އެމެރިކާގެ ރައީސް ޑޮނާލްޑް ޓްރަމްޕް ކޮވިޑް-19 އަށް ޕޮޒިޓިވްވުމާއިއެކު، ގިނަ ބަޔެއްގެ ފާޑުކިޔުން ވައިޓް ހައުސްގެ މެޑިކަލް ޓީމަށް އަމާޒުވެއްޖެއެވެ.
އެމެރިކާގައި އެންމެ ރައްކާތެރިކަން ދީފައިވާ މީހާ ޕޮޒިޓިވްވުމަކީ ބަލައިގަނެވޭނެ ކަމެއް ނޫން ކަމަށް ބުނެ އިދިކޮޅު ޑިމޮކްރެޓުންނާއި އެހެނިހެން ބައެއް ފަރާތްތަކުން ވަނީ ޓްރަމްޕް އާއި، އެ މަނިކުފާނު އަރިހުގައި ވައިޓް ހައުސްގައި މަސައްކަތްކުރައްވާ ފަރާތްތަކަށް ފާޑުކިޔާފައެވެ. އަދި ޓްރަމްޕަށް ކޮވިޑް ޖެހުނީ އެ ބަލި ފެތުރުން ކޮންޓްރޯލް ކުރުމަށް ގެންގުޅުއްވި ދޯދިޔާ ސިޔާސަތުގެ ސަބަބުން ކަމަށް ބައެއް ފަރާތްތަކުން ވަނީ ބުނެފައެވެ.
ބޭރުގެ މީޑިއާއަކަށް މައުލޫމާތު ދެމުން ވައިޓް ހައުސްގައި މަސައްކަތްކުރާ އޮފިޝަލަކު ވިދާޅުވީ ޓްރަމްޕްގެ ފުށުން ކޮވިޑްގެ އަލާމާތްތައް ފެންނަމުންދާތާ ދުވަސްތަކެއް ވެފައިވާ ކަމަށެވެ. އަދި އޭނާ ވަނީ އެ މަނިކުފާނުގެ ހާލު ދެރަވާން ދިމާވީ ވައިޓް ހައުސްގައި މަސައްކަތްކުރާ މެޑިކަލް ޓީމުގެ ދޯދިޔާ ކަމުން ކަމަށް ތުހުމަތުކޮށްފައެވެ.
ޓްރަމްޕް ކޮވިޑަށް ޕޮޒިޓިވްވީ ކިހިނެއް ކަމެއް މިހާތަނަށް ދެނެގަނެވިފައި ނުވާއިރު، ޓްރަމްޕް ޓެސްޓުކުރީ ވައިޓް ހައުސްގެ ކޮމިއުނިކޭޝަންސް ހެޑް ހޯޕް ހިކްސް ޕޮޒިޓިވްވުމުންނެވެ. ހިކްސް ވަނީ ދާދި ފަހުން އެމެރިކާގެ ރިޔާސީ އިންތިހާބުގެ ބަހުސް ބޭއްވި އޮހަޔޯއަށް ޓްރަމްޕާ އެކު އެއާފޯސް ވަންގައި ދަތުރުކުރައްވާފައެވެ.
ވައިޓް ހައުސްއިން ބުނެފައިވަނީ ޓްރަމްޕުގެ ކިބައިން އަދި ފެންނަނީ ބަލީގެ އާދައިގެ އަލާމަތްތައް ކަމަށާއި ރައީސް ހުންނެވީ ވަރުގަދަ އަޒުމެއްގައި ކަމަށާއި ވަރަށް އަވަހަށް ބަލިން ރަނގަޅުވާނެ ކަމަށް އުއްމީދު ކުރައްވާ ކަމަށެވެ.
