އިންޑިއާއިން ހޯދަމުންދާ ޑރ. ޒާކިރު ނައިކްއަށް ސައުދީ ސިޓިޒެންޝިޕް ދީފި
20 މެއި 2017 | ހޮނިހިރު 21:40އިންޑިއާއިން މަސައްކަތް ކުރަނީ އިންޓަޕޯލް މެދުވެރިކޮށް ޒާކިރު ހައްޔަރު ކުރުމަށް
ޑރ. ޒާކިރު ނައިކް
ދީނީ ތަގުރީރުތަކުން މަޝްހޫރުކަން ހޯދި ޑރ. ޒާކިރު ނައިކް އަށް ސައުދީ އަރަބިއްޔާއިން ސިޓިޒެންޝިޕް ދީފި ކަމަށް ދަ މިޑްލްއީސްޓް މޮނިޓަރ އިން ޚަބަރު ދީފިއެވެ.
މި ޚަބަރު ބުނާ ގޮތުން، ޒާކިރު ނައިކަށް ސައުދީ އަރަބިއްޔާގެ ސިޓިޒެންޝިޕް ލިބުނީ، ސައުދީ ރަސްގެފާނު ސަލްމާން ބިން އަބްދުލް އަޒީޒު ހަމަޖައްސަވައިދެއްވި ޚާއްސަ އިންތިޒާމެއްގެ ސަބަބުންނެވެ. ރަސްގެފާނުގެ މިއެހީފުޅަކީ އިންޓަރނޭޝަނަލް ޕޮލިސް އޮގަނައިޒޭޝަން، އިންޓަޕޯލްގެ އެރެސްޓް ވޮރަންޓަކުން ޒާކިރު ސަލާމްކޮށްދެއްވުމަށް ކޮށްދެއްވި ކަމެއް ކަމަށް ބެލޭ ކަމަށް މި ޚަބަރުގައި ވެއެވެ.
އިންޑިއާގެ ރައްޔިތެއް ކަމުގައިވާ އުމުރުން 51 އަހަރުގެ ޑރ. ޒާކިރު ނައިކް ގައުމުން ބޭރަށް ދިޔައީ، ޓެރަރިޒަމް އަށް ހިތްވަރުދޭ ކަމަށް އިންޑިއާ ސަރުކާރުން ކުރި ތުހުމަތު ތަކަކާ ގުޅިގެންނެވެ.
ޓެރަރިޒަމްގެ ތުހުމަތުގައި ހުސްވި މަހުގެ ތެރޭގައި ޑރ.ޒާކިރު ހައްޔަރު ކުރުމަށް އިންޑިއާގެ ކޯޓަކުން ދެވަނަ އަމުރެއްވަނީ ނެރެފައެވެ. ޒާކިރުގެ މައްޗަށް ކަޅު ފައިސާ ޑީލް ކުރުމުގެ ތުހުމަތުތައްވެސް ވަނީ ކުރެވިފައެވެ.
ޑރ. ޒާކިރުގެ މައްޗަށް އިންޑިއާއިން މި ތުހުމަތައް އުފުލި އިރު އޭނާ ހުރީ މެލޭޝިއާގައެވެ. އަދި އެއާއެކު އެނބުރި ގައުމަށް ނުދިއުމަށް ނިންމިއެވެ. މީގެ ފަސް އަހަރު ކުރިން މެލޭޝިއާ ސަރުކާރުންވަނީ ޕާމަނަންޓް ރެސިޑެންސީ ޑރ. ޒާކިރަށް ދީފައެވެ.
އިންޑިއާގެ މީޑިއާތަކުން ހާމަކޮށްފައިވާ ގޮތުން އިންޑިއާ ސަރުކާރުން ގެންދަނީ ޑރ. ޒާކިރުގެ ޕާސްޕޯޓް ކެންސަލް ކުރުމާއެކު އިންޓަޕޯލް މެދުވެރިކޮށް އޭނާ ހައްޔަރު ކުރުމުގެ މަސައްކަތް ކުރަމުންނެވެ.
އިންޑިއާއިން ޑރ.ޒާކިރު ނައިކްގެ މައްޗަށް ކޮށްފައިވާ ތުހުމަތު ތަކަށް އޭނާ ގެންދަނީ އިންކާރު ކުރަމުންނެވެ.
