ގަމު ރީޖަނަލް ހޮސްޕިޓަލްގައި ސީޓީ ސްކޭން މެޝިން އިންސްޓޯލްކޮށް ނިންމާ ޓެސްޓްކޮށްފި
މިއީ ހައްދުންމަތީގައި ބަހައްޓާ ފުރަތަމަ ސީޓީ ސްކޭން
ލ.ގަމު ރީޖަނަލް ހޮސްޕިޓަލްގައި ސީޓީ ސްކޭން މެޝިނެއް ބަހައްޓާ ޓެސްޓްކުރަނީ
މާލެއަށް ބަރޯސާވުން ކުޑަކޮށް، އަތޮޅުތެރޭގެ ސިއްހީ ނިޒާމް ހަރުދަނާކުރުމަށް ސަރުކާރުން ކުރަމުން އަންނަ މަސައްކަތުގެ ދަށުން ގަމު ރީޖަނަލް ހޮސްޕިޓަލްގައި ސީ.ޓީ ސްކޭންގެ ޙިދުމަތް ފެށުމަށް ބޭނުންވާ މަސައްކަތްނިމި، މެޝިން އިންސްޓޯލްކޮށް ނިންމާ ޓެސްޓްކޮށްފިއެވެ.
އައު ސަރުކާރުގެ އަމާޒަކީ، އަތޮޅުތެރޭގެ ރައްޔިތުންނަށް، އެ ސަރަހައްދަކުން ފެންވަރު ރަނގަޅު ސިއްހީ ހިދުމަތެއް ލިބޭނެގޮތް މަގުފަހިކޮށްދިނުމެވެ. އެ އަމާޒު ހާސިލްކުރުމަށް ސަރުކާރުން ސިއްހީ ދާއިރާއަށް ގިނަ ހަރަދުތަކެއް ކުރަމުންގެންދާއިރު، ލ. ގަމުގައި ހުންނަ ރީޖަނަލް ހޮސްޕިޓަލުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް އަންނަނީ ކުރަމުންނެވެ.
އެގޮތުން ހޮސްޕިޓަލް އޭސީކޮށް ނިންމާ، ހޮސްޕިޓަލަށް ދިމާވެފައިވާ ކަރަންޓުގެ މައްސަލަ ހައްލުކޮށްފައިވާ ކަމަށް ރައްޔިތުންގެ މަޖިލީހުގެ ގަމު ދާއިރާގެ މެމްބަރު މުހައްމަދު ވިސާމް ވިދާޅުވިއެވެ. އަދި ހޮސްޕިޓަލް އިންޖީނުގެ އިމާރާތްކޮށް 400 ކިލޯ ވޯޓްގެ 2 އިންޖީން ވަނީ ގެންގޮސްފައެވެ.
ލާމަރުކަޒީ ފަލްސަފާގެ ދަށުން ގަމު ރީޖަނަލް ހޮސްޕިޓަލު ތަރައްގީ ކުރާ ވާހަކަ ދެއްކުމުން އެކަން ނުވާނެ ކަމަށް ބައެއް ފަރާތްތަކުން ބުނި ކަމަށާއި ނަމަވެސް ހުވަފެންތަކުގައި ކުލަ ޖެހިގެން ދާ މަންޒަރު މިއަދު ރައްޔިތުންނަށް ފެންނަމުންދާކަމަށްވެސް ވިސާމް ވިދާޅުވިއެވެ.
ވިސާމް އިތުރަށް ވިދާޅުވީ މަދު ދުވަސްކޮޅެއްގެ ތެރޭގައި ޓާރޝިއަރީ ހޮސްޕިޓަލްގެ އައު އިމާރާތް އަޅާނެ ކުންފުންޏެއް ހޯދަން އިއުލާނުކުރާނެ ކަމަށެވެ. އަދި އެ އިމާރާތާއެކު އެމްއާރްއައި ޚިދުމަތްވެސް ލިބިގެންދާނެ ކަމަށެވެ. އަދި އއ. އަތޮޅުންވެސް ލ. ގަމު ރީޖަނަލް ހޮސްޕިޓަލްއަށް ޑޮކްޓަރަށް ދެއްކުމަށް މީހުން އަންނަކަން ފާހަގަކުރަމުން ވިސާމް ވިދާޅުވީ ޑޮކްޓަރުންގެ ދަތިކަން އެބަހުރި ކަމަށެވެ.
އެހެންނަމަވެސް މިހާރު ހޮސްޕިޓަލްގައި އަލަށް އިމާރާތް ކުރާ 6 ރޫމް އަދި އޯޕީޑީ އޭރިއާގެ 90 އިންސައްތަ މަސައްކަތް ނިމި އެތަން ބޭނުން ކުރަން ފެށުމާއި އެކު ބަލިތަކަށް ޚާއްސަ ފަރުވާދޭ ޑޮކްޓަރުންގެ ދިމާވެފައިވާ ދަތިކަން ހައްލުވެގެންދާނެ ކަމަށް އުއްމީދު ކުރައްވާ ކަމަށް ވިސާމް ވިދާޅުވިއެވެ.
ލ. ގަމު ރީޖަނަލް ހޮސްޕިޓަލް ސަރުކާރުން ތަރައްޤީކުރަނީ މ. ފ. ދ. ތ. އަދި ލ. ގެ ރައްޔިތުންނަށް ފަސޭހައިން ސިއްހީ ފަރުވާ ލިބޭނެ ގޮތަށެވެ. އަދި ސަރުކާރުގެ އަމާޒަކީ މި އަތޮޅުތަށް ރަނގަޅު ފެރީ ނިޒާމަކުން ގުޅާލުމެވެ.
