ރީތިރަށް ރިސޯޓުގެ އެޕްރެންޓިސްޝިޕް ޕްރޮގްރާމް ނިމިއްޖެ

ޒުވާނުންނަކީ ހުނަރުވެރި ބަޔަކަށް ހެދުމުގެ ގޮތުން ވަން އެންޑް އޮންލީ ރީތި ރަށް ރިޒޯޓުން ހިންގި އެޕްރެންޓިސްޝިޕް ޕްރޮގްރާމް ނިންމައި، ޕްރޮގްރާމްގެ ބައިވެރިންނަށް ސެޓްފިކެޓް ދީފިއެވެ.

މިޕްރޮގްރާމްގެ ހުރިހާ ގޮތަކުން އެންމެ މޮޅު ޒުވާނަކަށް ހޮވިފައިވަނީ މުހައްމަދު މިސާލް އެވެ. ޖުމްލަ ހަތް ކުދިން މި ޕްރޮގްރާމް ފުރިހަމަކުރިއިރު، ބައިވެރިންނަށް ސެޓްފިކެޓް ޙަވާލުކޮށްދެއްވީ ހޮޓެލް ޖެންގައި ބޭއްވި ރަސްމިއްޔާތެއްގައި އެޑިއުކޭޝަން މިނިސްޓަރ ޑރ. އާއިޝަތު ޝިހާމެވެ

ފަތުރުވެރިކަމުގެ ސިނާއަތުގެ ވަޒީފާތަކަށް މުޅިން އަލަށް ވަންނަން ބޭނުންވާ ޒުވާނުން އަހުލުވެރިކުރުވުމަށް ވަން އޮން އެންޑް އޮންލީ ރީތިރަށް ރިސޯޓުން މިދިޔަ އަހަރު ހިންގި ޕްރޮގްރާމްގެ ބައިވެރިން ވަނީ 1 އަހަރު އެރިސޯޓުގައި ހޭދަކޮށް ކަމާ ގުޅޭ އެކި ދާއިރާތަކުން ތަމްރީނު ހޯދާފައިވެއެވެ.

އެޕްރެންޓިސްޝިޕް ޕްރޮގްރާމްގައި ބައިވެރިވި ފަރާތްތަކަށް ސެޓްފިކެޓް ދިނުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން އެޑިއުކޭޝަން މިނިސްޓަރ ޑރ. އާއިޝަތު ޝިހާމް ވިދާޅުވީ، ކޮންމެ ޒުވާނަކީ ހުނަވެރިވި ޒުވާނަކަށް ހަދައި ޒުވާނުން ބާރުވެރިކުރުވާއި އެމީހުންނަށް ވަޒީފާގެ ފުރުސަތުތައް ފަހިކޮށްދިނުމަކީ ސަރުކާރުގެ ވަރަށް ބޮޑު އަމާޒެއް ކަމަށެވެ. އެގޮތުން 94،000 ވަޒީފާ މިފަސް އަހަރުގެ ތެރޭގައި އުފެއްދުމަށް ވެވަޑައިހެންފައިވާ ވައުދު ފުއްދެވުމަށް ކުރަމުންގެންދާ މަސައްކަތަށް ވަން އެންޑް އޮންލީ ރިސޯޓުން ވެދެއްވާ އެހީތެރިކަން ފާހަގަކޮށް އެކަމަށް ޝުކުރުއަދާކުރެއްވި އެވެ. އަދި މިފަދަ ތަމްރީނާއި ތަޖްރިބާ އެހެން ދާއިރާތަކުން ވެސް ކުރިއަށް ގެންދުމަށް އިލްތިމާސްކުރެއްވި އެވެ.

މިރަސްމިއްޔާތުގައި ވާހަކަދައްކަވަމުން ރީތި ރަށް ރިސޯޓުގެ ޖެނެރަލް މެނޭޖަރ ޖޯނލޫކް ނަރެޓް ވިދާޅުވީ، އެ ރިސޯޓުން ވަޒީފާ ދިނުމުގައި އެންމެ ބޮޑު އިސްކަމެއް ދެއްވަނީ ތަމްރީނު ލިބިފައި ތިބި ޒުވާނުންނަށް ކަމަށާއި މި ޕްރޮގްރާމް ފުރިހަމަ ކުރި ފަރާތްތަކުގެ ތެރެއިން ބައެއް ފަރާތްތަކަށް އެރިސޯޓުން ވަޒީފާގެ ފުރުޞަތު މިހާރު ދެއްވާފައިވާ ކަމަށެވެ. އަދި އެންމެ ހާއްސަ އެއް ކަމަކީ މިފަދަ ޕްރޮގްރާމެއް މެދު ނުކެނޑީ ކާމިޔާބުކަމާ އެކު ކުރިއަށްގެންދެވި މިދާއިރާއަށް ޒުވާނުން ތަމްރީން ކުރުމަށް ކުރަމުންދާ މަސައްކަތުގައި ސަރުކާރާއި އެކި އެކި ފަރާތްތަކުން ފޯރުކޮށްދޭ އެހީތެރިކަން ކަމަށް ޖޯނލޫކް ވިދާޅުވި އެވެ.

އެއް އަހަރުގެ މުއްދަތަށް ރީތި ރަށް ރިސޯޓުގައި ކުރިއަށް ގެންދިޔަ މި ޕްރޮގްރާމްގައި، ވަޒީފާގެ މައިދާނުގައި އެކަކު އަނެކަކަށް އިޙްތިރާމްކުރުމާއި، ގަޑިއަށް ފަރުވާތެރިވުމާއި، ލީޑަރޝިޕާއި، އެންމެނާ ގުޅިގެން މަސައްކަތްކުރުމުގެ ހުނަރާއި ތަމްރީނު މި ޕްރޮގްރާމްގެ ބައިވެރިންނަށް ދީފައިވާ ކަމަށް ރިސޯޓުން މައުލޫމާތު ދެއްވާފައި ވެއެވެ.

މި ޕްރޮގްރާމްގެ ބައިވެރިން ބުނީ، މިއީ ފަތުރުވެރިކަމުގެ ދާއިރާއަށް މުޅިން އަލަށް ގުޅެން ބޭނުންވާ ފަރާތްތަކަށް ވަރަށް މުހިންމު ޕްރޮގްރާމެއް ކަމަށެވެ. މިއީ ރީތިރަށް ރިސޯޓުން ކުރިއަށް ގެންދިޔަ މިފަދަ 6 ވަނަ ޕްރޮގްރާމެވެ.