ކޮވިޑް-19 އަށް ޕޮޒިޓިވްވެފައިވާ އެމެރިކާގެ ރައީސް ޑޮނާލްޑް ޓްރަމްޕްގެ ހާލުކޮޅު ދެރަވެ ހޮސްޕިޓަލަށް ބަދަލު ކުރުމަށް މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާ ގޮތުން ހުކުރު ދުވަހު ކޮވިޑަށް ޕޮޒިޓިވްވިކަން ހާމަކޮށްފައިވާ ޓްރަޕް ހާލުކޮޅު ދެރަ ކަމަށާއި، އެމަނިކުފާނު ހޮސްޕިޓަލަށް ގެންދިޔުމުގެ މަސައްކަތް މިހާރު ކުރަމުން އަންނަ ކަމަށެވެ.

ވައިޓް ހައުސް އޮފިޝަލަކު ވިދާޅުވީ ހުކުރު ދުވަހުގެ ހެނދުނުން ފެށިގެން ޓްރަމްޕް ހުން އައިސް، ނޭވާލުމަށް އުނދަގޫވާތީ އުޅުއްވާ ކަމަށެވެ. އަދި މިވަގުތު މަސައްކަތް ކުރަމުން އަންނަނީ އެމަނިކުފާނު، މެރީލޭންޑްގައި ހުންނަ އަސްކަރީ ހޮސްޕިޓަލެއް ކަމަށްވާ ރީޑް ނެޝަނަލް މިލިޓަރީ މެޑިކަލް ސެންޓަރަށް ގެންދިޔުމުގެ މަސައްކަތް ކަމަށެވެ. އަދި އެމަނިކުފާނުގެ ހޮސްޕިޓަލަށް ގެންދިޔުމަށް ރައީސްގެ ހެލިކޮޕްޓަރު މެރިން ވަން މިހާރު ވަނީ ވައިޓް ހައުސްއަށް ޖައްސާފައެވެ.

ޓްރަމްޕްގެ ހާލަތާއި މެދު ވައިޓް ހައުސްގެ ޑޮކްޓަރުން ވިދާޅުވީ ކޮވިޑްގެ އަލާމަތް އެމަނިކުފާނުގެ ފަރާތުން ފެނުނު ފަހުން އެމަނިކުފާނު ހުންނަވަނީ ވަރުދެރަ ވެފައި ކަމަށެވެ.

ޓްރަމްޕް މިލިޓަރީ ހޮސްޕިޓަލަށް ބަދަލު ކުރައްވާ ވަކި ސަބަބެއް ވައިޓް ހައުސްއިން އަދި ހާމަކޮށްފައި ނުވާއިރު، ރިޕޯޓްތައް ބުނާ ގޮތުން ޓްރަމްޕްގެ ހާލަތު އަންނަނީ ދެރަ ވަމުންނެވެ.

އެމެރިކާގެ ރައީށް ޓްރަމްޕް އަކީ ކޮވިޑް-19 ގެ ހައި ރިސްކް ކެޓަގަރީގައި ހިމެނިވަޑައިގަންނަވާ ބޭފުޅެކެވެ.