މަޙްލޫފަކީ ކުޅިވަރަށް ލޯބިކުރައްވާ، އެއްވަނައިގެ ވަޒީރެއް: ބައްސާމް
ވަޒީރުކަމުގެ މަގާމާ ހަވާލުވެ ވަޑައިގެން އެފްއޭއެމަށް ވަރަށް ބޮޑަށް ފާޑު ވިދާޅުވެ މަޙްލޫފް ވަނީ ކުރިން ވާހަކަ ދައްކަވާފައި
ރައީސް ޞާލިޙާއި، ކުޅިވަރާ ބެހޭ ވަޒީރު އަދި އެފްއޭއެމްގެ ރައީސް: ރާއްޖެ އާއި ގުއާމް ބައްދަލުކުރި މެޗު ބައްލަވާލައްވަނީ
މިހާރުގެ ކުޅިވަރާ ބެހޭ ވަޒީރަކީ ކުޅިވަރު ވަރަށް ރަނގަޅަށް ދެނެވަޑައިގަންނަވާ، ކުޅިވަރު ދެކެ ލޯބިވާ ވަޒީރެއް ކަމަށް ވިދާޅުވެ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ކުޅިވަރާ ބެހޭ ވަޒީރު އަޙްމަދު މަޙްލޫފަށް ވަރަށް ބޮޑަށް ތާރީފު ކުރައްވާ ވާހަކަ ދައްކަވައިފިއެވެ.
ވަޒީރުކަމުގެ މަގާމާ ހަވާލުވެ ވަޑައިގެން އެފްއޭއެމަށް ވަރަށް ބޮޑަށް ފާޑު ވިދާޅުވެ މަޙްލޫފް ވަނީ ކުރިން ވާހަކަ ދައްކަވާފައެވެ. އެކަމަކު އޭގެ ފަހުން އެފްއޭއެމާ ގުޅޭގޮތުން އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަލީ އާޒިމް ރައްޔިތުންގެ މަޖިލީހަށް މައްސަލައެއް ހުށަހަޅައި، މަޙްލޫފް މަޖިލީހަށް ހާޒިރު ކުރެއްވުން ވަނީ އެފްއޭއެމްގެ ދިފާއުގައި ވާހަކަ ދައްކަވާފައެވެ.
ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި މަޙްލޫފަށް ތާރީފު ކުރައްވާ ވާހަކަ ދައްކަވަމުން އެފްއޭއެމްގެ ރައީސް ބައްސާމް ވިދާޅުވީ، ބައިނަލްއަގުވާމީ ފެންވަރުގައި ފުޓްބޯޅަ ހިނގާ ގޮތާއި، ފުޓްބޯޅައިގެ އިންތިޚާބުތައް ކުރިއަށްދާ ގޮތް އެންމެ ރަނގަޅަށް އެނގިލައްވާ ބޭފުޅުންގެ ތެރޭގައި ވަޒީރު ހިމެނިވަޑައިގަންނަވާ ކަމަށެވެ. އަދި ކުރީ ސަރުކާރުތަކުގައި ފެނިފައިވާ ކުޅިވަރާ ބެހޭ ވަޒީރުންނާ އަޅާ ކިޔާއިރު، މަޙްލޫފަކީ ހާސްބައި ތަފާތު ވަޒީރެއް ކަމަށް ބައްސާމް ވިދާޅުވިއެވެ.
ބައްސާމް ވިދާޅުވީ، މަޖިލީހުގެ ތެރެއިން މަޙްލޫފަށް ކުރިމަތި ކުރުވާ ޕްރެޝަރަކީ އެކަމުގައި އެއްވެސް އަސާސެއް އޮވެގެން ކުރިމަތި ކުރުވާ ޕްރެޝަރެއް ކަމަށް ދެކިވަޑައިނުގަންނަވާ ކަމަށެވެ. އަދި ވަޒީރު މަސައްކަތް ކުރައްވަނީ ހުރިހާ ކުޅިވަރަކަށް ހަމަހަމަ ފުރުސަތުތަކެއް ދެއްވާ، ރާއްޖޭގައި ކުޅިވަރު ކުރިއެރުވުމަށް ކަމަށްވެސް ބައްސާމް ވިދާޅުވިއެވެ.
މަޙްލޫފަކީ ފުޓްބޯޅަ އެހެން ހަރުފަތަކަށް ގެންދިއުމަށް ގަދައަޅާ މަސައްކަތް ކުރައްވާ ބޭފުޅެއްކަން ފާހަގަކުރައްވާ ބައްސާމް ވިދާޅުވީ، އަމިއްލަފުޅު އިސް ނެންގެވުމުގެ މަތިން އެފްއޭއެމްގެ ކަންތައްތަކާއި ކުލަބުތަކުގެ ކަންތައްތައް ވަރަށް ގާތުން މަޙްލޫފް ބައްލަވަމުންދާ ކަމަށެވެ. އަދި ވަކިން ހާއްސަކޮށް އޭއެފްސީ ފަދަ ބޮޑު މުބާރާތްތަކަށް ކުލަބުތަކުން ވަމުންދާ ތައްޔާރީތަކާއި، ހުރި ދަތިތައް އޮޅުންފިލުވައި އެކަމުގައި އަމަލީ ގޮތުން އުޅުއްވާ ކަމަށެވެ.
ބައްސާމް ވިދާޅުވީ ވަޒީރުގެ މަގާމުގެ މަސްއޫލިއްޔަތު އަދާކުރައްވަމުން ދަނިކޮށް މަޖިލީހުން ވަޒީރަށް ޕްރެޝަރު ކުރުވަން ޖެހޭ ސަބަބެއް ވިސްނި ވަޑައިނުގަންނަވާ ކަމަށެވެ. އަދި އުންމީދު ކުރަނީ މަޖިލީހުންވެސް ވަޒީރުގެ މަސައްކަތްތަކަށް އެއްބާރުލުން ދެއްވައި، ކުޅިވަރު އެހެން ހަރުފަތަކަށް ގެންދިއުމަށް އެންމެން ގުޅިގެން މަސައްކަތް ކުރުން ކަމަށެވެ.
