ކުށުގެ ވެށިން ސަލާމަތްވެ، އަނބުރާ މުޖުތަމައުއަށް ނިކުންނަ ޒުވާނުންނަށް ސްޓެލްކޯއިން ފަހި ފުރުސަތެއް
8 އޮކްޓޯބަރު 2020 | ބުރާސްފަތި 16:41ޕެރޯލްގެ ފުރުސަތު ލިބޭ ބައެއް ފަރާތްތަކަށް ސްޓެލްކޯއިން ވަޒީފާ ދިނުމަށް ވަނީ ނިންމާފައި
އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން
ކުށުގެ މާހައުލުގައި އުޅެވިފައި ތިބި ޒުވާނުންގެ ތެރެއިން ގަދަރުވެރި ރަނގަޅު ދިރިއުޅުމަކާއެކު، އެނބުރި މުޖުތަމައުގެ ތެރެއަށް ދާން ބޭނުންވާ ޒުވާނުންނަށް ސްޓެލްކޯއިން "ފަހި ފުރުސަތެއް" ހުޅުވާލައިފި އެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރުން އިޖުތިމާއީ ދުޅަހެޔޮކަމަށް ކުރައްވަމުން ގެންދަވާ މަސައްކަތްތަށް ފުރިހަމަ އެއްބާރުން ދިނުމުގެ މަގުސަދުގައި ސްޓެލްކޯގެ މެނޭޖިންގ ޑިރެކްޓަރު ހަސަން މުޣުނީގެ އިސް ނެންގެވުމުގެ މަތިން ވަނީ ޕެރޯލްގެ ފުރުސަތު ލިބޭ ބައެއް ފަރާތްތަކަށް ސްޓެލްކޯއިން ވަޒީފާ ހަމަޖެހިގެންދާނެ ފަދަ އެއްބަސްވުމެއްގައި ހޯމް މިނިސްޓްރީއާއި ކަރެކްޝަނަލް ސާވިސަސްއާއެކު ސޮއިކޮށްފައެވެ.
އެ އެއްބަސްވުމުގައި ސްޓެލްކޯގެ ފަރާތުން މެނޭޖިން ޑިރެކްޓަރު ހަސަން މުޣުނީ ސޮއި ކުރައްވާފައިވާއިރު، ހޯމް މިނިސްޓްރީގެ ފަރާތުން ސޮއިކުރެއްވީ ހޯމް މިނިސްޓަރު އިމްރާން އަބްދުﷲ އެވެ. އަދި ކަރެކްޝަނަލް ސާވިސާސްގެ ފަރާތުން ސޮއި ކުރެއްވީ ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅެވެ.
އެއްބަސްވުމުގައި ސޮއި ކުރެއްވުމަށްފަހު މެނޭޖިންގ ޑިރެކްޓަރު ހަސަން މުޣުނީ ވިދާޅުވީ، ސްޓެލްކޯ އަކީ މަސައްކަތްތެރި ޒުވާނުންތަކެއްގެ ހިދުމަތް ގައުމަށް ފޯރުކޮށްދީ ގައުމުގެ މުހިންމު ޒިންމާއެއް އަދާ ކުރާ ކުންފުންޏެއް ކަމަށެވެ. އަދި ސްޓެލްކޯގެ ހިދުމަތުގެ އެންމެ މުހިންމު އެއްވެލިއު އަކީ، ނުވަތަ މަސައްކަތުގެ އަސާސަކީ މަސައްކަތުގެ އަހުލާގު ކަމަށެވެ.
އެ ރަސްމިއްޔާތުގައި ވާހަކަފުޅު ދައްކަވަމުން ހޯމް މިނިސްޓަރު އިމްރާން އަބުދުﷲ ވިދާޅުވީ، ސްޓެލްކޯއާއެކު މިއަދު މިފަށައިގަނެވޭ މަސައްކަތުގެ ދަށުން ގައިދީންގެ ގޮތުގައި ތިބޭ ފަރާތްތައް ސްޓެލްކޯއާއެކު ނިކުމެ މަސައްކަތްކޮށް، އެއްކޮށް މިނިވަންވެގެންދާއިރުގަ ބައެއް މަސައްކަތްތައް ދަސްކުރެވި، އަދި ކުރެވޭ މަސައްކަތުގެ ނަތީޖާއެއްގެ ގޮތުން އެ މުއްދަތުގައިވެސް އޭނާއަށް ލިބިގެންދާ އާމްދަނީ ފަހަށް ރައްކާކުރެވި އޭނާއާއި އޭނާގެ އާއިލާގެ ދުޅަހެޔޮކަމަށް ހެޔޮ އަސަރު ކުރާނެ ކަމަށެވެ.
ސްޓެލްކޯގައި ބޭއްވި ރަސްމިއްޔާތުގައި ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅު ވިދާޅުވީ ކަރެކްޝަންސްއިން އަބަދުވެސް މަސައްކަތް ކުރަނީ ގައިދީން މިނިވަންވެ ނިކުންނައިރު އެއީ މުޖްތަމައު ބަލައިގަންނަ ބަޔަކަށް ހެދުން ކަމަށާއި، ހާއްސަކޮށް އެ މީހުންނަކީ އަލުން އަނބުރާ ކުށުގެ ވެއްޓަށް ނުވަންނަ ބަޔަކަށް ހެދުމަށް ގިނަ މަސައްކަތްތަކެއް ކުރައްވަމުންގެންދަވާ ކަމަށެވެ.
ސޮއި ކުރެވުނު އެއްބަސްވުމަކީ އެއް އަހަރުގެ މުއްދަތައް ސޮއި ކުރެވުނު އެއްބަސްވުމެކެވެ. އެހެން ނަމަވެސް، ކުރިޔަށް އޮތް ތަނުގައި މި ޕްރޮގްރާމްގެ ނަތީއްޖާއަށް ބަލައި، އެ އެއްބަސްވުން އިތުރު އަހަރުތަކަކަށް ދެމިގެންދާނެ ފަދަ ގޮތަކަށް ކަންކަން ކުރެވިގެންދާނެ އެވެ. އަދި ޕެރޯލްގެ ފުރުސަތު ލިބި ސްޓެލްކޯއިން ވަޒީފާ ހަމަޖެހޭ ފަރާތްތަކަށް އެ އޮންނަ އުސޫލުގެ ދަށުން ކަރެކްޝަންސްގެ ބެލުމުގެ ދަށުން ސްޓެލްކޯއިން ހިދުމަތްދޭ 35 ރަށުގައި ވަޒީފާ އަދާކުރުމުގެ ފުރުސަތު ލިބިގެންދާނެ އެވެ.
