ކޮލަމްބޯގެ ކުނިފުންޏެއް ފުރޮޅާލުން: މިހާތަނަށް 29 މަރު، އިތުރު 30 މީހުން ނުފެނޭ
މަރުވި މީހުންގެތެރޭގައި 11 އަހަރާއި 15 އަހަރުގެ ހަތަރު ކުޑަކުދިން ހިމެނޭ
ކުނިފުނި ފުރޮޅާލުމުގެ ހާދިސާގައި ގެތަކެއް ހަލާކުވެފައި
ސްރީލަންކާގެ ވެރިރަށް ކޮޅުނބުގައި ހުރި 300 މީޓަރު އުސް ބިޔަ ކުނިފުންޏެއް، ފުރޮޅާލުމުގެ ހާދިސާ އާއި ގުޅިގެން މަރުވި މީހުންގެ އަދަދު 29 އަށް އަރައިފި ކަމަށާއި، އަދި އިތުރު 30 ކަށް މީހުން ހޯދުމުގެ މަސައްކަތް ކުރަމުންދާ ކަމަށް ހޯމަ ދުވަހު ހެނދެނު އޮފިޝަލުން ބުނެފިއެވެ.
ދިރިހުރި މީހެއްގެ ހިލަމެއް ވޭތޯ ސްރީލަންކާ ސިފައިންނާއި، ފުލުހުންނާއި އަދި އާންމުން މަސައްކަތް ކުރަމުންދާއިރު މިހާދިސާ އާއި ގުޅިގެން 150 ގެއެއް ވަނީ ހަލާކުވެފައެވެ. ހުކުރު ދުވަހު ހިނގި މިހާދިސާ ހިނގާފައި ވަނީ ކޮލަމްބޯގެ އުތުރުއިރުމަތީ ސަރަހައްދެއްގައެވެ.
ހާދިސާ ހިނގި ސަރަހައްދުގެ ކުރީގެ މޭޔަރެއް ކަމަށްވާ ގުޓިލާ ސިލްވާ ވިދާޅުވެފައި ވަނީ ކުނިފުނި ބޮޑުވެ އާންމުންނަށް އޭގެ ނުރައްކާ ފޯރަފާނެ ކަމުގެ ބިރު އުފެދިފައިވީ ނަމަވެސް، ކޮލަމްބޯގެ މުނިސިޕަލްޓީން ގެންދިޔައީ އެތަނަށް ކުނިއަޅަމުން ކަމަށެވެ. ދުވާލެއްގެ މައްޗަށް 800 ޓަނުގެ ކުނި އެކުނިފުންޏަށް އަޅަމުންދާ ކަމަށްވެއެވެ.
ކުނިފުނި ފުރޮޅާލުމުގެ ހާދިސާ ހިނގީ ބޯކޮށް ވާރޭ ވެހުމުގެ ސަބަބުން ކުނިފުނި ރޫޅުމުގެ ސަބަބުން ކަމަށް ވެއެވެ. އެހެންނަމަވެސް ބުރާސްފަތި ދުވަހުގެ ރޭ ކުނިފުނީގައި އަލިފާން ރޯވެ އެނދުމުގެ ސަބަބުން އިތުރަށް ބަލިކަށިވެގެން ދިޔަކަމަށް ފުލުހުން ބުނެއެވެ.
ރިޕޯޓުތައް ބުނާގޮތުން މަރުވި މީހުންގެތެރޭގައި 11 އަހަރާއި 15 އަހަރުގެ ހަތަރު ކުޑަކުދިން ހިމެނެއެވެ.
ކުނިފުނި ފޭބުމުގެ ސަބަބުން ގެދޮރު ހަލާކުވެ ހާލުގައި ޖެހުނު އާންމުންގެ 600 އަށްވުރެ ގިނަމީހުން ހިޔާވަހިކަން ހޯދަމުން ދަނީ ސަރުކާރުން ހިންގާ ސްކޫލްތަކުގައެވެ.
