ބޯޓްގެ މިލްކުވެރިޔަކު ހޯދުމަށް އިއުލާންކުރީ ސިޔާސީގޮތުން ފިއްތާލުމަށް: މުސްތަފާ
ބޯޓު ރާއްޖެއައިސްފައިވަނީ މީގެ ފަސް އަހަރުކުރިން
ރައްޔިތުންގެ މަޖިލީހުގެ ޖަލްސާއެއްގައި މުސްތަފާ ވާހަކަދައްކަވަނީ
ތިމަރަފުށީ ދާއިރާގެ މެމްބަރު މުހައްމަދު މުސްތަފާގެ މަސްލަހަތު އޮންނަ އާގު ބޯޓެއްގެ މިލްކުވެރިން ހޯދުމަށް އިއުލާންކުރީ، ސިޔާސީ ގޮތުން ދަތިކުރުމަށް ކަމަށް އޭނާ ވިދާޅުވެއްޖެ އެވެ.
މީގެ ފަސް އަހަރުކުރިން ރާއްޖެ އައި، ވެއިޓްނާމްގެ އެގްރި ބޭންކުގެ އާގު ބޯޓްގެ ކްރޫއިންގެ މެދުގައި މައްސަލަތަކެއްޖެހި، އެ މީހުން ހާލުގައި ޖެހުމުން އެ ބޯޓާއި ހަވާލުވެފައިވަނީ ތިމަރަފުށީ ދާއިރާގެ މެމްބަރު މުހައްމަދު މުސްތަފާ އެވެ. އެގޮތުން ބައިނަލްއަޤުވާމީ ކަނޑުގެ ޤާނޫނުތަކުގެ ދަށުން އެ ދުވަސްވަރު ބޯޓުގެ "ފަސްޓް ޕްރައިއޯރިޓީ ޕާޓްނާރ" އެއްގެގޮތުގައި ހަމަޖައްސާފައިވަނީވެސް މުސްތަފާ އެވެ.
ރާއްޖެޓީވީއަށް މައުލޫމާތުދެއްވަމުން މުސްތަފާ ވިދާޅުވީ އެ ބޯޓާއި ހަވާލުވެ ކުރި ހަރަދުގެ ބަދަލުދޭނެ ކަމަށް ވެއިޓްނާމްގެ އެގްރި ބޭންކުން ފުރަތަމަ ބުނި ކަމަށެވެ. އަދި 2012 ވަނަ އަހަރު އެ މައްސަލަ ކޯޓަށް ހުށަހެޅުމުން ބަދަލުގެ ގޮތުގައި 1.8 މިލިއަން ރުފިޔާދޭންޖެހޭ ކަމަށް ކޯޓުން ކަނޑައެޅި ކަމަށް އޭނާ ވިދާޅުވި އެވެ. ކޯޓުގެ އެ ނިންމުން ގަބޫލުކުރާކަން އެގްރި ބޭންކުގެ އޮފިޝަލުން ހާމަކުރި ކަމަށާއި، އަދި ފައިސާ ނުދެއްކެއްޖިނަމަ ބޯޓް ވިއްކާލާނެ ކަމަށްވެސް އެ މީހުން ބުނި ކަމަށް މުސްތަފާ ވިދާޅުވި އެވެ. ނަމަވެސް އެ ފައިސާ ނުދެއްކި އުޅެނިކޮށް، ބޯޓު ނަގިލި ކަނޑައިގެން ގޮސް ހިނގި ކަންތައްތަކުގައި އެ ބޯޓު އެކިތަންތަނުގައި ބަނދަރުކުރުވިކަމަށް މުސްތަފާ ވިދަޅުވި އެވެ. އަދި މިހާރު އޮތްތަނަށް ބޯޓު ގެންދިޔައީ 2013 ވަނަ އަހަރުކަމަށް އޭނާ ވިދާޅުވި އެވެ.
"މައްސަލަ ހައްލެއް ނުވޭ. ހުކުމަކަށް ފައިސާއެއް ނުލިބޭ. މިތާ ކޯޓަކުން ހުކުމް ތަންފީޒްކުރެވޭ ގޮތެއް ނުވި،" މުސްތަފާ ވިދާޅުވި އެވެ.
ތިމަރަފުށީ ދާއިރާގެ މެމްބަރު މުސްތަފާގެ މަސްލަހަތު އޮންނަ އާގު ބޯޓު ތިލަފުށީ ބަނދަރުގައި -- ފޮޓޯ: ޓުވިޓަރ
މުސްތަފާ ވިދާޅުވީ ބޯޓާމެދު ކަންތައްތައް ކުރާނެ ގޮތަކާމެދު މަޝްވަރާކުރުމުގެ ކަންތައްތައް ކުރިއަށްގެންދަނިކޮށް، ބޯޓުގެ މިލްކުވެރިޔަކު ހޯދުމަށް ކުއްލިއަކަށް ދައުލަތުން އިއުލާންކުރި ކަމަށެވެ. އެއީ މިލްކުވެރިޔަކު ނެތި އުޅޭ ބޯޓެއް ނޫން ކަމަށާއި، ތިލަފުށީ ކޯޕަރޭޝަންގެ ބޭފުޅުންނަށްވެސް އެ ބޯޓަކީ މުސްތަފާ މަސްލަހަތު އޮންނަ ބޯޓެއް ކަން އެނގޭނެ ކަމަށް އޭނާ ވިދާޅުވި އެވެ. މުސްތަފާ ވިދާޅުވީ ބޯޓުގެ މިލްކުވެރިޔަކު ހޯދުމަށް އިއުލާންކުރިއިރު، ބޯޓުގައި އަބަދުވެސް ފަޅުވެރިންވެސް ތިބޭނެ ކަމަށެވެ. އެހެންކަމުން ބޯޓުގެ މިލްކުވެރިޔަކު ހޯދަންޖެހޭ ސަބަބެއް ސާފުނުވާކަމަށް މުސްތަފާ ވިދާޅުވި އެވެ.
"އަޅަގަނޑަށް ލަފާކުރެވެނީ މިއީ ތިލަފުށި ކޯޕަރޭޝަނުން ޖައްސައިގެން އުޅޭ ގޭމެއް ކަމަށް. ސަރުކާރުގެ ބައެއް މުއައްސަސާތަކުގައި ތިއްބަވާ ވެރިންނަކީ ވަރަށް ހަނިކޮށް ވިސްނާ ބައެއް." މުސްތަފާ ވިދާޅުވި އެވެ.
މުސްތަފާ ވިދާޅުވީ ސިޔާސީ ގޮތުން އޭނާގެ ވިޔަފާރިއަށް ފިޔަވަޅު އެޅުމަށް ސަރުކަރުން ނިންމި ނަމަވެސް، އެކަން ނުކުރެވޭނެ ކަމަށެވެ.
