އަންނަ އަހަރުގެ ކުރީކޮޅު އިންޑިއާއިން ކޮވިޑް ވެކްސިން ލިބޭނެ
18 ސެޕްޓެމްބަރު 2020 | ހުކުރު 06:59ވެކްސިން ލިބެންދެން އިޖުތިމާއީ ގައިދުރުކަން ބެހެއްޓުމަށް އިލްތިމާސް ކުރެއްވި
ކޮވިޑް ވެކްސިން ތައްޔާރުކުރަނީ
އަންނަ އަހަރުގެ ކުރީކޮޅު އިންޑިއާއިން ކޮވިޑް-19 ވެކްސިން ލިބޭނެ ކަމަށް އެ ގައުމުގެ ހެލްތް އެންޑް ފެމިލީ ވެލްފެއަރ މިނިސްޓަރ ޑރ. ހަރްޝް ވަރުދަން ވިދާޅުވެއްޖެ އެވެ.
ޑރ. ވަރުދަން ވިދާޅުވީ ކްލިނިކަލް ޓްރެއަލްގެ އެކެއް، ދޭއް އަދި ތިންވަނަ މަރުހަލާއާ ހަމައަށް ވާސިލްވެފައިވާ ކަމަށެވެ. އަދި ވެކްސިން ތައްޔާރު ކުރުމަށް އިންޑިއާއިން މަސައްކަތް ކުރަމުންދަނީ ދުނިޔޭގެ ސިއްޙަތު ޖަމުއިއްޔާ (ޑަބްލިއުއެޗްއޯ) އާއި އެހެނިހެން ބައިނަލްއަޤްވާމީ ޖަމާއަތްތަކުގެ އިރުޝާދުގެ ދަށުން ކަމަށެވެ.
އަދި ވެކްސިން ލިބެންދެން އިޖުތިމާއީ ގައިދުރުކަން ބެހެއްޓުމަށް ވަނީ އިލްތިމާސް ކުރައްވާފައެވެ.
އިންޑިއާ ސަރުކާރުން ކޮވިޑް-19 އާ ދެކޮޅަށް ކުރަމުންދާ މަސައްކަތްތައް ފާހަގަ ކުރައްވާ އޭނާ ވިދާޅުވީ އިންޑިއާގެ ޕްރައިމް މިނިސްޓަރ ނަރެންދްރަ މޯދީ ކޮވިޑް-19ން އެގައުމު ރައްކައުތެރި ކުރުމަށް އަޅަން ޖެހޭ ހުރިހާ ފިޔަވަޅުތަކެއް އަޅުއްވަމުން ގެންދަވާފައިވަނީ ކަމާގުޅުން ހުރި މާހިރުންގެ އިރުޝާދުގެ ދަށުން ކަމަށާއި އެކަމުގެ ސަބަބުން ކުރިއެރުންތަކެއް ހޯދިފައިވާ ކަމަށެވެ.
އެގޮތުން އެގައުމުގައި ކޮވިޑް ޓެސްޓް ކުރެވޭ ލެބޯޓްރީތައް އިތުރުވެފައިވާކަމަށާއި، ދުވާލެއްގެ މައްޗަށް 11 ލައްކައަށްވުރެ ގިނަ މީހުންގެ ސާމްޕަލް ކޮވިޑް -19 ޓެސްޓް ކުރެވެމުންދާ ކަމަށެވެ. އެންމެ ގިނަ މީހުން އެއްދުވަހާ ޓެސްޓް ކުރެވޭ ގައުމަކަށް ކުޑަދުވަސްކޮޅެއްގެ ތެރޭގައި އިންޑިއާ ވެގެންދާނެ ކަމަށް ޑރ. ވަރުދަން ވިދާޅުވިއެވެ.
ކުޑަ ދުވަސްކޮޅެއްގެ ތެރޭގައި އެގައުމުގައި ބޭނުންކުރާނެ ޕީޕީއީ ކިޓްސް އާއި އެން-95 މާސްކް އަމިއްލައަށް އުފެއްދި ގައުމަކަށް އިންޑިއާ ވެފައިވާކަން ވެސް ވަނީ ފާހަގަ ކުރައްވާފައެވެ.
