15 ޗެމްޕިއަނުން އަންނަނީ ހަމައެކަނި އެވޯޑް ހަފްލާގައި ބައިވެރިވެލާކަށް ނޫން، ކުޅިވަރަށް ފައިދާކުރާނެ – މިނިސްޓަރު މަހުލޫފް
ޗެމްޕިއަނުން ރާއްޖެ ގެނައުމަށް ބޮޑު ޚަރަދެއް ނުކުރަން- މިނިސްޓަރު
މިނިސްޓަރު މަހުލޫފް ކައުންޓްޑައުން ޝޯވގައި
އަންނަ ބުރާސްފަތި ދުވަހުގެ ރޭ ބާއްވާ މޯލްޑިވްސް ސްޕޯރޓްސް އެވޯޑްސްގައި ބައިވެރިވުމަށް އެކި ކުޅިވަރުތަކުން ދުނިޔޭގެ ޗެމްޕިއަނުންނާއި, ލެޖެންޑުން ރާއްޖެ އަންނަނީ ހަމައެކަނި އެވޯޑް ހަފްލާގައި ބައިވެރިވެލަން ނޫންކަމަށް ޔޫތް މިނިސްޓަރު އަހުމަދު މަހުލޫފް ވިދާޅުވެއްޖެއެވެ.
ރާއްޖެޓީވީން ގެނެސްދޭ ކައުންޓްޑައުން ޝޯވގައި މިނިސްޓަރު މަހުލޫފް ވިދާޅުވީ އެވޯޑް ހަފްލާގައި ބައިވެރިވުމަށް 15 ޗެމްޕިއަނުން, ލެޖެންޑުން ރާއްޖެ އަންނާނެކަމަށެވެ. އަދި ޗެމްޕިއަނުން މިހާރު ވަނީ ރާއްޖެ އަންނަން ފަށާފައެވެ. މިނިސްޓަރު ވިދާޅުވީ އެވޯޑް ހަފްލާގައި ބައިވެރިވުމުގެ އިތުރުން ކުޅިވަރު އެތުލީޓުންނާއި, އެސޯސިއޭޝަންތަކާއެކު ޗެމްޕިއަނުން ވަގުތު ހޭދަކުރާނެކަމަށެވެ. އެކިކަހަލަ ޕްރޮގްރާމްތައް ރޭވިފައިވާކަމަށް މިނިސްޓަރު ވިދާޅުވިއެވެ.
ޔޫތު މިނިސްޓަރު މަހުލޫފު ވިދާޅުވީ މިހާރުވެސް ދުނިޔޭގެ ޗެމްޕިއަނުން ރާއްޖެ އަންނަކަން އިއުލާންކުރަން ފެށި ހިސާބުން, އަދި އެމީހުން ރާއްޖެ އައިސް ރާއްޖޭގެ ބައެއް މަންޒަރުތައް ސޯޝަލް މީޑިޔާގައި ހިއްޞާކުރަން ފެށުމުން އެވޯޑްގެ ވާހަކަ ވަރަށް ބޮޑަށް ފެތުރެމުންދާކަމަށެވެ. ދުނިޔޭގެ ބައެއް މީޑިޔާތަކުންނާއި, ބައެއް އެތްލީޓުންވެސް ގުޅުއްވަމުންދާކަމަށްވެސް އޭނާ ވިދާޅުވިއެވެ.
މިނިސްޓަރު ވިދާޅުވީ ބައެއް ބޭފުޅުންނަށް ޤަބޫލުކުރެއްވިފައިވާ ގޮތަށް ޗެމްޕިއަނުން ރާއްޖެ ގެނައުމަށް ބޮޑު ޚަރަދެއް ނުކުރައްވާކަމަށެވެ. އެކަމަށް ކުރައްވަނީ ނިސްބަތުން ކުޑަ ޚަރަދެއްކަމަށް ވިދާޅުވިއެވެ. ރާއްޖޭގެ އެތުލީޓުންނާއި, ކުޅިވަރުގެ ދާއިރާގެ ޚިދުމަތްތެރިންގެ އަގު ވަޒަން ކުރަންޖެހޭނީ ބޮޑުކޮށް ކަމަށާއި, ސަރުކާރުން އެކޮމިޓްމަންޓް ދޭނަމަ ކޮންމެ އަހަރަކުވެސް އެކަން އެގޮތަށް ކުރެވޭނެކަމަށް މިނިސްޓަރު ވިދާޅުވިއެވެ.
މިނިސްޓަރު މަހުލޫފް ދެއްވި ޔަޤީންކަމަކީ އެވޯޑް ލިބޭ ފަރާތްތައް ކަނޑައެޅުމުގައި މިނިސްޓްރީގެ އެއްވެސް ދައުރެއް ނޯންނާނެކަމެވެ. އަދި ވަކި މީހަކަށް ނުވަތަ އެތްލީޓަކަށް އެވޯޑް ދިނުމަށް އަދި ނުދިނުމަށްވެސް މިނިސްޓްރީންވެސް އަދި މިނިސްޓަރުވެސް އެއްވެސް މަސައްކަތެއް ނުކުރައްވާނެކަމުގެ ޔަޤީންކަން ދެއްވިއެވެ.
