ކޮރޯނާވައިރަސް (ކޮވިޑް-19) ގުޅިގެން ކުޅިވަރުގެ ހަރަކާތްތައް ހުއްޓި، ކުޅިވަރު މައިދާންތައް ފަޅުވެފައި ވީ ނަމަވެސް، މި ވަގުތު ކުޅިވަރުގައި ހަރަކާތްތެރިވާ ފަރާތްތަކުން ގޭގައި ތިބެ، ކުޅިވަރަށް ކުރަމުންދާ މަސައްކަތްތަކަކީ ފަހަށް ރައްކާ ކުރެވޭ އަގު ބޮޑު މަސައްކަތެއް ކަމަށް ބެޑްމިންޓަން އެސޯސިއޭޝަން އޮފް މޯލްޑިވްސްގެ ރައީސް މޫސާ ނާޝިދު ވިދާޅުވެއްޖެ އެވެ.
ރާއްޖެޓީވީގެ ކުޅިވަރު ޕްރޮގްރާމްގައި ވާހަކަ ދައްކަވަމުން މޫސަ ވިދާޅުވީ ދުނިޔޭގެ ފެންވަރުގައި މިހާރު އަމަލު ކުރަމުންދާ އުސޫލަށް ބަލާއިރު ކުޅިވަރަކީ ވިޔަފާރި އެއް ކަމަށާއި އެހެން ކަމުން އެކަމަށް އަބަދުވެސް ވިސްނުން ގެންގުޅެން ޖެހޭ ކަމަށެވެ. އަދި ދުނިޔޭގެ މިހާރުގެ ހާލަތުން މަސައްކަތް ކުރެވެން އޮތީ ވަކިވަކިން ކަމަށާއި ގައުމުތަކުގެ ހާލަތު ރަނގަޅު ވެގެންދާ މިންވަރަކަށް ކަންކަން ކުރަން ބެޑްމިންޓަން ވޯލްޑްގެ ގަވަނިންގ ބޮޑީން ވެސް ވިސްނަމުންދާއިރު، ކުޅިވަރު ވެސް އޭގެ ޒާތުގައި ކުރިޔަށްދާނީ ބޮޑެތި ބިޔަ ވިޔަފާރިތަކުގެ ވަސީލަތް މެދުވެރިކޮށް ކަމަށް މޫސަ ވިދާޅުވި އެވެ.
ބިޒްނަސް ކޮމްޕޯނަންޓް މީގައި ހިމެނޭކަން އަޅުގަނޑުމެން އެންމެން ގަބޫލުކޮށްފި. ކުޅިވަރު ކުޅޭ ކުޅުންތެރިން ވެސް ކުޅިވަރު ކުރިއަރުވަން މަސައްކަތް ކުރާ ފަރާތްތަކުން އަދި ކޯޗުންނާއި ސަޕޯޓަރުން ވެސް ބިޒްނަސް ކޮމްޕޯނަންޓްގެ ތެރެއިން ޑްރައިވް ކުރަން މަސައްކަތްކޮށްގެން ކުރިއެރުންތަކެއް ހޯދޭނެ. މި ވަގުތު ގޭގައި ތިބެގެން ކޮށްލާ ކަސްރަތު އަދި ކުޅިވަރުގެ ކަންކަން، ކުޅުންތެރިންނާއި ދާއިރާގައި އުޅޭ ފަރާތްތަކަށް އުނދަގޫ ވެދާނެ. އެހެން ނަމަވެސް މީގެ 10 އަހަރު ނޫނީ 20 އަހަރު ފަހުން މިވާނެ ވަރަށް އަގުބޮޑު ރައުސުލްމާލަކަށް. އެ މަސައްކަތްތައް ވެގެންދާނެ ވަރަށް ބޮޑު ވެލިއު އެޑަޑް އެސަޓަކަށް.މޫސާ ނާޝިދު
ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) ގެ ކައުންސިލުގެ މެމްބަރުގެ މަގާމާއި ދެކުނު އޭޝިއާގެ ބެޑްމިންޓަން ފެޑެރޭޝަނުގެ ސެކްރެޓަރީ ޖެނެރަލްގެ މަގާމުގެ އިތުރުން ދުނިޔޭގެ ބެޑްމިންޓަނުގެ އެންމެ ބޮޑު އަދި އެންމެ ނުފޫޒު ގަދަ ސަރަހައްދީ ޖަމިއްޔާ ކަމަށްވާ ބެޑްމިންޓަން އޭޝިއާގެ ޖެނެރަލް ސެކްރެޓަރީގެ މަގާމު އަދާކުރަމުންދާ މޫސަ ވިދާޅުވީ ބިޒްނަސް ކޮމްޕޯނަންޓްގެ ވިސްނުމުގައި ބީޑަބްލިއުއެފް އިން މަސައްކަތް ފަށާފައިވާއިރު، އެންމެ އެކްޓިވް ކޮންޕޯނަންޓަކަށް ހަދާފައި ވަނީ މާކެޓިން ކޮމިޓީ ކަމަށެވެ.
މާކެޓިން ކޮމިޓީން ކުރަމުންދާ މަސައްކަތުގެ ތެރޭގައި ދުނިޔޭގެ އެކި ސަރަހައްދުގައި ތިބި ބެޑްމިންޓަން ކުޅުންތެރިން ކުރަމުންދާ މަސައްކަތްތައް އެއްތަންކޮށް، އެކިއެކި މީޑީއާ ޕްލެޓްފޯމްތަކުގައި ބޫސްޓް ކުރުމަކީ މިވަގުތަށް ކުރެވޭނެ އެންމެ ރަނގަޅު މަސައްކަތް ކަމަށާއި، މިހާލަތުގައި ވިސްނަން ޖެހޭ ކަމަކީ ކުރެވޭނެ ކަންތަކުގެ ވާހަކަ ދައްކައިގެން ކުޅުންތެރިންނާއި ހިންގަން ތިބި ފަރާތްތައް އެކަމަށް ހޭނުވުން ކަމަށް މޫސަ ވިދާޅުވިއެވެ.
2019 ވަނަ އަހަރަކީ ދިވެހިރާއްޖޭގެ ކުޅިވަރުގެ ތާރީޚުގައި އެންމެ ކާމިޔާބު އަހަރު ކަމަށާއި އެކަން އެގޮތަށް ކުރެވިގެންދިޔައީ ސީދާ ކުޅިވަރާ ބެހޭ ވަޒީރު އެކަމަށް އިސްނަގައިގެން ކުޅިވަރުތަކުން ބޭނުންވާ ކަންކަން ބަލައްވާ، އެކަން ކުރެއްވުމުން ކަމަށް މޫސަ ވިދާޅުވިއެވެ.
މިއަދުގެ ހާލަތުން ބެޑްމިންޓަން ދެން މަސައްކަތް ކުރާނީ ޕްލޭން ބީ ހިފައިގެން ކަމަށާއި އެ ގޮތަށް މަސައްކަތް ކުރަން ނިންމީ މިހާރު އޮތް ހާލަތުން އަހަރުގެ ކުރީކޮޅު ހެދި ބަޖެޓާއި ހެދި ކަލަންޑަރާއެކު މަސައްކަތް ނުކުރެވޭނެތީ ކަމަށްވެސް މޫސާ ވިދާޅުވިއެވެ.
މި ހާލަތުން ރަނގަޅުވެ، އާންމު ހާލަތަށް ރުޖޫއުވެވޭއިރު، އަޅުގަނޑުމެން ވިސްނުން ގެންގުޅެން ޖެހޭނީ މިހާރު މި ލިބޭ ގެއްލުމުން ސަލާމަތްވެ، ކުރިޔަށް ދިޔުންކަން ފާހަގަކޮށް މޫސަ ވިދާޅުވީ އަންނަ އަހަރު ވެސް ބޮޑެތި މުބާރާތްތައް ފެށިގެންދާނެ ކަމަށް ގަބޫލު ނުކުރެވޭތީ، އެންމެ މުހިންމީ މި އޮތް ހާލަތުން އަރައިގަނެ ކުރިޔަށްދެވޭނެ ރަނގަޅު ޕްލޭނެއް އެކުލަވާލުން ކަމަށެވެ.
މި ވަގުތު މާލެ އޮތް ހާލަތުން، މާލޭ ސަރަހައްދުގައި މުބާރާތްތައް ބޭއްވިދާނެ ކަމަށް ގަބޫލު ނުކުރެވޭތީ، މިހާރު ވިސްނުން ހުރީ ރާއްޖޭގައި ބެޑްމިންޓަން ކުޅެވޭނެ ސަރަހައްދުތަކުގައި މުބާރާތް ފެށިގެން ދިޔުން ކަމަށްވެސް މޫސަ ވިދާޅުވި އެވެ.
