ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ގައުމީ ދިފާއީ ބާރުގެ އިސްވެރިންނާއި ބައްދަލު ކުރައްވައިފިއެވެ.
ރައްޔިތުންގެ މަޖިލީހުގެ އިދާރާގައި އޮތް މި ބައްދަލުވުމުގައި ޑިފެންސް މިނިސްޓަރު އަލްއުސްތާޛާ މާރިޔާ އަޙްމަދު ދީދީއާއި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ވަނީ ބައިވެރިވެ ވަޑައިގަންނަވާފައެވެ.
ރައީސް ނަޝީދާއި ދިފާއީ ބާރުގެ އިސްވެރިން ބައްދަލު ކުރެއްވީ ކޮން ސަބަބަކާ ގުޅިގެން ކަމެއް އަދި ބައްދަލުވުމުގައި މަޝްވަރާ ކުރެވުނީ ކޮންކަމަކާ ގުޅޭގޮތުން ކަމެއް މަޖިލިސް މީޑިއާ އިން ހާމަކޮށްފައެއް ނުވެއެވެ.
ރައީސް ނަޝީދު ސިފައިންގެ އިސްވެރިންނާއި ބައްދަލު ކުރެއްވި އިރު، އެމަނިކުފާނު ވަނީ ރާއްޖެއާ އިންޑިއާ އޮތް ގުޅުމުގެ މައްޗަށް އަލިއަޅުއްވާލައްވާ މިފަހުން ވާހަކަ ދައްކަވާފައެވެ. އަދި އިންޑިއާގެ ސިފައިން ރާއްޖޭގައި ތިބުމާ ގުޅޭގޮތުން އެއްވެސް ރައްޔިތަކު އެކަމާ ކަންބޮޑުވެގެން ނޫޅުއްވާ ކަމަށް އެމަނިކުފާނު ވަނީ ވިދާޅުވެފައެވެ.
ނަމަވެސް ރާއްޖޭގެ ސިޔާސީ އިދިކޮޅު ފަރާތްތަކުން އަންނަނީ އިންޑިއާ ސިފައިން ރާޢްޖެއަށް އަތް ގަދަކޮށް، އިންޑިއާގެ އަޅުވެތިކަމަށް ރާއްޖެ ގޮސްފައިވާ ކަމަށް ބުނެ ރައްޔިތުންގެ މެދުގައި ނަފްރަތު އުފައްދަމުންނެވެ. އަދި "އިންޑިއާ އައުޓް"ގެ ނަމުގައި އިދިކޮޅުން އަންނަނީ ކެމްޕޭނެއް ވެސް ހިންގަމުންނެވެ.
އެކަމާ ގުޅިގެން ރައީސް ނަޝީދު ވަނީ މި މަހުގެ 9 ވަނަ ދުވަހު އަވައްޓެރި އިންޑިއާއާ ދެކޮޅަށް އިދިކޮޅު ފަރާތްތަކުން ސިލްސިލާކޮށް ކުރިއަށްގެންދާ އެއްވުންތަކުގައި ހަނގުރާމަވެރި ޖަމާއަތެއް ކަމަށްވާ އައިސިސްގެ ކަޅު ދިދަ ރަމްޒު ކޮށްދޭފަދަ ދިދަ ބޭނުން ކުރާތީ ކަންބޮޑުވުން ފާޅު ކުރައްވާފައެވެ.
