މާލެ އާއި ވިލިމާލޭ ފަދަ ތަންތަނުން ފުލުހުންނަށް ވަގުތީ ގޮތުން ބޯހިޔާވަހިކަންދޭ ޝަރުތުތައް ގެޒެޓްގައި އާއްމުކޮށް އިއުލާން ކޮށްފިއެވެ.
"މޯލްޑިވްސް ޕޮލިސް ސަރވިސް މުވައްޒަފުންނަށް ބޯހިޔާވަހިކަން ފޯރުކޮށްދިނުމުގެ ގަވައިދަށް މިހާރު ގެނެސްފައިވާ އިސްލާހު ގެޒެޓް ކޮށްފައިވަނީ އަންގާރަ ދުވަހުއެވެ.
ގެޒެޓުގައި މިހާރު އާއްމުކޮށްފައިވާ ޝަރުތުތަކަށް ބަލާއިރު، ފުލުހުންގެ ހިދުމަތުގައި ހަތް އަހަރު އުޅެފައިވާ ކޮންމެ ފުލުހަކަށް ވެސް ވަގުތީ ބޯހިޔާވަހިކަމަށް ކުރިމަތިލެވޭނެ އެވެ.
އެޤަވާއިދުގައި ބުނެފައިވާ ގޮތުގައި ތަންތަން ލިބޭނެ މީހުން ކަނޑައަޅާނީ ޕޮއިންޓް އުސޫލުން އެންމެ މަތިން މާކްސް ލިބޭ މީހުންނަށް ބަލައިގެންނެވެ. އަދި މުވައްޒަފަކު އަދާ ކުރާ މަސްއޫލިއްޔަތަށް ބަލައި، 45 އާ ހަމައަށް ޕޮއިންޓް ދެވޭއިރު، ދިރިއުޅޭ ތަނަށް ކުރިމަތިލުމަށް ހުޅުވާލާ ތާރީހުގައި އެ މުވައްޒަފު ހުރި މަގާމަށް ބަލައި ޕޮއިންޓް ދޭނެ ކަމަށް ބުނެފައިވެއެވެ.
މީގެ އިތުރުން ހިދުމަތް ކުރި މުއްދަތަށާއި ދަރިން ނުވަތަ އާއިލީ ގޮތުން ބަލަހައްޓަން ޖެހޭ މީހުން ތިބި އަދަދަށް ބަލައި ޕޮއިންޓް ދޭނެ ކަމަށް ވެސް ބުނެފައި ވެ އެވެ.
ވަގުތީ ގޮތުން ދިރިއުޅޭ ތަންތަނަށް ކުރިމަތިލާއިރު ލިބިފައިވާ ޕޮއިންޓް އުނި ކުރެވޭ ކަންތައްތަކުގެ ތެރޭގައި ދިގު މުއްދަތަކުން ފައިސާ ދައްކާ ގޮތަށް މުވައްޒަފަކަށް ގެއެއް ނުވަތަ ފްލެޓެއް ލިބިފައި ވުމާއި އެ މީހެއްގެ އަނބިމީހާ ނުވަތަ ފިރިމީހާ ނުވަތަ މައިންބަފައިންގެ އެ ފަދަ ތަނެއް ހުރުން ހިމެނެ އެވެ.
