ނޫސްވެރިކަމުގެ ދާއިރާއަށް އަލަށް ވަންނަ ފަރާތްތަކަށް އަމާޒުކޮށްގެން "ނޫސްވެރިކަމުގެ އަސާސީ ޕްރޮގްރާމް" ގެނަމުގައި މޯލްޑިވްސް މީޑިއާ ކައުންސިލުން ކުރިއަށް ގެންދިޔަ އޮންލައިން ޕްރޮގްރާމް ނިންމާލައިފިއެވެ.
މި ތަމްރީން ޕްރޮގްރާމް ހިންގާފައިވަނީ ދެ ބެޗަކަށް ބަހާލައިގެންނެވެ. ފުރަތަމަ ބެޗު 2020 ސެޕްޓެންބަރު 16ން 2020 ސެޕްޓެންބަރު 21 ގެ ނިޔަލަށް ކުރިއަށް ގެންގޮސްފައިވާއިރު، ޖުމުލަ 59 ދަރިވަރުން މި ތަމްރީން ޕްރޮގްރާމް ފުރިހަމަ ކޮށްފައެވެ.
އަދި ދެވަނަ ބެޗް، 2020 ސެޕްޓެންބަރު 23ން 2020 ސެޕްޓެންބަރު 28 ކުރިއަށް ގެންދިޔައިރު މި ބެޗުގައި ޖުމްލަ 61 ދަރިވަރުން ވަނީ މި ތަމްރީން ޕްރޮގްރާމް ފުރިހަމަ ކޮށްފައެވެ.
މި ތަމްރީން ޕްރޮގްރާމްގެ ސެޝަންތައް ނަގައި ދީފައިވަނީ ނޫސްވެރިކަމުގެ ދާއިރާގައި ގިނަ ދުވަހު މަސައްކަތްކޮށްފައިވާ ތަޖްރިބާ ހުރި ފަރާތްތަކެވެ. މީގެ އިތުރުން ހިއުމަން ރައިޓްސް ކޮމިޝަންސްގެ ފަރާތުންވެސް ސެޝަންތަކެއް ވަނީ ނަގައި ދީފައެވެ.
"ނޫސްވެރިކަމުގެ އަސާސީ ޕްރޮގްރާމް" ނިންމުމުގެ ރަސްމިއްޔާތު ބާއްވާފައިވަނީ 2020 އޮކްޓޫބަރު 14 ދުވަހުގެ ރޭ 20:30 ގައި ޒޫމް މެދުވެރިކޮށް އޮންލައިންކޮށެވެ.
މި ޕްރޮގްރާމް ނިންމުމުގެ ރަސްމިއްޔާތު ޝަރަފު ވެރިކޮށްދެއްވީ ޕްރޮސިކިއުޓަރ ޖެނެރަލް ޙުސައިން ޝަމީމެވެ.
