ސްރީ ލަންކާއަށް ބޯކޮށް ވާރޭވެހި ފެންބޮޑުވެ ހިނގި ބިންގަނޑު ކަނޑައިގެންދިއުމުގެ ހާދިސާތަކާ ގުޅިގެން އެ ގައުމަށް އެހީތެރިކަން ފޯރުކޮށްދިނުމަށް ހޮނިހިރު ދުވަހު ދިޔަ އިންޑިއާގެ އަސްކަރީ މަނަވަރު އައިއެންއެސް ކިރިޗުން އެހީތެެރިކަން ފޯރުކޮށްދިނުމުގެ މަސައްކަތް ފަށައިފިއެވެ.

ފެންބޮޑުވުމާ ބިންގަނޑު ކަނޑައިގެންދިއުމުގެ ހާދިސާގައި މަރުވި މީހުންގެ އަދަދު 151 އަށް އަރާފައިވާއިރު 112 މީހަކުވަނީ ވީނުވީއެއް ނޭނގި ގެއްލިފައި ކަމަަށް ޑިޒާސްޓަރ މެނޭޖްމަންޓް ސެންޓަރުން އާދީއްތަ ދުވަހުވަނީ ބުނެފައެވެ.

ޑިޒާސްޓަރ މެނޭޖް މަންޓުން ބުނީ މޫސުން ގޯސްވެ ހިނގި ހާދިސާތަކުގައި 52 މީހަކު ޒަޚަމްވެފައިވާކަމަށެވެ.

ފެންބޮޑުވުމާއި ބިންގަޑު ކަނޑައިގެން ދިއުމުގެ ސަބަބުން ހިނގި ހާދިސަތަކުގެ އަސަރު 114،124 އާއިލާއަކުން ޖުމްލަ 442،299 މީހަކަށް ކޮށްފައިވާކަމަށް ޑިޒާސްޓަރ މެނޭޖްމަންޓުން ބުނެއެވެ.

 މޫސުމީ ވިއްސާރައިގައި ބުރާސްފަތި ދުވަހާ ހުކުރު ދުވަހު ވެހުނު ވާރޭގައި އެ ގައުމުގެ ހުޅަނގާއި ދެކުނުގެ 14 ޑިސްޓްރިކްޓަކަށް އަސަރުކޮށްފައިވެެއެވެ.

މިއީ 2003 ވަނަ އަހަރަށްފަހު އެގައުމުގައި މޫސުމީ ވިއްސާރައިގައި އެންމެ ބޮޑަށް ފެންބޮޑުވި ފަހަރެވެ.