ގަވާއިދާ ހިލާފުވާ ބިދޭސީ މީހާއާ އެއް ހަމައަކުން ދިވެހި މީހާ ވެސް ޖޫރިމަނާ ކުރެވޭނެ: ފައްޔާޒް
11 އޮކްޓޯބަރު 2020 | އާދީއްތަ 07:30ބިދޭސީންގެ މައްސަލައަކީ މިސަރުކާރު އައި ފަހުން މިހާތަނަށް އެންމެ ބޮޑަށް ދިމާވެފައިވާ މައްސަލަ
އިކޮނޮމިކް މިނިސްޓަރ ފައްޔާޒް އިސްމާއިލް
ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީ މީހާއަށް މަސައްކަތް ހަވާލުކުރާ ދިވެހި މީހާއަށް ވެސް އަލަށް އެކުލަވާލި ގަވައިދުގައިވާ ގޮތަށް ޖޫރިމަނާ ކުރެވިގެންދާނެ ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީންގެ މައްސަލައަކީ ރައީސް އިބްރާޙީމް މުހައްމަދު ޞާލިހުގެ ސަރުކާރު އައި ފަހުން މިހާތަނަށް އެންމެ ބޮޑަށް ދިމާވެފައިވާ މައްސަލައެވެ. އެއާއެކު ސަރުކާރުން އަންނަނީ ގަވާއިދާ ހިލާފަށް އުޅޭ ބިދޭސީން އަނބުރާ އެ ގައުމުތަކަށް ފޮނުވާލުމުގެ މަސައްކަތް ކުރަމުންނެވެ.
އެގޮތުން ސެޕްޓެމްބަރު މަހުގެ 25 ވަނަ ދުވަހާއި ހަމައަށް ވަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ ތެރެއިން 8700 އަށް ވުރެ ގިނަ ބިދޭސީން ފޮނުވާލައިފައެވެ.
މިނިސްޓަރު ފައްޔާޒު ވިދާޅުވީ، ރާއްޖޭގައި ދިރިއުޅޭ ބިދޭސީންގެ މައްސަލަ ހައްލުކުރުމަކީ މި ސަރުކާރަށް ވަރަށް ބޮޑު ގޮންޖެހުމެއް ކުރިމަތިވެފައިވާ މައްސަލައެއް ކަމަށާއި އެކަމަށް އަވަސް ހައްލެއް ގެނައުމަށް ގިނަ މަސައްކަތްތަކެއް ކުރެވެމުންދާ ކަމަށެވެ. އެގޮތުން އެކަމަށް ބޭނުންވާ އެންމެ ފުރިހަމަ ރިސޯސް ސަރުކާރުގައި ނެތުމަކީ ކަންބޮޑުވާ ކަމެއް ކަމަށް މިނިސްޓަރުގެ ވާހަކައިގައި ފާހަގަކުރެއްވިއެވެ.
ވިޔަފާރިކުރާ ތަންތަނާއި މަސް ދޯނި ފަހަރުގައި ގިނަ އަދަދަކަށް ބިދޭސީން މަސައްކަތް ކުރަމުންދާކަން ފާހަގަކޮށް އެ ފަރާތްތައް މޮނިޓަރ ކުރުމަށް ކުރަމުންގެންދާ މަސައްކަތްތަކަށް އަލިއަޅުއްވާލައްވާ މިނިސްޓަރު ފައްޔާޒު ވިދާޅުވީ، މަސައްކަތް ކުރަމުން އަންނަނީ ދައުލަތުގައި ހުރި ދަތިތަކުގެ ތެރެއިންވެސް އިންސްޕެކްޓަރުން އިތުރުކޮށް ގަވައިދާ ހިލާފަށް އުޅޭ ފަރާތްތައް ދެނެގަތުމަށް ކަމަށެވެ. އެގޮތުން ސިވިލް ސާވިސް އާއި ފިނޭންސް މިނިސްޓްރީގެ އެއްބާރުލުމާއެކު އިތުރު ފަސް އިންސްޕެކްޓަރުން ވަޒީފާއަށް ނެގި އެފަރާތްތަކުގެ މަސައްކަތާއެކު މިކަމަށް ހައްލު ގެނައުމަށް މަސައްކަތް ފެށިގެންދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އެމްޑީޕީން ސަރުކާރާ ހަވާލުވިއިރު ގަވައިދާ ހިލާފަށް އުޅެމުންދާ ބިދޭސީންގެ މައްސަލައަކީ ވަރަށް ބޮޑަށް ބޮއްސުންލާފައި އޮތް ކަމެއް ކަމަށާއި އެކަމަކީ އެއް ދުވަހަކުން އެއްފަހަރަކާ ހައްލުކުރެވޭނެ ކަމެއް ނޫން ކަމަށެވެ.
އިގްތިސާދު ކުރިއަށް ގެންދިއުމަށް ވިޔަފާރިތަކަށް ބޭނުންވާ މަސައްކަތު މީހުން ފަސޭހައިން ލިބޭނެ ގޮތް ހެދުމަކީ މުހިންމު ކަމެއްކަން ފާހަގަކުރައްވާ މިނިސްޓަރު ވިދާޅުވީ ތަފާތު އެކި މަސައްކަތް ކުރުމަށް ބޭރު މީހުން ގެނައުމަށް މީގެ ކުރިން ހަދާފައި ހުރި އުސޫލުތަކާއި ގަވައިދުތައް ބަދަލުކުރުމަކީ މުހިންމު ކަމެއް ކަމަށެވެ. އަދި އެކަމަށް ލުއި ފަސޭހަ ގޮތްތަކެއް ހޯދައި ދިނުމުގެ މަސައްކަތް ފައްޓަވައިގެން ކުރިއަށްދާ އިރު، ވަކި ގޮތަކަށް ކޮންޓްރޯލްވެފައިވާ ނިޒާމެއްގެ ތެރެއަށް އެކަންކަން ވެގެންދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ ގަވައިދާ ހިލާފުވާ ފަރާތްތައް ހޯދުމަށް ކުރިއަށް އޮތް ދުވަސްތަކުގެ ތެރޭގައި ވަކި އުސޫލެއްގެ ތެރެއިން އިންސްޕެކްޓް ކުރެވި އަދި ގަވައިދާ ހިލާފަށް އުޅޭ ފަރާތްތައް ޖޫރިމަނާ ކުރެވޭނެ ކަމަށެވެ.
