ފަލަސްތީނުގެ ރައީސް މަހްމޫދު އައްބާސް މިއަންނަ މެއި ތިނެއްގައި އެމެރިކާ އަށް ވަޑައިގަންނަވަނީ
20 އެޕްރީލު 2017 | ބުރާސްފަތި 11:31ފަަލަސްތީނާއި އިޒްރޭލާ ދެމެދު ސުލްހަ ގެނައުމަށް މަޝްވަރާ ކުރައްވާނެ
ރައީސް ޓްރަމްޕް (ކ) އަދި ރައީސް އައްބާސް (ވ)
އަންނަ މެއިމަހު ފަލަސްތީނުގެ ރައީސް މަހްމޫދު އައްބާސް އެމެރިކާއަށް ވަޑައިގެން، ވައިޓް ހައުސްގައި އެމެރިކާގެ ރައީސް ޑޮނަލްޑް ޓްރަމްޕާއި ބައްދަލު ކުރައްވާނެ ކަމަށް ވައިޓް ހައުސްއިން ބުނެފިއެވެ.
ވައިޓް ހައުސްގެ ތަރުޖަމާނު ޝޯން ސްޕައިސާ ބުދަ ދުވަހު ވިދާޅުވީ ފަލަސްތީނުގެ ރައީސް މި އަންނަ މޭމަހު ތިންވަނަ ދުވަހު އެމެރިކާއަށް ވަޑައިގަންނަވާނެ ކަމަށެވެ. ރިޕޯޓުތައް ބުނާގޮތުން ދެ ލީޑަރުން ފަަލަސްތީނާއި އިޒްރޭލާ ދެމެދު ސުލްހަ ގެނައުމަށް ހުރި ގޮތްތަކާއި ބެހޭގޮތުން މަޝްވަރާ ކުރައްވާނެ އެވެ.
2014 ވަނަ އަހަރުން ފެށިގެން މެދުއިރުމަތީގެ ސުލްހައިގެ މަސައްކަތްތައް ހުއްޓިފައިވާއިރު، ވައިޓް ހައުސްގެ ތަރުޖަމާނު ވިދާޅުވީ ރައީސް މަހްމޫދު އައްބާސްގެ ދަތުރުފުޅަކީ މެދުއިރުމަތީގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތަށް ބާރު އެޅުމުގެ ފުރުސަތަކަށް ހަދަން އެމެރިކާ އިން މަސައްކަތް ކުރާނެ ކަމަށެވެ.
ފަލަސްތީނުގެ ރައީސް މަހްމޫދު އައްބާސް ވައިޓް ހައުސްއަށް ވަޑައިގަތުމަށް އެމެރިކާގެ ރައީސް ދައުވަތު އެރުވީ މިދިޔަ މާޗްމަހު ފަލަސްތީނުގެ ރައީސާއި ފޯނުން ގުޅުއްވައި ވާހަކަފުޅު ދައްކަވަމުންނެވެ.
