އެމެރިކާގެ ރައީސް ޑޮނަލްޑް ޓްރަމްޕް ކޮވިޑް-19 އަށް ޕޮޒިޓިވްވުމާއި އެކު އެ ގައުމުގެ ހިިއްސާގެ ބާޒާރަށް ބޮޑެތި ލޮޅުންތަކެއް އަތުވެއްޖެއެވެ.
އެމަނިކުފާނު ކޮވިޑަށް ޕޮޒިޓިވްވި ކަން ހާމަކުރައްވާ ކުރެއްވި ޓުވީޓެއްގައި ވަނީ, އަނބިކަނބަލުން މެލާނިއާ ޓްރަމްޕް ވެސް ކޮވިޑަށް ޕޮޒިޓިވްވެފައިވާކަން ހާމަކުރައްވާފައެވެ. މިއާއި އެކު އެމެރިކާގެ ހިއްސާގެ ބާޒާރަށް އައި ލޮޅުމުގެ އަސަރު އޭޝިއާ އަދި ޔޫރަޕުގެ އިކުއިޓީ ބާޒާރުތަކަށް ކޮށް، އިކުއިޓީ އަގުތައް ވެސް ވަނީ ދަށަށް ގޮސްފައެވެ.
އެމެރިކާގެ ހިިއްސާގެ ބާޒާރަށް މިވަރުގެ ލޮޅުމެއް އައިސްފައިމިވަނީ އެގައުމުގެ ގާނޫނު ހަދާ މަޖިލީހަށް ހުށައަޅާފައިވާ ސްޓިމިއުލަސް ބިލެއް ފާސްނުކުރުމާއި ގުޅިގެން އިންވެސްޓަރުން ނުރުހުން ފާޅުކޮށްފައިވާ ދަނޑިވަޅެއްގައެވެ.
ޓްރަމްޕް ކޮވިޑަށް ޓެސްޓުކުރެއްވީ އެ މަނިކުފާނުގެ އެޑްވައިޒަރެއް ކަމަށްވާ ހޯޕް ހިކްސް ކޮވިޑަށް ޕޮޒިޓިވްވުމުންނެވެ. ރިޔާސީ އިންތިހާބު ބޯމަތިވެފައި ވަނިކޮށް ޓްރަމްޕް ކަރަންޓީނުވާން ޖެހިވަޑައިގަތުމާއި ގުޅިގެން، ދެވަނަ ދައުރަކަށް ހޮވިވަޑައިގަންނަވަން ކުރައްވާ މަސައްކަތަށް ކޮންމެވެސް ވަރެއްގެ ހުރަސްތަކެއް އެޅޭނެ ކަމަށް ބައެއް މާހިރުން ވަނީ ލަފާކޮށްފައެވެ.
