ކުޑަކުދިންގެ ހިޔާ އިން ދެ ކުއްޖަކު ޕޮޒިޓިވްވެ، 89 ކޮންޓެކްޓުން ދެނެގަނެވިފައިވޭ: އެޗްއީއޯސީ

ކުޑަކުދިންގެ ހިޔާ އިން ދެ ކުއްޖަކު ޕޮޒިޓިވެ، 89 ކޮންޓެކްޓުން ދެނެގަނެވިފައިވާ ކަމަށް ހެލްތު އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.

ހޮނިހިރު ދުވަހުގެރޭ އެޗްއީއޯސީ އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާނު ޑރ. ނަޒްލާ ރަފީޤް ވިދާޅުވީ ވިލިމާލޭގައި ހުންނަ ކުޑަކުދިންގެ ހިޔާގައި އުޅޭ ދެ ކުއްޖަކު ބަލީގެ އަލާމަތްތައް ފެނިގެން ޓެސްޓު ކުރިއިރު ވައިރަސްއަށް ޕޮޒިޓިވްވެފައިވާ ކަމަށެވެ.

Advertisement

އަދި އެކަމާއި ގުޅިގެން 89 ކޮންޓެކްޓުން ދެނެގަނެ، އިތުރު 4 މީހުންގެ ސާމްޕަލް ނެގިއިރު ނަތީޖާ ނެގެޓިވްވެފައިވާ ކަަމަށެވެ. އަދި މިހާރު ކުޑަކުދިންގެ ހިޔާއިން ޖުމްލަ 86 ސާމްޕަލް ނެގިފައިވާ ކަމަށް ވެސް ނަޒްލާ ވިދާޅުވިއެވެ.

ހުޅުމާލެ ފިޔަވަތީގެ ފަހުގެ މައުލޫމާތު ހިއްސާ ކުރައްވަމުން ޑރ. ނަޒްލާ ވިދާޅުވީ ފިޔަވަތިން ޖުމްލަ 23 މީހަކު މިހާރު ޕޮޒިޓިވްވެފައިވާ ކަމަށެވެ. އޭގެ ތެރޭގައި 11 ކުދިންނާއި 11 ކުދިން ބަލާ މީހުންނާއި އެއް ސީނިއަރ މުވައްޒަފަކު ވެސް ހިމެނޭ ކަމަށެވެ. އަދި ހޮނިހިރު ދުވަހު އިތުރު ދެމީހަކު ޕޮޒިޓިވްވެފައިވާ ކަމަށް ވެސް ވިދާޅުވިއެވެ.

ފިޔަވަތިން ކުދިން ޕޮޒިޓިވްވެފައިވަނީ ސެޕްޓެމްބަރ 30 ގައި ފިޔަވަތީގައި މަސައްކަތް ކުރާ މުވައްޒަފެއް، ރޯގާގެ އަލާމާތްތައް ހުރުމާއި ގުޅިގެން ފްލޫ ކްލިނިކްއަށް ދައްކާ ޓެސްޓް ކުރުމުން ކޮވިޑް-19 އަށް ފޮޒިޓިވް ވުމުންނެވެ. އެފަރާތަކީ 10 އަހަރާއި 13 އަހަރުގެ ފިރިހެން ކުދިން ބަހައްޓާފައިވާ ފަންގިފިލާގައި މަސައްކަތް ކުރާ މުވައްޒަފެއް ކަމުން އެ ފަންގިފިލާގެ ކުދިން ވަނީ ކަރަންޓީން ކޮށްފައެވެ. އަދި އެ ކުދިން ވަނީ ހެލްތް ޕްރޮޓެކްޝަން އޭޖެންސީ އަދި ހެލްތް އިމަރޖެންސީ އޮޕަރޭޝަން ސެންޓަރގެ އިރުޝާދުގެ ދަށުން ފެސިލިޓީއަކަށް ބަދަލު ކޮށްފައެވެ.

ފިޔަވަތި އަކީ ގިނަ ކުދިން އެތަނެއްގައި ތިބޭ ޖާގައިގެ ދަތިކަން ހުރިތަނެއް ކަމުގައިވުމުން، އެޗްޕީއޭ އަދި އެޗްއީއޯސީއިން ވަނީ ކުދިންގެ ސިއްޚީ ރައްކާތެރިކަން ކަށަވަރު ކުރުމަށް އެ ސަރވިސްއަށް އިރުޝާދު ދީފައި ކަމަށް ޖެންޑަރ މިނިސްޓްރީން ބުންޏެވެ. އަދި މި އިރުޝާދުގެ ދަށުން އެ ސަރވިސްއިން ވަނީ ކަމާއި ގުޅުން ހުރި އިދާރާތަކާއި މޮނިޓަރ ކުރުމުގެ ޒިންމާ އަދާކުރާ ފަރާތްތަކަށް އެންގުމަށްފަހު، ކަރަންޓީން ކުރެވުނު ފަންގިފިލާގައި ހިމެނޭ 26 ކުދިން ކެއަރވޯކަރުންނާއި އެކު އިތުރު ތަނަކަށް ބަދަލު ކުރުމަށް ނިންމާފައި ކަމަށް އެ މިނިސްޓްރީން ބުންޏެވެ.

އެތަނަކީ 3 ފަންގިފިލާއަށް ހުރި 12 ކޮޓަރި ހިމެނޭ ތަނަކަށް ވެފައި، ކުދިންނަށް ބޭނުންވާ ރައްކާތެރިކަން ލިބޭނެކަން ޔަޤީންކޮށްދޭ ކަމަށާއި އަދި ކުދިންގެ ތަޢުލީމީ ކަންކަންވެސް އެތަނުގައި ކަށަވަރުކުރެވޭނެ ކަމަށް ޖެންޑަރ މިނިސްޓްރީން ބުނެއެވެ. އަދި ފިޔަވަތީގައި ތިބި ކުދިންގެ ބެލެނިވެރިންނަށް އެ ކުދިންގެ މަޢުލޫމާތު ދެމުން ގެންދާނެ ކަމަށްވެސް ޖެންޑަރ މިނިސްޓްރީން ބުންޏެވެ.