މިހާރު ފަށާފައިވާ މަޝްރޫޢުތައް ނިމޭއިރު ތާރީޚުގައިވެސް ނުދެކޭ ތަރައްޤީ ކުޅިވަރަށް އަންނާނެ: ރައީސް

ކުޅިވަރުގެ ދާއިރާއަށް މާލެ އާއި ރަށްރަށުގައި މިހާރު ފަށާފައިވާ ކުޅިވަރު ދާއިރާގެ މަޝްރޫޢުތައް ފުރިހަމަވެގެންދާއިރު، ރާއްޖޭގެ ތާރީޚުގައިވެސް ކުޅިވަރު ވަސީލަތްތައް ތަރައްޤީނުވާ މިންވަރަށް، އެ ވަސީލަތްތައް ތަރައްޤީވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙުގެ ތިންވަނަ ރިޔާސީ ބަޔާން އިއްވެވުމުގެ ޖަލްސާގައި ބުރާސްފަތި ދުވަހު ވާހަކަފުޅު ދައްކަވަމުން ވިދާޅުވީ ކޮވިޑް-19 ގެ ފުރަބަންދުގެ ތެރޭގައިވެސް ކުޅިވަރު ވަސީލަތްތައް ތަރައްޤީކުރުމާއި، ދުޅަހެޔޮ ހަށިހެޔޮ ދިރިއުޅުމެއް ހޯދައިދިނުމުގެ ސިޔާސަތުގެ ދަށުން، މިދިޔަ އަހަރު މުހިންމު މަސައްކަތްތަކެއް ކުރެވިފައިވާ ކަމަށެވެ. އެގޮތުން މާލެ އާއި ރަށްރަށުގައި މިހާރު ފަށާފައިވާ ކުޅިވަރު ދާއިރާގެ މަޝްރޫޢުތައް ފުރިހަމަވެގެންދާއިރު، ރާއްޖޭގެ ތާރީޚުގައިވެސް ކުޅިވަރު ވަސީލަތްތައް ތަރައްޤީނުވާ މިންވަރަށް، އެ ވަސީލަތްތައް ތަރައްޤީވާނެ ކަމަށް ރައީސް ވިދާޅުވިއެވެ.

ރައީސް ޞާލިޙް ތިންވަނަ ރިޔާސީ ބަޔާން އިއްވިއިރު، އެންމެ ގިނަ މަޝްރޫއުތަކެއް މި ސަރުކާރުގައި މިހާތަނަށް ހިންގާފައިވަނީވެސް ކުޅިވަރުގެ ދާއިރާއަށެވެ. އެގޮތުން މިހާތަނަށް ކުޅިވަރުގެ މަޝްރޫއުތަކަށް 345 މިލިޔަން ރުފިޔާއަށް ވުރެ ގިނައިން ސަރުކާރުން ވަނީ ޚަރަދުކޮށްފައެވެ.

އަދި ކުޅިވަރުގެ ދާއިރާއިން ޒުވާނުން ބިނާކުރުމުގައި ބައިނަލްއަގުވާމީ މުބާރާތްތަކަށް އަމާޒުކޮށްގެން، ރާއްޖޭގެ ކުޅިވަރު ވަސީލަތްތައް ތަރައްޤީކުރުމަށް ބޮޑެތި މަސައްކަތްތަކެއް ކޮށްފައިވާއިިރު، އެ މަސައްކަތުގެ ދަށުން މިއިން ޒަމާނެއްގައިވެސް ކުޅުންތެރިންނަށް ފަހިކޮށްދެވިފައި ނުވާހާ ގިނަ ވަސީލަތްތައް ސަރުކާރުން ވަަނީ ރާއްޖެ އާއި ބައިނަލްއަގުވާމީ މައިދާނުގައި ފަހިކޮށްދީފައެވެ. އަދި މިހާތަނަށް ކުޅިވަރާ ބެހޭ ވުޒާރާއިން ވަނީ އެކި ކުޅިވަރުތައް ތަފާތުކުރުމެއް ނެތި ގިނަ މަޝްރޫއުތަކެއް ހިންގާފައެވެ.

ރައީސް ޞާލިޙުގެ ރިޔާސީ ވައުދުފުޅުގެ ތެރޭގައި ރާއްޖޭގެ 100 ރަށެއްގައި ފެންވަރު ރަނގަޅު ފުޓްބޯޅަ ދަނޑު އެޅުން ހިމެނޭއިރު، މިހާތަނަށް އަށް ރަށެއްގެ ފުޓްބޯޅަ ދަނޑުތަކުގައި ވަނީ ޓާފް އަޅާފައެވެ. އަދި މިހާތަނަށް ސަރުކާރުން ވަނީ 58 ފުޓްސަލް ދަނޑު ގާއިމުކޮށްފައެވެ.

މީގެ އިތުރުން މާލޭ ސްވިމިންގ ޓްރެކް ތަރައްގީކުރުމުގެ އިތުރުން ހަތަރު ރަށެއްގައި ސްވިމިންގ ޕްލެޓްފޯމް ވަނީ ގާއިމުކޮށްފައެވެ. އަދި އޮލިމްޕިކް ފެންވަރުގެ ސްވިމިންގ ޕޫލެއް މާލޭގައި ތަރައްގީ ކުރުމުގެ އަމަލީ މަސައްކަތްވެސް ފަށާފައިވާއިރު، ސްވިމިން ޕޫލް އަޅާ ބިން 50 އަހަރުގެ މުއްދަތަކަށް ސްވިމިންގް އެސޯސިއޭޝަން އޮފް މޯލްޑިވްސްއާ މިހާރު ވަނީ ހަވާލުކުރެވިފައެވެ. 50 މިލިޔަން ރުފިޔާ ޚަރަދުވާނެ ކަމަށް ބެލެވޭ މި މަޝްރޫއު ނިމޭއިރު، މުޅި އިމާރާތް ހުންނާނީ އެންމެ ޒަމާނީ ވަސީލަތުން ފުރިހަމަވެ، އެންމެ ބޮޑެތި މުބާރާތްތައް ބޭއްވޭނެ ފެންވަރަށް ތަރައްގީކުރެވިފައެވެ.

މީގެ އިތުރުން ސަރުކާރުގެ ތިންވަނަ އަހަރު ގުނަމުންދާއިރު، މާފަންނު ސްޓޭޑިއަމުގެ ޓްރެކް ސަރަހައްދުގައި ޒަމާނީ ސިންތެޓިކް ޓްރެކެއް ތަރައްގީކޮށް، ދުވުންތެރިންނާއި މުޅި މާލޭ ސަރަހައްދުގައި ދިރިއުޅޭ އާއްމުން ދުޅަހެޔޮ ސިއްހަތެއްގައި ދެމިތިބުމަށް ބޮޑު ފަސޭހައެއް ވަނީ މި ސަރުކާރުން ހޯދައިދީފައެވެ.

ދުނިޔޭގެ ފެންވަރުގެ މުބާރާތްތައް ބޭއްވޭ ފެންވަރަށް ބިލިއާޑް ފެސިލިޓީއެއް މާލޭގައި ތަރައްޤީކުރުމުގެ މަސައްކަތުގެ ބޮޑުބައި ނިމިފައިވާއިރު، މިހާތަނަށް ބިލްޔާޑް ކުޅުންތެރިން ނުލިބޭފަދަ ވަސީލަތްތައް މިހާރުވެސް ވަނީ ހޯދައިދީފައެވެ. އެގޮތުން ހުޅުމާލޭގައި މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އަށް ލިބުނު ފެސިލިޓީއަކީ މާލޭގައި ކުރިން އެ އެސޯސިއޭޝަނަށް ލިބުނު ފެސިލިޓީއަށް ވުރެންވެސް ބޮޑު އަދި ޖާގަވެސް ތަނަވަސް ތަނެކެވެ.

އަދި ތިން ރަށެއްގައި އައުޓްޑޯ ވޮލީބޯޅަ ކޯޓުތައް އަޅާފައިވާއިރު، މި އަހަރު ރާއްޖޭގެ 20 ރަށެއްގައި އައުޓްޑޯ ވޮލީބޯޅަ ކޯޓުތައް އެޅުމަން ނިންމާފައިވާ ކަމަށް ކުޅިވަރާ ބެހޭ ވުޒާރާއިން ވަނީ މައުލޫމާތުދީފައެވެ. އަދި މަގުމަތިވެފައިވާ ނެޓްބޯޅައަށް ސްޓޭޑިއަމް ސަހަރައްދުން ފެންވަރު ރަނގަޅު ވަސީލަތެއް ޔަގީންކުރެވި، ބައިނަލްއަގުވާމީ ފެންވަރުގެ ނެޓްބޯޅަ ކޯޓެއް އެޅުމުގެ މަސައްކަތް މިހާރު ވަނީ ފަށާފައެވެ.

ކުޅިވަރުގެ ވަސީލަތްތަކަށް ސަރުކާރުން ބޮޑު ހޭދައެއް ކުރަމުންދާއިރު، ކޮވިޑުގެ ހާލަތާއެކު ކުޅިވަރުގެ ދާއިރާއަށް ކުރިމަތިވި އުނދަގޫ ހާލަތުން އަރައިގަނެ، 2021 ވަނަ އަހަރަކީ ކުޅިވަރު އެސޯސިއޭޝަންތަކުން ބައިނަލްއަގުވާމީ ގިނަ މުބާރާތްތަކެއް ބޭއްވޭނެ އަހަރަކަށް ވެގެންދާނެ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް މީގެ ކުރިން ވަނީ ވިދާޅުވެފައެވެ.

އުނދަގޫ ހާލަތަކަށްފަހު ކުޅިވަރުގެ ދާއިރާއަށް އުންމީދީ އަހަރަކަށް 2021 ވަނަ އަހަރު ވެގެންދާނެ ކަމަށް ޤަބޫލުކުރެވޭއިރު، ސަރުކާރުން ކުރަމުންދާ މަސައްކަތާއެކު ކުޅިވަރު ކުޅުންތެރިންނަށް އުފާވެރި އަހަރަކަށް މި އަހަރު ވެގެންދާނެއެވެ.