ކަނޑާލި އިނާޔަތްތައް އަނބުރާ މަޚުލޫފަށް ދޭން ޖެހިއްޖެ

މާފުށީ ޖަލުގައި ހުކުމް ތަންފީޒް ކުރައްވަމުން ގެންދަވާ ގަލޮޅު ދެކުނު ދާއިރާގެ މެންބަރު އަހުމަދު މަޚުލޫފް، ގައުމީ ސަލާމަތަށް ނުރައްކާވާ ފަދަ ވާހަކަތަކެއް ދެއްކެވި ކަމަށް ބުނެ، އިނާޔަތްތައް ކަނޑާލުމަށް މޯލްޑިވްސް ކަރެކްޝަނަލް ސާވިސް އިން ނިންމި ނިންމުން އަނބުރާ ގެންދަން ޖެހިއްޖެއެވެ.

މަޚުލޫފްގެ އިނާޔަތްތައް ކަނޑާލުމަށް މިދިޔަ މަހުގެ 29 ވަނަ ދުވަހު ކަރެކްޝަނުން ނިންމީ، ގައުމީ ސަލާމަތަށް ނުރައްކާވާ ފަދަ ވާހަކަތަކެއް ހިމެނޭ އޯޑިއޯއެއް އާންމުކުރެއްވި ކަމަށް ބުނެއެވެ. މާފުށީ ޖަލުގައި ހުންނަވައިގެން މިދިޔަ މަހުގެ 26 ވަނަ ދުވަހު މަޚުލޫފް އާންމުކުރެއްވި އޯޑިއޯގައި ގޮވާލާފައިވަނީ، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ވޯޓް ދެއްވުމަށެވެ.

އެ އޯޑިއޯއާ ގުޅިގެން ކަރެކްޝަނުން ވަނީ މަޚުލޫފަށް ލިބެމުންދިޔަ ފޯނު ކޯލް ކުރުމާއި، އެކަހެރި ބައްދަލުވުންތަކާއި، އަދި އާއިލީ ބައްދަލުވުމުގެ ފުރުސަތު އެއް މަސް ދުވަހަށް ކަނޑާލުމަށް ނިންމާފަ އެވެ.

ކަރެކްޝަނުގެ އެ ނިންމުން އެޕީލް ބޯޑަށް މަޚުލޫފް ހުށަހެޅުއްވުމުން، އެ ބޯޑުން ނިންމީ، އެފަދައިން އޯޑިއޯ އާންމުކުރުމަކީ މަނާކަމެއްކަން ކަރެކްޝަނުން މަޚުލޫފަށް ކިޔައިދީފައި ނުވާތީ އެކަމަކީ ކަރެކްޝަނުން ޒިންމާވާންޖެހޭ ކަމެއް ކަމަށެވެ. އެހެންކަމުން ކަނޑާލި ހުރިހާ އިނާޔަތްތަކެއް އަނބުރާ ދިނުމަށް އެ ބޯޑުން ވަނީ ކަރެކްޝަނަށް އަންގާފަ އެވެ.

މިކަމާ ގުޅޭ ގޮތުން ކަރެކްޝަނުގެ މީޑިއާ އޮފިޝަލް ވިދާޅުވީ "މިހާރު މަޚުލޫފަށް އިނާޔަތްތައް ލިބޭނެ" ކަމަށެވެ. ނަމަވެސް، އެކަމާ ގުޅޭ އިތުރު ތަފްސީލެއް އޭނާ ނުދެއްވި އެވެ.

މަޚުލޫފަށް ގާނޫނީ ވަކީލުންނާ ބައްދަލުކުރުމުގެ ފުރުސަތު ނުދޭތާ މިހާރު ދެ މަހަށް ވުރެ ގިނަ ދުވަސް ވަނީ ވެފަ އެވެ. މަޚުލޫފްގެ އާއިލާ އާއި ވަކީލު ގެންދަވަނީ އެކަމާ ކަންބޮޑުވުން ފާޅުކުރަމުންނެވެ.

ފުލުހުންގެ ދައުރަށް ހުރަސް އެޅުމުގެ ކުށުގެ ދެ ދައުވާއެއްގައި މަޚުލޫފްގެ މައްޗަށް ވަނީ 10 މަހާއި 24 ދުވަހުގެ ޖަލު ހުކުމެއް އިއްވާފަ އެވެ. އޭގެ ތެރެއިން ހަ މަސް ދުވަހުގެ ޖަލު ހުކުމް ތަންފީޒްކޮށް ނިމިފައިވާއިރު، މިހާރު ތަންފީޒް ކުރައްވަމުން ގެންދަވަނީ ހަތަރު މަހާއި 24 ދުވަހުގެ ޖަލު ހުކުމެވެ. އެ ހުކުމް ތަންފީޒްކޮށް ނިންމައި، މަޚުލޫފް މިނިވަން ވާނީ ޖޫން މަހުގެ ތެރޭގަ އެވެ.