އެމްއައިޓީޑީސީ ކޮރަޕްޝަން: ސިޔާސީ ބޭފުޅުން ރުއްސަން ސީއެސްއާރުން ޕީޕީއެމްއަށް 200،000 ޑޮލަރު، ހައި ކޯޓުގެ ބޭފުޅުން ރުއްސުމަށް ޖިމެއް!
ޕީޕީއެމް އޮފީހަށް ދެ ލައްކަ ޑޮލަރު ހަރަދުކުރި
އެމްއައިޓީޑީސީގެ ކުރީގެ މެމްބަރުން އެސްއޯއީ ކޮމިޓީއަށް ހާޒިރުކުރުން
ރައީސް ޔާމީންގެ ދައުރުގައި ކުރީގެ އެމްޓީޑީސީގެ ބޯޑުން ސިޔާސީ ބޭފުޅުންނާއި ހައި ކޯޓުގެ ބޭފުޅުން ރުއްސުމަށް އެމްއައިޓީޑީސީ ސީއެސްއާރު މެދުވެރިކޮށް ފައިސާ ދައުރު ކުރީ ވުޒާރާތަކުގެ އިސްވެރިން އެކަން ކުރުމަށް އެންގުމުން ކަމަށް އެ ކުންފުނީގެ ކުރީގެ މެމްބަރުން ވިދާޅުވެއްޖެއެވެ.
ޓުއަރިޒަމް ޑިވިލޮޕްމަންޓްގެ ޕްރޮޖެކްޓަށް ޖުމަލް 40 ފަރާތަކުން 3.5 މިލިއަން ޑޮލަރު ނަގާފައިވާއިރު އެ ފައިސާ ކުންފުނީގެ އެހެނިހެން ބޭނުންތަކަށް ހަރަދު ކުރި މައްސަލައާއި ގުޅިގެންނެވެ. މަޖިލީހުގެ އެސްއޯއީ ކޮމިޓީގައި ކުންފުނީގެ ކުރީގެ ބޯޑު މެމްބަރުންނާއި ވަނީ ސުވާލު ކޮށްފައެވެ.
ކޮމިޓީގެ ބައްދަލުވުމުގައި ސީއެސްއާރް ފައިސާގެ ގޮތުގައި ސިޔާސީ ޕާޓީ ޕީޕީއެމްއަށް 200،000 ޑޮލަރު ހަރަދު ކުރީ ކޮން އުސޫލަކުންތޯ އަދި ހައި ކޯޓުގައި ޖިމެއް ގާއިމް ކުރަން އެމްއައިޓީޑީސީގެ ސީއެސްއާރުން ހަރަދު ކުރީ ކޮން އުސޫލަކުންތޯ ކުރި ސުވާލުތަކަށް ކުރީގެ ބޯޑް މެމްބަރުންނަށް ޖަވާބުދާރީއެއް ނުވެވުނެވެ. ބޯޑް މެމްބަރު ޝަކީބާ ހުސައިން ވަނީ ހައި ކޯޓުގައި ޖިމް ސެޓަށް ފައިސާ ދެއްކިންތޯ ކުރި ސުވާލަށް، އެއީ ޓުއަރިޒަމް މިނިސްޓްރީގެ އެންގުމަށް އެމްއައިޓީޑީސީން ސީއެސްއާރު ފަންޑުން ކުރި ކަމެއް ކަމެއްގައި ވިދާޅުވެފައެވެ.
އުސޫލުތަކާއި ގަވާއިދުތަކާއި ހިލާފަށް، ކުންފުންޏަކީ ވަކި ޝަހްސިއްޔަތެއް ކަމަށް ކޮމިޓީގެ މުގައްރިރު މެމްބަރު އިލްޔާސް ލަބީބް ވިދާޅުވުމުން ވެސް ކުރީގެ ބޯޑް މެމްބަރުންނަށް ޖަވާބެއް ނުދެވުނެވެ. ތަކުރާރުކޮށް، ވިދާޅުވަމުން ދިޔައީ އެއިރު މަސައްކަތް ކުރެއްވީ ވަރަށް ޗެލެންޖިންގް މާހައުލެއްގައި ކަމަށާއި، ސީއެސްއާރުން އެގޮތަށް ފައިސާ ހަރަދުކުރެއްވީ، ޓުއަރިޒަމް މިނިސްޓްރީގެ އެންގުމަކަށް ކަމަށެވެ. އަދި، އަމަލު ކޮށްފައިވަނީ، ފިނޭންސް މިނިސްޓްރީއާއި އެޓާރނީ ޖެނެރަލްގެ އޮފީހާއިި ރައީސް އޮފީހުން އަންގާ ގޮތަށް ކަމަށް ކުރީގެ މެނޭޖިންގ ޑިރެކްޓަރ މުހައްމަދު ޝާހިދު ވިދާޅުވިއެވެ. ގިނަ ސުވާލުތައް ކުރިމަތިވެ ޖަވާބުގައި ހަނދުމަފުޅުނެތް ކަމަށް ވިދާޅުވުމާއި ގުޅިގެން ގިނަ މެމްބަރުން ކަންބޮޑުވުން ފާޅުކުރެއްވިއެވެ.
އަދި، ކުރީގެ ބޯޑް މެމްބަރުން ދެއްކެވި ވާހަކައާއި ގުޅިގެން މެމްބަރުން ވަނީ އެމްއައިޓީޑީސީއަކީ ކޮރަޕްޝަންގެ ފައިސާ ދައުރުކުރުމަށް އުފެއްދި ހަބެއްގެ ގޮތުގައި ވިދާޅުވެ، ކުންފުނީގެ މެންޑޭޓެއް އޮވެ އެއަށް އަމަލު ނުކޮށް ވަކި މުއައްސަސާއަކުން އަންގާ ގޮތަށް ގޮތް ނިންމުމަކީ ރަނގަޅު ގޮތް ނޫންކަމަށް ވިދާޅުވެފައެވެ. މިކަމާއި ބޯޑް މެމްބަރުން އެއްބަސްވިކަމުގައިވިނަމަވެސް، ޕީޕީއެމް އަށް ހަަރަދު ކުރީ ކޮން ބޭފުޅަކު އަންގަވައިގެން ކަމެއް އެއްވެސް ބޯޑް މެމްބަރަކު ހަނދުމަފުޅަކު ނެތެވެ.
ނަަމަވެސް ޕީޕީއެމް އޮފީހަށް ހަރަދުކުރަން ބޯޑް ރިސޮލިއުޝަނެއް ފާސްކޮށްފައިވާއިރު، މިއީ އެންމެ ރަނގަޅުގޮތްތޯ ސުވާލުކުރުމުން ބޯޑު މެމްބަރުން ވަނީ އެކަމަށް ލިޔުމުން ޖަވާބު ދެއްވާނެ ކަމަށެވެ. ކޮމިޓީ ބައްދަލުވުމުގައިި ބައިވެރިވެވަޑައިގެންނެވީ، ކުރީގެ މެނޭޖިންގ ޑިރެކްޓަރ މުހައްމަދު ޝާހިދު، ކުރީގެ ބޯޑުގެ ޗެއަރޕާސަން ފާތިމަތު ރިޝްފާ، ބޯޑް މެމްބަރު ފާތިމަތު ސޮބާހާ އަދި ބޯޑް މެމްބަރު ޝަކީބާ ހުސައިންއެވެ.
2016 ވަނަ އަހަރު އުފެދުނު އެމްއައިޓީޑީސީ އިން މިހާތަނަށް ފަށާފައި ވަނީ އެންމެ ދެ ޕްރޮޖެކްޓެވެ. އެއީ ބަރެސްދޫ ޕްރޮޖެކްޓާއި ކާށިދޫ ޓޫރިސްޓް ވިލެޖް މަޝްރޫއެވެ. ކުންފުނީގެ މެނޭޖިން ޑިރެކްޓަރު މުހައްމަދު ރާއިދު ވިދާޅުވީ މިހާތަނަށް ބެލި ބެލުމުން އެކުންފުނި 25 މިލިއަން ރުފިޔާއަށް ދަރާފައިވާ ކަމަށެވެ.
ކުރިއަށް އޮތް ދެ މަސް ދުވަހުގެ ތެރޭގައި އެ މަސައްކަތް އަލުން ފެށުމަށް މަސައްކަތް ކުރަމުންދާ ކަމަށް ރާއިދު ވިދާޅުވިއެވެ. އަދި ކުރިން ފައިސާ ދެއްކި ފަރާތްތަކުން އެ ޕްރޮޖެކްޓާއެކު ކުރިއަށް ދާން ބޭނުންނަމަ އެ ފުރުސަތު ވެސް އޮންނާނެ ކަމަށް އޭނާ ވިދާޅުވިއެވެ.
