ދީނީ ތަފާތު ހިޔާލުތައް ފެތުރުމުން މުޖުތަމައުގައި ބައިބައިވުން އުފެދޭ: ކޮމިޝަނަރ އޮފް ޕޮލިސް

އިސްލާމީ ތަފާތު ވިސްނުން ގެންގުޅޭ ފަރާތްތަކުން އެފަރާތްތަކުގެ ވިސްނުން ފެތުރުމަށްޓަކައި ތަފާތު ވަސީލަތްތައް ބޭނުންކޮށްގެން މަސައްކަތްކުރަމުންދާ ކަމަށާއި ދިވެހިން މައިގަނޑު ގޮތެއްގައި ޤާބޫލުކޮށްފައިވާ އިސްލާމީ ޤާބޫލުކުރުންތަކާ ހިލާފު ވިސްނުމާއި ފިކުރުތައް ދިވެހިންގެ ތެރޭގައި ފެތުރެމުންދާކަމީ ނުރައްކާތެރި ކަމެއްކަމަށް ކޮމިޝަނަރ އޮފް ޕޮލިސް އަޙްމަދު އަރީފް ވިދާޅުވެއްޖެ އެވެ.

ކޮމިޝަނަރ އޮފް ޕޮލިސް މިހެން ވިދާޅުވެފައިވަނީ ރަޙުމަތައްލިލްޢާލަމީން ގެ ނަމުގައި މޯލްޑިވްސް ޕޮލިސް ސަރވިސްއާއި މިނިސްޓްރީ އޮފް އިސްލާމިކް އެފެއަރޒް ގުޅިގެން މުޅި ރާއްޖެއަށް އަމާޒުކޮށްގެން ކުރިއަށް ގެންދާ ކެމްޕެއިން ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

އަރީފް ވިދާޅުވީ، މިފަދަ ތަފާތު ފިކުރުތަކާއި ވިސްނުންތަކުގެ ސަބަބުން ޖިނާޢީ އަދި އިޖުތިމާޢި ކުށްތައް ކުރުމާއި އެއްވެސް ކުށެއް ނެތް މައުސޫމް ކުދިންތަކެއްގެ ހައްގުތަކަށް އިހުމާލުވުމާލު ވަމުންދާ މަންޒަރު ފެންނަމުންދާ ކަމަށެވެ.

އަދި ދިވެހިންގެ އެއްބައިވަންތަކަމަށް ބުރޫއަރައި ބައިބައިވުން އުފެދުމަށް ފުރުސަތު ހުޅިވިގެންދާކަމަށް އޭނާ ވިދާޅުވި އެވެ.

މިފަދަ ފިކުރުތަކުގެ ސަބަބުން ދިވެހިންގެ ތެރޭގައި އޮތް ހަމަޖެހުން ގެއްލުމަށް މަގުފަހިވެގެން ދާކަމަށާއި ގައުމީ ސަލާމަތަށް ނުރައްކާވުމަކީވެސް އެކަށީގެންވާކަމެއްކަން އޭނާ ވިދާޅުވި އެވެ.

ބުރާސްފަތި ދުވަހު އިސްކަންދަރު ބިލްޑިންގ ގައި ބޭއްވި ރަސްމިއްޔާތު ޝަރަފްވެރިކޮށްދެއްވައި ކެމްޕެއިން އިފްތިތާޚްކޮށްދެއްވީ ހޯމް މިނިސްޓަރ އަޒްލީން އަޙްމަދު އެވެ.

މިރަސްމިއްޔާތުގައި މިނިސްޓަރ އަޒްލީން އަޙްމަދު ވިދާޅުވީ، މި ކެމްޕެއިނަކީ ވަރަށް މުހިއްމު ކެމްޕެއިނެއް ކަމަށާއި މި ކެމްޕެއިނަށް ދިވެހިރައްޔިތުންގެ ފަރާތުން ފުރިހަމަ އެއްބާރުލުން ދެއްވުމަށް އެދިވަޑައިގަންނަވާ ކަމަށެވެ.

މިރަސްމިއްޔާތުގައި އިސްލާމިކް މިނިސްޓަރ ޑރ. އަޙްމަދު ޒިޔާދު ބާޤިރު ވިދާޅުވީ، ދިވެހިންގެ ތެރޭގައި ކުރިން ހުރި ރީތި ބައެއް އަދާތައް މިއަދު މުޖުތަމައުގެ ތެރޭގައި ފެންނަން ނެތްކަމަށެވެ.

އަދި އެފަދަ އާދަތައް ނެތުމުގެ މައިގަނޑު ސަބަބުތަކަކީ ދީނީ އަސާސީ ވިސްނުމާއި ފިކުރު ގެއްލިގެން ދިއުންކަމަށް މިނިސްޓަރ ވިދާޅުވި އެވެ.

ދީނީ ގޮތުން ސައްޙަ މަޢުލޫމާތު ފޯރުކޮށްދީ ރައްޔިތުން ހޭލުންތެރިކުރުމުގެ ގޮތުން ފުލުހުންނާއި އިސްލާމިކް މިނިސްޓްރީން ގުޅިގެން ހިންގާ މި ކެމްޕެއިންގައި ދީނީ ކަންކަން އޮންނަޖެހޭ ގޮތްތައް ސާފުކޮށްދިނުމަށް ވަނީ ހަމަޖެހިފަ އެވެ. އަދި ދީނީ ކަންކަމުގައި މިހާރަށްވުރެ ބޮޑަށް މުޖުތަމައު ހޭލުންތެރިކުރުމަށް ވަނީ ހަމަޖެހިފަ އެވެ.

މިއީ މުޅި ރާއްޖެއަށް އަމާޒުކޮށްގެން ހިންގާ ގައުމީ ކެމްޕެއިނެކެވެ.