ރާއްޖޭގައި ޕޯސްޓްގެ ޚިދުމަތް ފެށުނުތާ 115 އަހަރު، މި ޚިދުމަތް އިތުރަށް ކުރިއަރުވާ ތަރައްޤީ ކުރަންޖެހޭ: މަލީހް
9 އޮކްޓޯބަރު 2020 | ހުކުރު 16:10ދުނިޔޭގެ ޕޯސްޓް ދުވަހުގެ ގޮތުގަައި ފާހަގަކުރަނީ 9 އޮކްޓޫބަރ
ދުނިޔޭގެ ޕޯސްޓު ދުވަހުގެ ގޮތުގައި ފާހަގަކުރަން ފެށުނީ މީގެ 51 އަހަރު ކުރިން
ކޮވިޑް-19ގެ ނުރައްކާތެރި ރޯގާ ބަލިމަޑުކަމާއެކު، ޕޯސްޓުގެ ޚިދުމަތް ބޭނުން ކުރުން މިވަނީ ކުރިޔަށްވުރެ ގިނަވެފައި ކަމަށާއި މިއިން ދޭހަވަނީ ޕޯސްޓުގެ ޚިދުމަތުގެ ކުރިމަގު އުޖާލާ ކަމާއި، ޕޯސްޓުގެ ޚިދުމަތް އިތުރަށް ކުރިއަރުވައި ތަރައްޤީ ކުރަން ޖެހޭ ކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުޙައްމަދު މަލީޙް ޖަމާލް ވިދާޅުވެއްޖެ އެވެ.
ދުނިޔޭގެ ޕޯސްޓް ދުވަހުގެ މުނާސަބަތުގައި މިނިސްޓަރ މަލީޙް ދެއްވި މެސެޖްގައި ވިދާޅުވީ ޒަމާނީ އިޤްތިޞާދުގެ ބިންގަލަކީ، ޕޯސްޓުގެ ޚިދުމަތްކަން ދުނިޔެއިން ދަނީ ދަލީލު ކޮށްދެމުން ކަމަށެވެ.
އެހެންކަމުން ޒަމާނީ އިޤްތިޞާދީ ދުވެލި ދެމެހެއްޓުމަށްޓަކައި، ޕޯސްޓުގެ ޚިދުމަތަށް އަންނަން ޖެހޭ ޒަމާނީ ބަދަލުތައް އަވަސްކަމާއި ހަލުވިކަމާއެކު ގެނައުމުގެ މުހިންމުކަން އިންތިހާއަށް މިއަދު ބޭނުންވެފައިވާ ކަމަށް ވެސް ވިދާޅުވިއެވެ.
މިއަދުގެ މި ޓެކްނޮލޮޖީގެ ދުނިޔޭގައި ވެސް އެހެނިހެން ޒަމާނީ މުވާޞަލާތުތަކުގެ ކުރިއެރުމާއި އެކުގައި ޕޯސްޓުގެ ޚިދުމަތުގެ މުހިންމުކަމާއި މަޤުބޫލުކަން ކުޑަ ނޫންކަން ފާހަގަ ކުރައްވަމުން މިނިސްޓަރ ވިދާޅުވީ ރާއްޖޭގެ ޕޯސްޓުގެ ޚިދުމަތަކީ މުޅި ދައުލަތުގެ އެންމެ ޒަމާންވީ ޚިދުމަތް ކަމަށެވެ.
ދިވެހިރާއްޖޭގައި ޕޯސްޓުގެ ޚިދުމަތް ފެށުނުތާ މި އަހަރަކީ 115 ވަނަ އަހަރު ފުރުނު އަހަރެވެ. ރާއްޖޭގައި ޕޯސްޓުގެ ޚިދުމަތް ފެށުނީ 9 ސެޕްޓެމްބަރ 1906 ގައެވެ. ރާއްޖޭގެ ޕޯސްޓުގެ ތާރީޚަކީ ކުރިއެރުމާއި ތަރައްޤީގެ މަރުހަލާތަކެއް ކަނޑަތު ކޮށްފައިވާ ފަޚުރުވެރި ތާރީޚެއް ކަމަށާއި މިގޮތުން ބަލާއިރު ރާއްޖޭގެ ސްޓޭމްޕްތަކަކީ ދުނިޔޭގައި މަގުބޫލް ސްޓޭމްޕްތަކެއްކަން ފާހަގަ ކޮށްލަންޖެހޭ ކަމަށް ވެސް މަލީހް ވިދާޅުވި އެވެ.
ދުނިޔޭގެ ޕޯސްޓް ދުވަހުގެ ގޮތުގަައި 9 އޮކްޓޫބަރ ފާހަގަ ކުރަނީ ޕޯސްޓުގެ ބައިނަލްއަޤުވާމީ ޖަމްޢިއްޔާ ޔުނިވަރސަލް ޕޯސްޓަލް ޔޫނިއަން (ޔޫ.ޕީީ.ޔޫ) އުފެދުނީ 9 އޮކްޓޫބަރ 1874ގަައި ކަމަށްވާތީއެވެ. މިދުވަސް ވޯލްޑް ޕޯސްޓް ޑޭ ނުވަތަ ދުނިޔޭގެ ޕޯސްޓު ދުވަހުގެ ގޮތުގައި ފާހަގަކުރަން ފެށުނީ މީގެ 51 އަހަރު ކުރިން 1969 ގައެވެ.
ޕޯސްޓުގެ ބައިނަލްއަޤުވާމީ ޖަމްޢިއްޔާ ޔޫ.ޕީ.ޔޫ.އަކީ ދުނިޔޭގެ ބައިނަލްއަޤްވާމީ ޖަމާޢަތްތަކުގެ ތެރެއިން އެންމެ ޒަމާންވީ އެއް ޖަމްޢިއްޔާއެވެ. އަދި ޕޯސްޓުގެ ޚިދުމަތަކީ، ދުނިޔޭގައި އެންމެ ޒަމާންވީ މުވާޞަލާތުގެ ޚިދުމަތެވެ. ޔޫ.ޕީ.ޔޫ.ގެ މެންބަރު ޤައުމަކަށް ރާއްޖެވީ 15 އޮގަސްޓް 1967 ގައެވެ.
