ޕީޖީ ލީޑަރު ސަލީމްގެ ސިއްހީ ހާލުކޮޅު ރަނގަޅު: ޕީޕީއެމް
ސަލީމް ވަނީ ޓްރީޓޮޕް ހޮސްޕިޓަލްގައި އެޑްމިޓްކޮށް ގިނަ ޓެސްޓުތަކެއް ހަދާފައި
އޭދަފުށި ދާއިރާގެ މެންބަރު އަޙްމަދު ސަލީމް
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ޕާލިމެންޓްރީ ގުރޫޕްގެ ލީޑަރު, އޭދަފުށި ދާއިރާގެ މެންބަރު އަޙްމަދު ސަލީމް (ރެޑްވޭވް ސަލީމް) ގެ ހާލުކޮޅު ރަނގަޅުކަމަށް އެ ޕާޓީ އިން ބުނެފިއެވެ.
ޕީޕީއެމް އިން ބުނީ އެ ޕާޓީގެ ޕީޖީ ލީޑަރު ސިއްހީ ފަރުވާ ހޯދެވުމަށް ޓްރީޓޮޕް ހޮސްޕިޓަލްގައި އެޑްމިޓްކޮށް ގިނަ ޓެސްޓުތަކެއް ހައްދަވާފައިވާކަމަށެވެ. އަދި ޓެސްޓުތައް ހެއްދެވުމަށްފަހު ގެޔަށް ބަދަލުކުރުމުގެ މަސައްކަތް ކުރަމުން އަންނަކަމަށް ޕީޕީއެމުން ބުންޏެވެ. ނަމަވެސް ޓެސްޓުތައް ހައްދަވައި، ސިއްހީ ފަރުވާ ސަލީމް ހޯދެވީ ކީއްވެކަމެއް ޕީޕީއެމުން ހާމައެއް ނުކުރެއެވެ.
އެނގިފައިވާގޮތުގައި ސަލީމް ހޮސްޕިޓަލަށް ވަޑައިގެންނެވީ ހުން ގަދަވުމުގެ ސަބަބުންނެވެ.
ކޮވިޑް-19 ގެ މިހާލަތުގައި މެމްބަރު ސަލީމް ހިމެނިވަޑައިގަންނަވަނީ ހައިރިސްކު ކެޓަގަރީގައެވެ.
ޕީޕީއެމް ޕީޖީ ލީޑަރުގެެ އިތުރުން ސަލީމްއަކީ ރައްޔިތުންގެ މަޖިލީހުގެ މައިނޯރިޓީ ލީޑަރުވެސްމެއެވެ. ރެޑްވޭވް ކުންފުނީގެވެސް ވެރިޔާ ސަލީމަކީ އަހަރުތަކެއްވަންދެން އޭދަފުށީ ދާއިރާގެ މެމްބަރުކަން ކުރައްވަމުންގެންދަވާ ބެފުޅެކެވެ. އެގޮތުން ނިމުނު 17 ވަނަ، އަދި 18 ވަނަ ރައްޔިތުންގެ މަޖިލީހުގެ މެމްބަރުކަންވެސް ސަލީމް ކުރައްވާފައިވެއެވެ.
