް ވަނީ 309 މީހަކު ޕޮޒިޓިވްވެފައެވެ. ޕޮޒިޓިވްވި މީހުންގެ ތެރޭގައި ހިމެނެނީ ޕެލިޔާގޮޑާ ފިޝް މާކެޓުން ޕޮޒިޓިވްވި 188 މީހުންނާއި ކަރަންޓީން ސެންޓަރުތަކުން ޕޮޒިޓިވްވި ދެ މީހަކާއި، ކްލޯސް ކޮންޓެކްޓުވި 97 މީހެއް އަދި ކަޓުނާޔަކައިން ޕޮޒިޓިވްވި 22 މީހަކެވެ.

ލަންކާއިން ކޮވިޑް ޖެހުނު މީހުންގެ ތެރެއިން 3561 މީހެއްގެ ބަލި ވަނީ ފަސޭހަވެފައެވެ.

އޭގެ އިތުރުން، ބުރާސްފަތި ދުވަހު ލަންކާއިން 50 އަހަރުގެ އަންހެނަކު ކޮވިޑް ޖެހިގެން މަރުވުމާ އެކު، އެ ގައުމުން މި ބަލީގައި މަރުވި މީހުންގެ އަދަދު ވަނީ 14 އަށް އިތުރުވެފައެވެ. މީޑިއާ ރިޕޯޓްތައް ބުނާ ގޮތުން، އެ މީހާއަށް ފަރުވާ ދެމުން އައީ ހޮސްޕިޓަލުގެ އައިސީޔޫގައި އެޑްމިޓް ކޮށްގެންނެވެ.

ލަންކާގައި ކޮވިޑް-19 ފެރުތެމުން ދިއުމާއި ގުޅިގެން އެ ގައުމުގެ ސަރުކާރުގެ ބައެއް އޮފީސްތައް ވަނީ ބަންދުކޮށްފައެވެ. މީގެ އިތުރުން ސްކޫލްތަކާއި ޓިއުޝަން ކްލާސްތަކާއި ޔުނިވަރސިޓީތައް ވެސް ވަނީ ބަންދުކޮށްފައެވެ. އެ ގައުމުގެ ހާލަތު ގޯސްވެގެން ގޮސްފައި ވަނީ، ބަލި ކޮންޓްރޯލް ކުރުމުގައި ބޮޑެތި ކުރިއެރުންތަކެއް ހޯދާފައި ވަނިކޮށެވެ.