ސްޕެއިންގެ ޕްރިންސަސް ކަރަންޓީނަށް
12 ސެޕްޓެމްބަރު 2020 | ހޮނިހިރު 16:45ޕްރިންސެސް ލިއެނޯރ ކޮވިޑް-19 އަށް ޓެސްޓް ކުރާނެ
ސްޕެއިންގެ ޕްރިންސެސް ލިއެނޯރ
ސްޕެއިންގެ ރަސްގެފާނު ފެލީޕޭގެ ދަރިކަނބަލުން ޕްރިންސެސް ލިއެނޯރ އާ އެއް ކުލާހުގައި ކިޔަވަމުންދާ ކުއްޖަކު ކޮވިޑް-19 އަށް ޕޮޒިޓިވްވުމާއި ގުޅިގެން ކަރަންޓީނަށް ގޮސްފައިވާ ކަމަށް ސްޕެއިންގެ ރޯޔަލް ހައުސް އިން ބުނެފިއެވެ.
އުމުރުން 14 އަހަރުގެ ޕްރިންސެސް ލިއެނޯރ ކިޔަވަމުން ގެންދަވަނީ މެޑްރިޑްގައި ސަންތަ މެރިއާ ޑެ ލޮސް ރޮޒާލެސް ސްކޫލުންނެވެ. ޕްރިންސެސް ލިއެނޯރ އާއެކު ކިޔަވަމުންދާ ކުއްޖަކު ކޮވިޑް-19 އަށް ޕޮޒިޓިވްވުމާއި ގުޅިގެން ކުލާހުގެ އެހެން ކުދިންނެކޭ އެއްފަދައިން ލިއެނޯރ ވެސް ވައިރަސް އަށް ޓެސްޓް ކުރާނެ އެވެ.
ރޯޔަލް ހައުސްގެ ސްޕޯކްސްމަން ބުނެފައިވަނީ ދަރިކަނބަލުން ކަރަންޓީނަށް ދިޔަ ނަމަވެސް ސްޕެއިންގެ ރަސްގެފާން ފެލިޕޭ އާއި ކްޔީން ލެޓީޒިއާ ރަސްކަމުގެ ޒިންމާތައް ނަންގަވަމުން ގެންދަވާނެ ކަމަށެވެ.
ސްޕެއިންގެ އަށް މިލިއަން ކިޔަވާ ކުދިން އަލުން ސްކޫލްތަކަށް ނިކުންނަށް ފަށާފައިވަނީ މިދިޔަ ހަފްތާގައެވެ. އެހެންނަމަވެސް ބައެއް ކުލާސްތަކުގެ ކުދިން ކޮވިޑް-19 އަށް ޕޮޒިޓިވްވުމާއި ގުޅިގެން ބައެއް ކުލާސްތަކާއި ސްކޫލްތައް ވަނީ ބަންދު ކޮށްފައެވެ.
ސްޕެއިންގައި ހުކުރު ދުވަހު 4708 މީހުންނަށް ކޮވިޑް-19 ޖެހިފައިވާއިރު ވައިރަސް ޖެހިފައިވާ މީހުންގެ އަދަދު ވަނީ 566،326ށް އަރާފަ އެވެ. ސްޕެއިން އަކީ ޔޫރަޕްގެ ގައުމުތަކުން އެންމެ ގިނަ މީހުންނަށް ވައިރަސް ޖެހިގެން ރިޕޯޓް ކުރަމުން އަންނަ ގައުމެވެ. އެ ގައުމުގައި މިހާތަނަށް 29،747 މީހުން ވަނީ މި ބަލީގައި މަރުވެފައެވެ.
