ޅ. ހިންނަވަރު ޒުވާނުންގެ މަރުކަޒާއި ހިންނަވަރު ކައުންސިލްގެ އިދާރާ ގުޅިގެން ބޭއްވި "ހިންނަވަރު ކޮމިއުނިޓީ ސެންޓަރު ފުޓްސަލް ޗެލެންޖް 2020" ގެ ޗެމްޕިއަންކަން ދި ވޯލް ހޯދައިފިއެވެ.

ހޯމަ ދުވަހުގެރޭ ހިންނަވަރު ފުޓްސަލް ދަނޑުގައި ކުޅުނު ފައިނަލް މެޗު ދި ވޯލުން ކާމިޔާބުކުރީ މަކާއޯއާ ވާދަކޮށް 5-4 ގެ ނަތީޖާ އަކުންނެވެ.

މި މެޗުގެ ދި ވޯލުން ކާމިޔާބުކުރި ލަނޑުތައް އެ ޓީމަށް ޖަހައިދިނީ އިޔާދް އަޙްމަދާއި، މަޖުދާން ސޯލިހާއި، ޙައިޒާން ހަސަނާއި، އިނާދް އީސަ އަދި ޒިޔާދް އަޙްމަދެވެ. މި މެޗުގައި މަކާއޯގެ އަޙްމަދު މަސީދު ދެ ލަނޑު ކާމިޔާބުކުރިއިރު، އެ ޓީމުގެ އަނެއް ލަނޑުތައް ޖެހީ މައުރޫފް ހުސެއިން އަދި އަމާނީ ހަސަނެވެ.

މި މުބާރާތުގެ އެންމެ މޮޅު ފަސް ކުޅުންތެރިންނަށް ހޮވުނީ ދި ވޯލުގެ ގޯލްކީޕަރު މުޝްރަފް، މަޖުދާނާއި، ސޮސް ބޯއީސްގެ ވިޝާން އާއި، މަކާއޯގެ އަޖުވަދުގެ އިތުރުން ޝުޖާއުއެވެ. މި މުބާރާތުގެ އެންމެ ގިނަ ލަނޑު ކާމިޔާބުކުރި ކުޅުންތެރިޔަކީ ދި ވޯލުގެ އިޔާދް އަޙްމަދެވެ. އޭނާ ވަނީ މުބާރާތުގައި ޖުމްލަ 17 ލަނޑު ކާމިޔާބުކޮށްފައެވެ.

މި މުބާރާތުގައި ޖުމްލަ 10 ޓީމަކުން ވަނީ ވާދަކޮށްފައެވެ. ހިންނަވަރު ޒުވާނުންގެ މަރުކަޒާއި ހިންނަވަރު ރަށު ކައުންސިލް ގުޅިގެން ބޭއްވި މި މުބާރާތް ކުރިޔަށްދިޔައީ ދެ ގްރޫޕަކަށް ބަހާލައިގެންނެވެ.

ހިންނަވަރު ޒުވާނުންގެ މަރުކަޒުން އެ ރަށުގައި ފުޓްސަލް މުބާރާތެއް ބޭއްވިއިރު، އެ މަރުކަޒުން އަންނަނީ ދެ ޖިންސުގެ ޒުވާނުންނަށް އަމާޒުކޮށްގެން ފުޓްސަލް މުބާރާތްތަކުގެ އިތުރުން ކުޅިވަރުގެ އިތުރު މުބާރާތްތައްވެސް ބާއްވަމުންނެވެ.