ދުނިޔެއިން ކޮވިޑް-19 ޖެހުނު މީހުންގެ އަދަދު 30 މިލިއަނަށްވުރެ މައްޗަށް!
އެމެރިކާއިން ޕޮޒިޓިވްވި މީހުންގެ އަދަދު 7 މިލިއަނާއި ކައިރިކުރަނީ
ކޮވިޑް-19އިން ރައްކާތެރިވުމަށް މާސްކް އަޅައިގެން މަގުތަކުގައި ހަރަކާތްތެރިވުން
މުޅި ދުނިޔެއިން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު 30 މިލިއަނަށްވުރެ އިތުރުވެ، ބަލި ޖެހިގެން މަރުވި މީހުންގެ އަދަދު މިލިއަނަކާ ގާތްކޮށްފިއެވެ.
އެންމެ ފަހުގެ ތަފާސްހިސާބުތައް ދައްކާގޮތުން މިހާތަނަށް މުޅި ދުނިޔެއިން 30،042،299 މީހުން ވައިރަސްއަށް ޕޮޒިޓިވް ވެފައިވާއިރު، މިހާތަނަށް 945،164 މީހުން ވައިރަސް ޖެހިގެން މަރުވެފައި ވެއެވެ.
މިހާތަނަށް އެންމެ ގިނަ އަދަދެއްގެ ބަޔަކު ޕޮޒިޓިވްވެފައި ވަނީ ވެސް އަދި މަރުވެފައި ވަނީ ވެސް އެމެރިކާއިންނެވެ. އެގޮތުން އެމެރިކާއިން ޕޮޒިޓިވްވި މީހުންގެ ޖުމުލަ އަދަދު 6 މިލިއަނަށް ވުރެން މައްޗަށް އަރާފައިވާއިރު، ބަލި ޖެހިގެން މަރުވި މީހުންގެ އަދަދު ވަނީ 201،348ށް އަރާފައެވެ.
ދެވަނައަށް އެންމެ ގިނަ އަދަދެއްގެ މީހުން ޕޮޒިޓިވްވެފައި ވަނީ އިންޑިއާއިންނެވެ. އެގޮތުން އިންޑިއާއިން މިހާތަނަށް 5 މިލިއަނަށް ވުރެ ގިނަ މީހުން ޕޮޒިޓިވް ވެފައިވާއިރު، އެ ގައުމުގައި ދަނީ ބަލި ހަލުވިކަމާއެކު ފެތުރެމުންނެވެ. އިންޑިޔާއަކީ މިވަގުތު ދުވާލެއްގެ މައްޗަށް އެންމެ ގިނަ އަދަދެއްގެ މީހުންނަށް ކޮވިޑް-19 ޖެހިގެން ރިޕޯޓްކުރަމުން އަންނަ ގައުމެވެ. އެގޮތުން އެގައުމުގައި މިދިޔަ ހަފްތާގައި ވަނީ އެއްދުވަހާ 97،859 މީހުންނަށް ވައިރަސް ޖެހިގެން ދުނިޔޭގައި އެންމެ ގިނަ މީހުންނަށް އެއް ދުވަހާ އެއް ގައުމަކުން ވައިރަސް ޖެހިގެން ރިކޯޑް ހަދާފައެވެ.
ފާއިތުވި 24 ގަޑިއިރު ތެރޭގައި އެންމެ ގިނަ އަދަދެއްގެ ޕޮޒިޓިވް ކޭސް ރިޕޯޓް ކުރެވުނު ޤައުމުތަކުގެ ތެރޭގައި އިންޑިއާ، އެމެރިކާ، ބްރެޒިލް ފަދަ ޤައުމުތައް ހިމެނެއެވެ.
އޭގެ އިތުރުން، މުޅި ދުނިޔެއިން މި ބަލި ޖެހުނު މީހުންގެ ތެރެއިން 21،808،409 ބަލިން ފަސޭހަވެފައެވެ. ދުނިޔޭގެ ސިއްހަތު ޖަމިއްޔާއިން ވަނީ، އެއް ދުވަހުގެ ތެރޭގައި ކޮވިޑް ޖެހުނު މީހުންގެ ރެކޯޑް މިދިޔަ އާދިއްތަ ދުވަހު އަނެއްކާވެސް އާވިކަމަށް ބުނެފައެވެ. މިއީ 24 ގަޑިއިރު ތެރޭގައި އެންމެ ގިނަ އަދަދެއްގެ މީހުންނަށް ކޮވިޑް ޖެހިގެން ރިޕޯޓްކުރި ދުވަހެވެ.
ޑަބްލިޔުއެޗްއޯގެ ވެބްސައިޓުން ދައްކާގޮތުގައި އެންމެ ގިނަ އަދަދެއްގެ ކޭސްތައް ރިޕޯޓްކޮށްފައިވަނީ އިންޑިޔާ، އެމެރިކާ އަދި ބްރެޒިލް އިންނެވެ. އެގޮތުން، އިންޑިޔާއިން އެދުވަހު 94،372 މީހުންނަށް ވައިރަސް ޖެހުނުކަމަށް ރިޕޯޓްކޮށްފައިވާއިރު، އެމެރިކާއިން 45،523 މީހުންނަށް އަދި ބްރެޒިލް އިން 43،718 މީހުންނަށް ވަނީ ވައިރަސް ޖެހިފައެވެ.
