ފުލުހުންގެ މުއައްސަސާ ވަނީ ސިޔާސީ ނުފޫޒުގައި ކަސްތޮޅު އެޅުވިފައި: ޑރ. ޑީޑީ

ފުލުހުންގެ މުއައްސަސާ ވަނީ ސިޔާސީ ނުފޫޒުގައި ކަސްތޮޅު އެޅުވިފައިކަމަށާއި، އެ މުއައްސަސާއިން ނިންމާ ގިނަ ނިންމުންތަކަކީ ޤާނޫނާއި ހިލާފު ނިންމުތަކަކަށްވެގެންދާ ކަމަށް އެމްޑީޕީގެ ކުރީގެ ރައީސް ޑރ. އިބްރާހިމް ދީދީ ވިދާޅުވެއްޖެ އެވެ.

ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން ޑރ. ޑީޑީ ވިދާޅުވީ ރައީސް އަބްދުﷲ ޔާމީންގެ ސިޔާސީ ނުފޫޒުން ފުލުހުންގެ މުއައްސަސާ ކަސްތޮޅު އެޅުވިފައިވާ ކަމަށެވެ. އަދި ފުލުހުންގެ މުޅި މުއައްސަސާވެސް އޮތީ ސިޔާސީ ނުފޫޒާއި ބާރުވެރިކަމުގެ ތެރޭގައި ކަމަށް ޑރ. ޑީޑީ ވިދާޅުވި އެވެ. އޭނާ ވިދާޅުވީ ފުލުހުންގެ މުއައްސަސާއަކީ ރައީސް އަބްދުﷲ ޔާމީން ބޭނުންފުޅު ވާގޮތަށް އަމުރުތައް ނެރޭ ތަނެއް ކަމަށެވެ. އަދި އެ މުއައްސަސާއިން އިތުރުކަމެއް ކުރާ މަންޒަރު ނުފެންނަ ކަމަށް ޑރ. ޑީޑީ ވިދާޅުވި އެވެ.

"ރައީސް އަބްދުﷲ ޔާމީންގެ އަމަލުފުޅުތައް ހުރިގޮތުން މުޅި ފުލުހުންގެ މުއައްސަސާގެ އަގު މިވަނީ ވެއްޓިފަ." އިބްރާހިމް ދީދީ ވިދާޅުވި އެވެ.

ރައީސް މައުމޫނު އަބްދުއް ޤައްޔޫމް ޕީޕީއެމްގެ މެމްބަރުންނާއި ބައްދަލުކުރުމަށް ފުލުހުންގެ މުއައްސަސާއިން ހުރަސްއެޅި އެޅުން ފާހަގަކޮށް ޑރ. ޑީޑީވިދާޅުވީ އެއީ ފުލުހުން ޤާނޫނު އަސާސީއާއި ހިޔާފަށް ހިންގި ޒަރީމާއެއް ކަމަށެވެ. އޭނާ ވިދާޅުވީ ފުލުުހުންގެ މުއައްސަސާއިން ނިންމާ ކޮންމެ ނިންމުމެއް ވާންޖެހޭނީ ޤާނޫނީ އިމުގެ ތެރެއިން ނިންމާ ނިންމުމަކަށް ކަމަށާއި، އަދި އެކަން ފުލުހުންނަށް މާ ރަނގަޅަށް އެނގިވަޑައިގަންނަވާނެ ކަމަށެވެ.

"ރައްޔިތުންގެ ތެރޭގައި މިހާރު ފުލުހުންގެ މުއައްސަސާއަކަށް އިތުބާރެއް ނެތް. ފުލުހުންގެ މުއައްސަސާ މިއަދު ވަނީ ރައީސް އަބްދުﷲ ޔާމީންގެ ސަރުކާރުގެ ސިޔާސީ ނުފޫޒުގެ ތެރޭގައި ހިސޯރުވެފަ" ޑ.ރ. ޑީޑީ ވިދާޅުވި އެވެ.