ޓެކްސީ ޑްރައިވަރުންނަށް ހިންގާ ދެވަނަ ތަމްރީން ޕްރޮގްރާމް 266 ބައިވެރިންނާއި އެކު ފަށައިފި
މި ޕްރޮގްރާމް ކުރިޔަށް ގެންދަނީ 2 ހަފްތާގެ މުއްދަތައް
މާލޭގައި ޓެކްސީ ކުރާ ކާރުތަކެއް
ޓެކްސީގެ ހިދުމަތަަށް އަލަށް ނުކުންނަ މީހުންނަށް އަމާޒުކޮށްގެން ހިންގާ ތަމްރީނު ޕްރޮގްރާމުގެ، މި އަހަރުގެ ދެވަނަ ޕްރޮގްރާމް ފަށައިފިއެވެ.
މޯލްޑިވިސް ޕޮލިސް ސަރވިސްގެ ޓްރެފިކް މެނޭޖްމަންޓް ޑިޕާޓްމަންޑުން ކުރިއަށް ގެންދާ މި ތަމްރީނު ޕްރޮގްރާމުގައި، އެއްގަމު ދަތުރު ފަތުރުގެ ގާނޫނާއި ގަވާއިދުތަކަށް އަހުލުވެރިކުރުވުމަށް މައުލޫމާތު ދިނުމަށް ހަމަޖެހިފައިވާކަމަށް ފުލުހުން ބުނެއެވެ. އަދި އެކްސިޑެންޓްތައް މަދުކުރުމުގައި ޓެކްސީ ޑްރައިވަރުންގެ ދައުރާ ގުޅޭގޮތުން މައުލޫމާތުދީ ޓެކްސީ ޑްރައިވަރުންގެ އަމަލުތައް ބަހައްޓަންވީ ގޮތްތަކާ ގުޅޭގޮތުން ޕްރޮގްރާމްގައި އަލިއަޅުވާލާނެއެވެ.
އާދިއްތަ ދުވަހުން ފެށިގެން ދެ ހަފްތާގެ މުއްދަތަށް ކުރިއަށް ގެންދާ މި ޕްރޮގްރާމްގައި 266 މީހަކު ބައިވެރިވެފައިވާއިރު މައުލޫމާތު ދިނުން ކުރިއަށް ގެންދާނީ ގްރޫޕް ތަކަކަށް ބަހާލައިގެންންކަމަށް ފުލުހުން ވަނީ ބުނެފައެވެ.
ޓެކްސީ ޑްރައިވަރުންނަށް ކުރިއަށްގެންދާ މި ޕްރޮގްރާމަކީ ފުލުހުން، ސިލްސިލާކޮށް ކުރިއަށްގެންދާ ޕްރޮގްރާމެކެެވެ. މީގެކުރިން ބޭއްވި ޕްރޮގްރާމްގައިވެސް ދަސްވެނިވާ ފަރާތްތަކަށް ފުލުހުން ވަނީ، މަގުމަތިން ފެންނަ ނޭދެވޭ ކަންތައްތައް ފުލުހުންނަށް ރިޕޯޓުކޮށް، ކުށުގެ ވެށިން ސަލާމަތްވެފައިވާ މާހައުލެއް ގާއިމް ކުރުމަށް ފުލުހުން ކުރަމުންދާ މަސައްކަތަށް އެހީތެރިވުމަށް އެދިވަޑައިގެންފައެވެ. އަދި، ގަވާއިދުތަކަށް އަންނަމުންދާ ބަދަލުތަކަށް އަމަލު ކުރުމަށާއި، ފޯރުކޮށްދޭ ޚިދުމަތް ރަނގަޅުކޮށް، ރައްޔިތުން ޓެކްސީ ހިދުމަތަށް ކުރާ އިތުބާރު އެގޮތުގައި ދެމެހެއްޓުށް ފުލުހުން އިލްތިމާސްކޮށްފައިވެއެވެ.
ތަމްރީން ޕްރޮގްރާމުގައި ޓްރެފިކް ޕޮލިސިންގެ ދާއިރާއިން ތަޖުރިބާ ލިބިވަޑައިގެން ތިއްބެވި ފުލުހުން އެއްގަމު ދަތުރުފަތުރުގެ ޤާނޫނާއި އެ ޤާނޫނުގެ ދަށުން ހެދިފައިވާ ޤަވާއިދުތަކުގެ އިތުރުން މަގުމަތީގެ އަދަބުތަކާއި ގުޅޭގޮތުން މައުލޫމާތު ފޯރުކޮށްދޭނެއެވެ.
